MIPUITE ZAH THIAM LEH RAM HRUAITU ṬHA

Khawvelin innghirnghona leh indona, chhiatna leh boralna lamtluang a zawh mêkna kârah, kan Mizoram ngei pawh hmasâwn viaua kan inngaih laia kawlphetha chhit man a san em emna, tui bill leh chhiah (tax) chi hrang hrang nasa taka a punna, hlemhlêtna leh duhâmnain chintawk a neih lohna, hausa leh retheite kâr a zau zelna leh thiltitheite leh mi liante; hmelhriat ṭha nei ve lote tana hna hmuh harsat êm êmna, Department-a thawkte leh Association memberte-a thil felhlel deuh a thlen palh châng pawh a, an inṭan ṭhêmna avânga sawrkar pawhin a nihna ang taka Action lâk rem loh fona avanga mi tam tak rilru a nat vawng vawngna ramah hian, a ṭul huna MIPUITE ZAH THIAMA THLAVANG HAUH NGAM, HRUAITU ṬHA LEH HUAISEN, inthliarna awm hauh lova RETHEI LEH CHANHAITE hmangaih tak taktu, Ukraine President Zelenskyte anga hruaitu ṭha leh ropui, ram leh mipuite hmangaihna avânga mahni nunna hial chân huama inpe zo, India President Dr. Abdul Kalam te anga eirûkna laka fihlim leh do ngam; tin, Pathian ṭih mi leh thlan tlin nih hnua vote ve lote tân pawha hruaitu ṭha leh duhawm ni ngam, Zoram hian a mamawh ngawih ngawih a, a mamawh zêl dawn ani.

Zoram hruaitu hmasaten kum 30 aia tam ram hruai a ni chung pawha State rethei leh kutdawh (Hotute sawi dan) kan nih reng dânte ngaihtuah hian rilru na hlê mah se, Bihar State leh Delhi khawpuite anga hmasâwn kan duh takzet chuan - Rilru thar leh thinlung thianghlim chu Politician-te leh ram hruaitute bâkah MIPUITEAH nasa takin a innghat a ni tih hriat chian ni mah se, phak ang tawka ram kalsiam thlirna leh veivena aṭang chuan mawhphurtu leh a kaikuang chu a chiang lehzual. Dik chu dik, Dik lo chu dik lo ti ngamin MIPUITE HARH a hun a, huaisen pawh a hun lehzual ta hlê mai. Japan khawpui Hiroshima-a Atom bomb an thlâk hnu kum 10 hnuah a ngai ang deuh thawin an siam hman an ti. Chutiangin hotu liante eiruk lohna Singapore khawpui ṭhan dan chu pui tak a ni. Power-a kan intodelh theih lohna chhan hi tute mawh nge?

Hun kal tawh District Council hun aṭanga INREP TAWNNA LEH PARTY INDUHSAK BIKNA ram ni tawh lovin, mi lian leh tê, Hausa leh Retheite inhmangaih tawnna leh lungrualna, Israel ram leh Tripura State te tluk rih lo mah ila kawlphetha chhit man leh Tui Bill sân lutuk lohna, KALPHUNG DIKA a kalna ram leh dân bawhchhiate tu pawh ni se hrèn ngamna ram ni thei se, a duhawmin hmasawnna rahbi thar pakhat chu a ni ngei ang.

Pathian leh kan ram tân/kalphung thar leh mipui sorkar/ṭhat loh theih lohna Bawm/Zoram thar etc... A enga pawh ni se, a chunga mite pakhat tal hi a NIHNA ANG TAKA hman theih hun leh Delhi CM Pu Kejriwal-te anga mipuite leh ram hmangaihtu ṭha leh ropui, kan ram hian a neih hun beisei tlat ila, a mite ṭawngṭaina chhângtu Lalpa'n thlentir mawlh teh se. “RAM VEI LA, HMANGAIH TAK TAK RAWH”

Ram hmangaihna dik tak leh siam ṭhat duh tak takna rilru nên, huaisen taka hma lak a nih ngat chuan; kan ramah hian DANGLAMNA leh MIPUI SAWRKAR chu Pathian zarah a la thleng ngei ang. Ram chu Lalpa ta a ni si a. ( Sam 22:28; Lev 25:23) “KAN PATHIAN HIAN RETHEITE LEH CHANHAITE A HLAMCHHIAH VE NGAI LO”

- H.Lalpawla, Headmaster (Rtd) , Hnahthial.