HNAM DANG PAWN CHHUAK LO TURA "NGEN"
Tun hma deuh khan boruak ṭha lo a awm changin pawl ṭhenkhatin 'Vai Curfew' puan mai an ching ṭhin a. Keini phai lam chanchinbua thuthar thawn ṭhin tan khan ziah fimkhur a ngai ṭhin hle. Mizote hi pawn lam mite mithmuhah thang mawi ila ti tu tan chuan khati anga chet la pawl an awm ṭhin khan a thawpikthlak ṭhin hle. Theihtawp chhuahin ka ziah mawisak hram hram ṭhin.
A hnu deuhah chuan a curfew ang zawnga ti loin hnam dangte pawn chhuak lo turin kan "ngen" ta zawk ṭhin a. Pawn chhuak lo tura in-"ngen"te pawh hi kan ching lo ṭan ta viau a. Assam nena kan buai ṭum pawh khan kan ti ta lo. Thiam takin social media lamah te kan ṭuan ta a, Vai driver tangkhang ei tur kan pe lai thlalak te kan ti darh a, kan hmalak dan kha a fingin a mawi takzet a, chhunzawm zel tur a ni.
Pawn chhuak lo tura in-"ngen" hi kan ching ta lo emaw tih hnuah tun Manipur buaina-ah hian kan han ti leh ta hlauh mai a!
Pawn chhuak lo turin kan "ngen" ti mah ila kan "ngen"-a te tan chuan vauna aw a tel tlat a, tlan chhiat dawr dawrna tham a ni reng a ni. Boruak muanawm lo a awm chuan buaina nena inzawm hnam dangte tan chuan chhuah ngam a ni lo hrim hrim a, pawn chhuak turin ngen mah ila an chhuak chak kherin a rinawm loh.
Manipur buainaa kan Zofa unaute chet dan hi a mawi takzet a. Media lamah nasa takin ṭan an la a, kan hmelmate erawh a rawva zawng hlirin an che thung a, an hnam aiawha media hmachhawn ve tute pawh buluk pui pui an ni hlawm a. Kan unaute erawh smart takin an che tluan zak a, tunah chuan India mipui ṭan an hlawh vek tawh mai a ni.
Kan unaute thlavang hauhna kawng zawh te hi a ṭha thlawt e. He laia hnam dang lo awm ve, engmah khiti lai buainaa inhnamhnawihna nei hlei lo te ti thlabar lo zawng hian khawvel mithmuhah mawi takin kan unaute thlavang hi a hauh theih a ni.
Mizo/Kuki/Zomi/Chin te chu "peace-loving people" tia India leh khawvela kan than mawi a, Mizo Kristiante chet dan tur renga mawia kan chet a ṭul em em a ni.
Mizote kan thinrim em em a, chu thinrimna avanga thil ṭha lo zawk, kan hmelmate tih ang tho kan tih ve lohna turin kan pawl hruaitute an pawimawh hle.
- Zodinsanga