Party hrang hrang dinhmun - I

Tunlai Mizoram Politics ka ziah ve 'Bial inchuh ka hriat vete Part I–III' kha rin aiin feedback ka dawng ṭha a, Mizote hian politics kan ngaihven tawh hle mai tih hi ka rilrua a thawh dan chu a ni. Tunah ve thung hi chuan Mizoram Political Party hrang hrang campaign dan leh Party hrang hrang boruak siam tum dan kan thlir ve dâwn a ni.

■ BJP:-

India rama roreltu Ruling Party lian BJP hian Mizoram ah hian rorelna an chang zo dawn lo tih an chian rual hian 2023 ah chuan sorkar siamnaah (government formation) an tel ve theia inrinna an nei lian hle a ni. BJP hian MLA pakhat chiah an neih Dr BD Chakma chuan a chawlh tur thu a puang a, Dr ND Chakma hi Congress aṭanga BJP lama lut ta a ni tih kan la hria ang. Amah thlak theitu hi kei chuan ka ring thiam lo va, Mizoram BJP boruak che lui lui hi sawi ka thiam tawk a ni.

BJP President Pu Vanlalhmuaka hi lehkhathiam tak niin an sawi a, amah hmelhriat ve mah suh ila administration lamah chuan zir tur a la ngah hle niin a lang a, BJP hian leadership strong tak an neih vaih chuan hlauhawm tak an ni ang.

Tunlai hian Dr K Beichhua chu BJP a zawm dawn tih an sawi a, amah hi MNF-in an bàn tawh hnu pawha MNF MLA la ni tlat a ni a, MNF MLA a nih loh chuan MLA aṭanga a ban a ngai dawn a, MLA Fund leh MLA hlawh a la thei dawn lo a, pawisa a la mamawh vanga MNF MLA la ni ta reng a ni. Congress MLA ni lai pahnih hi BJP lama kal thut thei reng an ni tih leh, an indawr ru zauh zauh tawh tih hi a dik a nih ngai chuan Speaker Pu Lalrinliana Sailo meuhin BJP zawm a sawi thawi nen hian BJP hian pawisa chakna bakah Chakma-Tuikuk Politics khel hian MLA hi pali panga an nei ve thut thei. BJP hian he politics hi ril takin an khel mek asin, Mizo mipui nawlpui hriat loh hian. ZPM lama ticket chang ta lo Alinery Lianhlawng pawh an sawm an la ti ta zel a ni. BJP hian sorkara tel hrim hrim an tum chuan an tel lo ang tih sawi theih a nih loh piah lamah, Congress aiin MLA nei tam zawk thei dinhmunah an ding ta a ni.

■ MNF:-

Ruling Party ni si MNF hi an teh tlawk tlawk hi a mak hle a ni. MNF hi BJP nena NDA hnuaia inzawm tlat an nih avang hian Manipur buainaah hian BJP an khak ngam loh avangin mipui hi an lawm lo tih an hrethiam a nih a rinawm. MNF hian Manipur raltlan ṭha taka lo tuam hlawm si hian raltlan thlentirtu Manipur lama BJP sorkar chu an dem ngam lawi si lo.

MNF GS leh hruaitu rual hian Pu Robert Romawia Royte Hachhek Biala MLA Candidate tura an puang hi duhsakna uchuak tih hi an man lo nge an man ngam lo ni ang? MNF hruaitu hmasa zawk Minister Senior zawk te pawh Candidate an nih puan hmaa Pu RRR-a special taka an puang ta mai hian, he Ministry chhunga thiltithei fal an awm tih a nem nghet a ni. Chief Minister Pu Zoramthanga hian Bial dangah Candidate puang si lova Pu RRR-an a puang hi a awmzia tun thleng hian ka la man lo, mi mal thiltithei bik awmna, Hnam Party anga inchhál si hi a music ka man ta lo.

