Vairengte daia inkah ni kha
“Lalmama hi hetiang hian hliamte tawkin a vanduai zingah ṭang mah se la, vuina pakhat mah ka nei lo; Ram leh Hnam chhanna a nih vangin ka lawm zawk mahin ka hria”, tiin Pi C.Lalramchuani M/o PC. Lalmuansanga (Lalmama), Venghlun, Vairengte chuan Aizawl Civil Hospital-a an awm laiin min hrilh a ni. Kan hriat ṭheuh angin Assam Sawrkar chuan Dt 26, July,2021 khan Vairengte daia Mizoram Police Duty Post chu min hnehchhuh a; hemi avang hian inkahna thlengin Assam lamah hian mi pasarih laiin nunna an chan a, Mizoram lamah chuan nunna chan awm lovin Lalmama hi a hliam na bera kan neih a ni. Kan kan ni hian Lalmama nu hian Mizoram Sawrkar te, amah duhsak taka enkawltu Doctor leh Nurse chungah te, Bialtu MLA Pu Lalrinsanga Ralte leh a tana ṭawngṭaisaktu Mizoram mipuite chungah an lawmzia min lo hrilh.
Vairengte daia inkahna chu a kum hnih cham kan lo thleng leh ta. Khami khan Assam CM Himanta (HBS-a) chuan khawvel hriatah thiam chan tumin media hrang hrang kaltlangin Mizoram chu min bei zui ngar ngar a. Nimahsela, ram hrang hranga Mizo mipuiin theihtawpin kan bei let a; a tawpah Zofate ṭanrualzia a hmuhin beih mai mai chi kan nih lohzia a zir chhuak a nih kha. Media lamin an kawmnaah HBS-a chuan, "Keini Assam lam chu kan inbei vak vak a, Mizoram erawh ṭangrualin kawng engkimah an ṭang tlang a ni," tiin. Ni e, kha ni Dt 26/07/2021 thil thleng avanga Zofa hmun hrang hranga awmte kan ṭanrualzia kha thil ropui leh chhinchhiahtlak a va ni em!
Hun a lo kal zel a, Vairengte dai kan tih ṭhin chu tunah chuan Vairengte khaw chhung a lo ni ta. Kan khaw VC leh Mizoram Sawrkar hmalaknain inkahna hmunah khan chhungkaw 70 bawr vel hnenah in hmun pek a ni a, chhungkaw eng emaw zahin chen nan an hmang tawh nghe nghe. Hemi kawngah hian sum leh paiah Mizoram Sawrkarin harsatna tam tak nei mah se, in sak ṭanpuina bakah Power & Electricity Deptt etc. lamten chak takin hma an la a, an fakawm hle a ni. Tin, Vairengte tlak lam Aitlang lamah pawh kawng ṭha taka sial a nih tawh avangin kuthnathawktute pawn feh kawng ṭha tak an neih chhoh phah ta zel a ni.
Kha inkahna a thlen hnu khan Assam lam; abik takin Lailapur to Silchar te hian Mizo min en dan a dang tlat tawh bawk (Silchar hi vawi sawm aia tam mah tun hnaiah ka kal a ni). An CM HBS-a hoin ngam loh chalah chil an hnawm tih chiang takin an hmu ta.
Inkahna a thlen hnu lawk khan Kolasib DC leh SP-te kha hmaichhan ngeiah ka zawt ve ve a, "Assam Police-ho kan nawr let kawngah hian heti taka in chetna chhan hi eng nge ni?" tiin. Mizoram Sawrkar vang a ni e, tiin min chhang ve ve bawk. A ni tak a, ṭawngkam uchuak leh mahni lar khel miah lova home minister Pu Lalchamliana a han awm te leh, huaisen tak leh a tawk chauha chief minister Pu Zoramthanga'n media kaltlanga HBS-a a han dah nil te kha thil chhinchhiah tlak a ni. Tin, kha mi ni Dt 26/July/2023-a inkah hma leh kah lai khan kan khaw mi tam tak an awm ve reng a, nunna èm chán lova Mizoram kan han awm bikte kha min vengtu LALPA kan lama a ṭan vang a ni kan ti lo thei lo vang.
- Zion Lalremruata, Chairman, Vairengte Welfare Committee: Aizawl.