Politics-ah insawichhiat a tel em?
Politician chu mahni infak thiam leh midang sawisel thiam hi niin kan hre ṭhin a, Mizoramah pawh hian Politician chu an insawi chhe nasa ṭhin khawp mai. Hei hi Politics ken tel ve reng a ni em? tih hi kan zawhna tur zawk chu a ni ta a, Politics a nih hi chuan intih fel aiin midang attack ve pawp pawp ngam hi USA aṭanga India ram thleng hian politics kalpui a ni zawk lo maw? tih hi ka sawi duh tak chu a ni.
Mizo Politician zinga mahni pawl ni lo sawi chhe thiam chu Pu Lal Thanhawla kha a ni a, Politician hlawhtling ber kan ti mai ang chu, Chief Minister ni rei thei ber a ni bawk a. Hei vang hian Politician tan chuan mi dang sawisel thiam hi a pawimawh tlat a ni. Pu Zoramthanga pawh mi dang han sawisel vel chu thiam par par tak a ni a, mahni infak pawh a thiam a, a sawisel pawh a thiam a, Congress a han tih dan te kha, "Congress chu kan bei vak duh tawh lo, an tlem tawh lutuka mahniin an ding ngam tawh lo ang tih kan hlau," a va han sawi tawk thiam tak em. Pu Zorama, politician senior nge nge.
Pu Lalduhoma hian AMC campaign laiin tuna MNF President leh Chief Minister Pu Zoramthanga hi Vanapa Hall-ah a lo kàp vak tawh a, a video en nawn pawhin kan nui kan nui a, a hmuna awm Pu Hawla pawh a nui nasa a ni. Pu Duhoma hian MNF sorkar mek phei chu a chhuah mualpho thiam khawp a, Serchhipa ZPM MLA ni si kha MNF MLA 12 chuan tu emaw ni thupek angin an hék a, an bàn phah hial a nih kha. Pu Duhoma hektute kha chu an inchhir ve thung ang, ZPM an khur phah hluai si a.
Pu Robert Romawia thusawi Hnam Runah khan Nuai 3 an sem theih chianzia, a sem dan tur hre lo chu "Mawl" a tih angte kha chu a thu a la máwl zawk a, an la inzir a ngai. Pu Lalruatkima thusawi Assam Rifles chhuak tur an kel sa kanna bel nen han tih kual vel kha Pu Zoramthanga copy ve si; amah anga thiam ve si lo a ni a, ani pawh a la inzir belh a ngai. ZPM lamah Dr Vanlalthlana pawh hi a thusawi ṭhenkhat a ṭhat nen a chang hian a ṭang ulh a, a sawi tak hriat thiam fak loh hi a awm ṭhin a, hei pawh a la inzir a ngai. Pu Zodintluanga hian mi hming lem phuahsak a ching a, finfiah theih si lohin mi a kap fek fek a, a ngeiawm ru hle. Pu Lalrintluanga Sailo hi MNF MLA zinga thawm na tak a ni ngai lo a, inthlan hnaihah a rawn invawrh thut chhan hi thawm nat a mamawh tih hrethiam a ni a, a ding ru tlat, mi sawisel sawisel chungin ama boruak a siam lian.
Pu Vana of Special Report pawh Politics a luh chilh aṭangin "Thluaka ZPM lut" an tih ang chi a ni nghal a, ZPM a beih hian amah a san phah leh phah loh hre lo mah ila, boruak a rawn nei nghal hak. Pu Lalnunmawia Chuaungo pawh hi MNF bei tura ngaih khan 'ZPM ZPM ZPM' a rawn ti nghal a. 2028 Congress tana Chief Ministerial Candidate nih a tumna kawngah tuna ZPM sorkar hi a pawi tih a man phak a, MNF hi Sorkar nawn se a duh zawk a, a beih tur a thlang thiam.
Politics hi chu inbeihna tual zawl a nih avangin an inbei ve tur a ni. American President Election réng mai an inbei nasa a, BJP leh P lo pawh Central lamah an inbei nasa tih kan hmu, Mizoramah Politics inbeihna kan ngai thei lo hi a ṭul lem lo, a bei thiam leh thiam lo a awm a, chu chu kan hre thiam zawk tur a ni lom ni? tih hi ka mimal ngaih ve dan a ni.
- Samuel Lalnunmawia