Lawmluh ngah ber zpm, an sawrkar ang em?

Tunlai Mizoram Party zinga mipui bawh ber leh mi thar lawmlut tam ber chu ZPM Party hi a ni awm e.

Tun hnai khan ZPM Leader Pu Lalduhoma chuan Aizawl E lam bial pakhatah mi thar 621 zet a lawmlut a. He bial hi Minister pakhat bial a ni awm e. Constituency pakhat chhunga hetiang zat lawmlut thei hi Party dang an awm kher lo mai thei. ZPM member awmsa nen chuan he biala ding tur tan phurawm tak a nih a rinawm.

He inlawmluh ṭuma ZPM Leader thusawi aṭang hian, ZPM hian kar tin mi 2000 chuang an lawmlut (deuh ziah) a nih hmel. Hemi hma lama an lawmluh zat hi an lo record ngai lo tih sawiin, lo record hlauh se eng zat tak ni tawh ang maw? Nikum leh kumin (July hma lam) vela an lawmluh hi tunlai ai mah hian an tam zawk hial mai thei bawk.

Tun dinhmuna bial tina ZPM strength hi hriat ni chiah lo mah se, Congress Party ai chuan an lian deuh hret vek mai thei a ni.

Hetiang an nih chhoh mek tawh laia kartin mi 2000 an luh belh ziah bawk chuan, tuna an dinhmun bakah hian, inthlan hun thleng hian mi 32000 velin an la belh phak dawn tihna a nih hmel. Hei hi Chhimlam bial tel lova (Ram puma) BJP Member zat ai pawhin an la tam zawk hial mai thei a ni.

Zep rual lohin ZPM hi Lui kianga thingphun emaw Grep rah duh mi tih ang mai kha an ni ta ber awm asin. An thawm thangva pawh mitdelte hriat khawp hiala ring a ni mek.

Hetiang zela an kal a nih a, harsatna dangin a tlak buak loh phawt chuan, KALPHUNG THAR, MIPUI SAWRKAR chu a piang ngei tura beisei theih a nih hmel e.

Amaherawhchu, buh chhipzawn hial thar thei tura ngaih an nih lai hian, buh insiam chhoh lai hian khua a kheng hlauh thei a. Chu bakah pawh buh seng hun hma deuhin zan khat thil thuah a Zûvà vek thei bawk. Heng thil leh kan Bible thu; in hmaah nunna leh thihna malsawmna leh anchhia ka dah tih hian inzawmna a nei a, bawnghnute chhipchhuan lai pawh a baw thut thei bawk tih hriat a tha awm e.

- Vanlalhuma Kawlni, Ramhlun South