KUMIN 2020-2021 BOARD (CLASS 10 LEH 12) TE HI KAN SORKAR HIAN THU CHIANG NEI SE

Kumin kan board exam tur (Cl-X, Cl-XII) te hi kan sorkar hian a ngaihsak lo kan ti. 

Hmun ṭhenkhatah school mumal leh online-a class kal thei ve lo, signal ṭha nei lo leh mobile phone nei lo chhungkua te kan awm a. Covid-19 hri avangin thla 7 dâwn kan buai tawh a, chutih kara kan sorkarin zirlaite an­mahni duhthua sikul kal theih thu a lo chhuah ve chiah a. Kan syllabus kan zir ve hman tak tak si lo. 

A bul aṭanga beih leh fe angaih avâng leh zirlai kan dinhmun a inchen vek lo va board exam hmachhawn nan hun tlemte chiah a awm tawh si. Thuchhuah an siam tlâi em em mai te hi keini thingtlang leh hmun hrang hranga school (Cl 10 leh Cl 12) neite chu kan rilru a buai a. Kan sorkarina syllabus a paih ṭhên (30%) ringawt thlur bing tur pawhin kan hun a tâwt a, rilru khawp mai.

Board exam a awm dawn lo tih sawi a awm si loh avâng te hian kan buai a, rilru a ipik a ni. Sorkar hian kan kumin syllabus hi min paih ṭhen sak hrâm thei se kan ti tak meuh a. He hri hi tunge kaia kai lo tih hriat a ni si lova sikula exam emaw test nei lo hian mahni inah online (Google meet) kal tlang te hian neih theih ni hrâm se kan ti a ni. 

Hetiang teh nuai a nih avâng hian kumin kan board syllabus hi paih ṭhen belh emaw mahni school-in a ṭul an tih chin ang leh anmahni tana pawi­mawh ang thlur bing thei se kan ti hle mai. 

He hri hi a hlau te chuan an hlau em em a, hetia zirlai sikul tlawh phal tihah pawh hian hlauh dan a inchen lova a hlau na na na chu innawr ngaihna a awm si lo. An fate'n online emaw chauha han invil tur chuan a har a, zirlai hriatthiamna pawh an nei tak tak thei lo ang. Thingtlang lamah phei chuan signal te a ṭhat loh avangin a buaithlâk viau a ni. Hetia zirlaiin an hriatthiam tak tak loh ai chuan syllabus hi mahni school ṭheuhin anmahni ṭul leh ṭha an tih angin leh zirlaite hun hman zel tur mil chuah hi enpui ni se kan duh viau a ni.

Kan Sorkar zah­awm tak hian a hma thei ang berin hei hi min ngaihtuah pui se. Hri hi a la reh lawk dawn lova kan damdawiin te hian min la daih lo thuai dawn a, tun ang hi a ni reng dawn lo. Nakinah chuan doctor te thlengin indaih loh a nasa ang. Hei hi kan sorkar hian rilru fim tak pu chungin min ngaihtuah sak thei se. 

Anih loh vêk pawhin thingtlang lam chu zirlai an tlem a, anni tan chuan hri inkai pawh a harsa maithei. Kumin kan board exam turte hmakhua ngai chung hian kan sorkar hian remruatna ṭha tak min neih sak vat se. Kum a tawp hnai tawh bawk si a, zirtitute leh nu leh pate lu a hai a ni. 

Kan sorkar hian kan zirlaite hi nakina kan ram darthlalang tur an ni tih hre chungin kumin kan board exam turte hmakhua ngai chungin zangkhai takin rem min ruat sak teh se, kan ti a ni.