REMNA NIA CHIEF MINISTER THUSAWI BIH CHIANNA

Vanglaini chanchinbua a chunga thupui hmanga Pu K. Remruatfela'n a ziak kha a dik hlé mai. Ani hi "Indian Union Chhunga Zofate Rin Luh Kan Nih Dan" lehkhabu ziaktu a ni bawk a, a hre chiang hlé a ni.

Chief Minister khan mi thiam leh fing pui pui kalkhawmte leh zirlai tam takte kha MNF-in zalenna an sual kha a dik a, Mizote tih tûr dik tak a ni ti ang khan a sawi a. A sawi dan khan Mizote chu, tu khua leh tui mah pawh ni lo leh, tu m'a awp ni lo dinhmuna ding, Political Vacuum-a awm angin a sawi a nih kha. Hei hi a dik lo va. Kum 1870 chho vêlah khan Mizote khan kan vela awm, British khua leh tuite kan rún ṭhin a, British pawi kan khawih fo avângin hneha awp law law kan ngaiin an hria a. Min hneh a, min awp ta a ni. Ni 6.9.1895 khan Governor General in Council chuan Mizoram chu Assam hnuaia awmtirin Excluded Area dinhmunah min dah a. India ramin zalénna a neih khan keini Mizote chuan duh thlan tûr nei chuang lovin Assam hnuaia awm kan nih angin India ramah kan awm zui ta zêl a ni.

Kan CM zahawm tak hian Mizoram Political History hi a hre lo tak tak a nih chuan a hriat ngei hi a pawimawh a. Thu dik hre reng chunga Mizo mipuite hi kum 1966-a MNF-in Independence a puan kha dik êm êm leh kan tih mâkmawh nia sawia ram leh mipui tána pumpelh theih harsatna namén lo kan tuar kha thiam chantir (justify) bakah, khatia ram leh hnam tána harsatna thlentute thil tih; ngaih ropui (glorify) tumna a nih chuan Zoram mipui ngaihdân a nih a rinawm loh. Mizo Union hotute'n India Sorkar kha ralthuam leh tharuma hneh chi a nih loh thu an sawi ṭhin kha a dikzia hretu vek kan ni. Mahse, MNF Volunteer te khan silai an hum tawh tih tlang hriat a nih si avâng khan tu mahin Independence sual chhuah tumna dem zawng leh sawi chhe zawngin an sawi ngam lo vek zawk a ni.

Vawiinah pawh hian Politics hmanga Mizo mipui lawm zawng nia ngai a, mipui bual á duh awm ta se, kum 1966-a MNF Movement ang bawk khan tute'n emaw silai néna ṭan an lák lek phei chuan tu m'a sawisél ngam lohvin hnam angin kan la tuar nawn leh thei tih hi kan hriat a ṭha khawp mai. Kan ramin vawi khat a dai sual tawh kha duh tawk tawh ila, mipui máwl zawkte an hruainaah Politician te pawh an fimkhur a ngai takzet a ni. MNF hian Congress Party ninna (anti-incumbency wave) kha an hláwkpui a, Sorkarna te an han chelh ve fo takah chuan Mizo mipui pawh hian an Movement kha theihnghilhsakin, State chhung Politics-ah hian an pawmin an duh ve mai zawk niin ka hria.

- Maliana, Sihphir Venghlun