Biak inchuh an neih Ṭawi bialah MZP hruaitu hlui hoin Kroshnehzova dah tura hruaitute an hmin tawh tih kha, Pu Rinenga Sailo-in ZPM a dawr meuh chuan MNF pawhin an rilru an thlak zuk e, tih hi Hnam Run aṭanga ka hriat ruk, ka hriat chian chàk em em a ni.

Dr R Lalthangliana hi tunah hi chuan MNF ah hian Minister pakhat ve mai a ni ta. MNF palian kan tih ṭhin kha MNF bawkin pa te takah an chhuah a, palian dang an siam thiam leh tawh si lo va, kum 80 tling tawh Pu Tawnluia leh nakkuma kum 80 tling mai tur Pu Zoramthanga chawlh rual hian, MNF Leadership chuh ngam tur zingah pawh a lang ta lo. Chhim lama palian ang pawhin a lang phak ta lo hi internal politics nghawng a ni a, Pu Tlanghmingthanga phei chu a hming pawh kan lam ri ngai tawh lo. Pu RRR-a tih kan lam ngun laiin MNF hruaitu hmasa chu an reh duk a, hemi ngai thei lo MZP hruaitu hlui rual chaw eikhawm ṭhin pawhin an duh zawng Candidate an nawr tling zo dawnin a lang tawh lo niin an sawi.

■ Congress :-

Thu ziak pakhatah Congress hian "Bhawan Politics an khel" tih kha ngaihtuah chian poh leh a dik tawlh tawlh. Congress hian inkaih thawh a mamawh avangin a khát tawkin Bhawan chungah punkhawm an buatsaih hluai ṭhin a, mi 300 lenna Hall an khat zo mang lo va, hall chhungah a ngai leh ngai Congress flag vaiin an zai a, a chang leh an Treasurer hlui a bo daiha a chang leh a rawn lang leh a, Pu John Rotluangliana, Pu Chalrosanga, Pu Robiaka te lam chu an nem bet chho mek a, Pu Lalsawta naute hian media lamah ṭan an la nasa em em thung. Media play leh Bhawan Politics hian vote a keng tlem si a, Grassroots lamah an kal ngam chuan huaisen takin ke pen se, term hmasa aia MLA neih tam tum se chance an la nei.

Congress tih fuh loh lian tak chu MNF ni lova ZPM beih thupui an kalpui hi a ni. Congress hian tuna an chak loha ZPM an sorkar chuan, an hma lam hun a thim tih hmu phakin MNF sorkar nawntir tumin - ZPM lian tur an bei char char a. An lakluh thar Pu Vana te pawh Pu Zoramthanga bei lova Pu Lalduhoma a neih dan en hian Congress ni chunga sorkar a inring lo a nih hmel. Congress dinhmun dik tak lan chianna chu ZPM lama Candidate chang lo pathum láwm taka an lawm lut mai ni lo va, Candidate-tir an tum hi a ni. Pu KS Thanga hi Party dangin Candidate-tir an tum lo niin a lang a, ZPM lama Seat chang lote awlsam taka Seat petu Congress an nih si chuan an inennawn a ngai a, Ṭhat Loh Theih Lohna Bawm ah hian Party danga Seat chang lo tan ṭhat a awl a nih hmel khawp mai.

■ ZPM:-

ZPM hi teh thiam theih loh party an ni. Member en hian MNF leh Congress nen an pathum zingah an tlem ber ka ring. Boruak an nei dawn chauhva neuh neuh an rawn nei leh ṭhin a, chuti chung chuan Party lian pahnih hian an bei an bei mai a, BJP leh Ruling mek MNF aia beih tawk nasa ZPM hi an nawi ang ang hian an sorkar ve thut thei tlat a, an sorkar chuan kan ram hi kan nawi tlang dawn a ni. Party hrang hrang en hian ZPM hian sorkar an inring ber a, mipui pawhin kan ring ber lawi si hi a mak hle a ni.

- Lalawmpuia