Khumtung – Muallungthu road
Kumin Vawk-hniakzawn thla, ni 18 khan Aizawl lama chhungte boralna avangin khaw chhe hnuaiah Aizawl kan kal a. NH-54 kawngpui laih hna an la thawh zawh loh avangin han kal vak ngamna chi a ni si lo va, chuvangin Khumtung–Muallungthu kawngah hian kan kal ta zawk a. He kawng hi NH-54 ai hian a tawi viau zawk a, ṭhenkhat sawi danah phei chuan 20 km. dawn laiin a tawi zawk zuk ti a.
He kawng hi zawhtu an tam viau a, Khumtung chhimlam khuate leh a hmar lam khua - Tlungvel thleng thleng pawh hian Aizawl kal nan an hmang ṭhin zuk ti a. A kawng hi hriat lar dan ber ṭhinah chuan Paikhai Road tih a ni a, mahse he kawng hian Paikhai erawh a tlawh dèr bawk si lo, mak angreng tak chu a ni. Paikhai tlawh hian he kawng hi han kal ngat chu ni se la, a kawng hi a tawi lehzual ngawt chuan a rinawmin, 10 km. emaw vel chuan a la tawi belh leh mai awm e, tia sawi tawk pawh zuk awm sup a!
He kawng hi heti taka zinkawng pawimawh leh lûn a nih lai hian a enkawlna lam a fumfe lutuk lo hi chu enfiah a ngai khawp awm e. Tunah furpui kan ṭan dawn chauh a la ni a, kawng ba samfai a ni tlat lote hi kal vel a tihrehawm duh hle mai. Motor fai ve deuha chuang e ti lovin vangvat saiṭialte pawh kan kai ang tih a hlauhawm thei rum rum mai. Luang leh hmunphiah kungten motor a hlap ang thlawp thlawp a, mit ṭha vak lo phei chu kan phu leh zawk ṭhin!
Tun dinhmun takah chuan Rumliana thlan leh Muallungthu inkar hi chu a mam ṭha angreng viau a, kawnglai khuar pawh hnawh a ni deuh vek tawh a, tlan pawh a nuam khawp mai. Mahse, Rumliana thlan leh Khumtung inkar erawh khuar hnawh a awm si lo, motor tlan laiin khuar hel a tumna lamah khuarah bawk a tla lut leh ṭhinin, driver an khawngaihthlak duh hle mai. Hetih rualin tui pipe phumho lahin kawng uikual an lai khuar a, a vung kawng sirah an dahin, kawng a zim tawh naka laiin a la zim belh leh zel si a, driver tan fimkhur a ngaiin, a chuangte tan pawh thin thi diaia chuan a va har duh tak em!
Engpawhnise, he kawng hi chu zin mite hian kan la hmang reng dawn. NH-54 hi peih fel pawh ni se kan la hmang zel ang. Chuvangin a enkawltu PWD? pawh hi tun ai hian zam ṭha deuh zawk se la, kalkawng ṭha leh tam hi kan nunna thisen zam a ni tih hrechiangin, a taka nunpui chungin enkawl thei se la a ṭha hle awm e. Zin leh hunah chuan hahdam deuh zawka zin theih ngei i beisei phawt mai teh ang le!
- Patrick Z, Chhingchhip.