I UPAT HUNIN, TAR VE SUH AW!

Kum 65 chin chunglam hi khawvêlin 'tar' tiin a hria a. Kum 65 leh 85 inkâr hi 'tar ṭhalâi' an vuah a; kum 85 chunglam hi 'târ upa' an vuah leh ṭhin. Nang pawh kum 65 i tlin hunah 'tar' i ni ṭan tawh ang. Mahse, nang chu tar ve suh aw. 

(1) Kum 65 chunglam ṭheuh ṭheuh hrisêlna dinhmun, hawiher, theih­na, rilru puthmang, taksa landân, rilru hman lam, thlarau lama puitlin dân, harsatna hmachhawn kawngah te inang lo tak tak an ni hlawm a. Mi ṭhenkhat chu kum 40 an tlina tar êm êm mai an awm a; ṭhenkhat kum 80 an tlin hnû pawha la ṭhalâi vák mai an awm! Nang chu tar ve suh aw.

(2) I sam chu luṭuakin a bawh vâr ang a, i ha inhung ṭhâtte pawh a bal nual tawh ang. I taksa rihna pawh a tlahniam ang a, i vun a roin, a lo chuar ang a. I hnâ i chawlhsan tawh ngei ang. I ṭhiante leh i kawppui ngêi pawhin mual a liamsan tawh che a ni thei. I tu leh fâte an tládarhin, an buai vek ngêi ang. Mi chuang, tlâktlâi lo leh hnâwlah inngâi lo la. I upat finna hmang ṭangkâi la, tar ve suh aw. 

(3) Mite hriatpui mang lohin i khaw hmuh a vâi ruai ang a, an biak chein "Eng â ni!" i ti fo tawh ang. I rim hriatna leh tui tihna a lo chak lo ang a, i ruh chuk­tuah a chak loh avangin i ṭuan a fûm tawh ang. I thahrui a lo rül ṭhen ang a, i sapui chêt ruih tawh ang. I ngaihtuahna a chak loin, i hriatna a bil deuh tawh ang. Mangang mai loin buai loa nunpui thiam zir zâwk la, ṭul mang loa dâktawr râwn pumpelh theih a ni fo. Nang chu tar ve suh aw.

(4) I chi thlahna leh nau paina bung hrang hrangte chu lo kûlcho deuh mah se, zâm mai teh suh. Nupa nun i hmang khât ta deuh a nih pawhin, tisa châkna leh chêtvêlna chu a tlahniam kher dawn lo tih hria la. Kum upa tam tak angin 'nupa nun hlimna leh lungawina' i chhar belh zel thei tih i hmu chhuak ngêi ang. Nang chu tar ve suh aw.

(5) I kum lo pung zêlah natna bawm khah lûk tura inngaihna i nei a ni maithei, i demawm lo. Mahse, sâpho zirchianna za tam tak aṭangin, kum 75 aṭanga kum 85 inkârah pawh a zâtve vêl lâi chuan buaipui tham natna sawi tur êm êm an nei lo tlat mai. Kum 85 chunglam zîngah pawh natna bawhbeh loh an awm nual. Ruh nâ, thisen sâng, zun thlum, hriatna chak lo , lung nâ, thâwk buai an tam ngei a; nunpui thiam theih a lo ni reng mai. Nang chu tar ve suh aw. 

(6) I kum tam avângin, thil thar chînchhuah har­satna, hriatna bil, finna tlachham, thil zir thiam theihna nei loin i inngâi a ni mahnâ; a dik zîktluak lo. Zirchianna sâng têlin, "I vânglâi chu i tluk ta lo; thâ i sên belh deuh chuan i la pangngâi vek" tih an finfiah asin! Nang chu tar ve suh aw.

(7) Hun inher zêl hian thil thar, khâwl thar, nunphung thar a her chhuahpui ṭhin tih i hria e. I upat avângin zâm mai bîk suh. Mi nâwlpui mamawh chu zir thiam ve zêl teh. I phâk loh thil khawvêlin a chhawp thei ngâi lo che asin! "Ka thiam dâwn khawp mai" ti zêl la, tar ve ngâi suh aw.

(8) I kum a lo tam zêl a, i hrisêlna a tlahniam deuh deuh a, i ṭhianten khawvêl an chhuahsan pheuh pheuh a; thihna i pumpelh reng dâwn lo tih i hrethiam ngei ang. Ni e, mihring tân vawi khat thih ruat a ni alâwm (Heb 9:27). Kum 65 hnuai lam, naupang leh ṭhalâi, tùpawh kan thi reng tih hria la. Chatuana nung tura thi turin inpeih zâwk rawh. 

Pathian bêl tlat, putar Davida chuan, "Naupang ka lo ni tawh a, tunah tar ka lo ni ta a, nimahsela mi fel chu kalsana a awm ka hmu ngâi lo a, a thlahte chaw khawn pawh ka hmu ngâi hek lo" (Sam 37:25) a ti asin. I vânglâi leh i kum upat hunah pawh i siamtu Pathian bêl tlat mai rawh. Nang leh i thlahte a kalsan ngâi dâwn si lo. 

Lalpa'n in chhûngkua Covid-19 lakah vênghim che u sela; upat malsâwmna temtîr che u rawh se.