ZORAM MEGA FOOD PARK

ZORAM MEGA FOOD PARK (ZMFP) chu eng nge ni? – Mawlmang tak leh a tawi thei anga sawi fiah dawn chuan, ‘Mizorama sum chang thlai chi hrang hrang thar chhuah te (Sawhthing, Aieng, Purun, Nimbu, Baibing, Alu, Tomato, Bahkhawr leh a dangte) ei mai theih tur leh zawrh chhuah mai theih tura buatsaihna hmunpui' ti ila a fun kim thei awm e. Heng sum chang thlai chi hrang hrangte hi a dek chhuaktu leh chingtu kut hnathawka ei zawngten ZMFP-ah hian an hralh chur chur ang a, anni hian khawl changkang tak tak hmangin zawrh chhuah leh ei mai theih turin (Processing & Storage) an lo buatsaih ang a, Mizoram leh India ram mai ni lo; khawvel ram dang thleng pawha thawn chhuah theih turin an lo buatsaih dawn a ni. Hetiang atana hmun leh khawl changkang Mizoramin kan nei thei hi a vanneihthlakin thingtlang kut hna thawka eizawngte tan ngat phei chuan a lawmawm lehzual hle a ni.

ZORAM MEGA FOOD PARK (ZMFP) LO INDIN CHHOH DAN – ZMFP hi mi mal ṭhahnemngaiten (ZMFP Pvt.Ltd) Mizoram Economy tana innghahna tlak a nihzia hre chunga an din a ni a. Ministry of Food Processing Industries (MoFPI) hnuaiah February 13, 2012 khan dilnate siamin June 10, 2015-ah Ministry aṭanga phalna hmuin, hemi kum vek December 17-ah hmalak ṭan nghal a ni a, kum 2020-ah hman theih tura peih fel a lo ni ta a ni. He project atana senso zawng zawng hi cheng vaibelchhia 75.20 lai mai niin MoFPI aṭanga sumte hi lo kal a ni. Tunlai khawl changkang tak takte bun niin a hnuaia mi ang hian khawl hrang hrang leh an theihna (Capacity) te han tarlang ta ila –

(Note :- 100 Kg leh Quintal 1 a intluk a, 1000 Kg Or 10 Quintal leh 1 Tonne a intluk leh a ni. Tichuan, 100 Quintal Or 10 Tonne leh 1 Metric Tonne a intluk ve leh a, 10000 Tonne leh 1000 Metric Tonne a intluk ve leh ta zel a ni. Kilogram zawnga kan dah chuan 10000 Kg leh 1 Metric Tonne a intluk tihna a ni.)

ZMFP chu tuten nge hlawkpui ber ang? – ZMFP hian a nihna ang tak leh a theihna ang taka hna thawh tur thlai supply a hmu thei a nih ngat chuan, Mizoram economy chawi kang dawrh theitu leh innghahna tura rintlak kum rei lo teah a ni thei dawn a ni. Mizo zingah thil lian tham han ti thei deuh tura ngaihten thingtlang kut hnathawkte dehchhuah hmanga sumdawnna bul ṭan lam hi an la tuipui chiah lo em ni aw tih theih a ni a, hemi a nih avang hian ZMFP hi a nihna ang taka chhawr ṭangkai tur chuan Mizoram sorkar hi ZMFP leh thlai thar chhuaktu kut hnathawkte inkarah hun eng emaw ti chhung chu Middle-man-ah a awm rih mai a ngai awm e (Middleman chuan thingtlang kut hnathawktute thlai thar chhuah a thartute tana hlawkna awm thei ngei tura rate sangin a leisak ang a, ZMFP-ah khawl changkang hmangin a process-tir ang. ZMFP aṭanga ei tur chi hrang hrang siam chhuahte chu sorkarin a hralh chhuahna tur market – tualchhung, ramchhung leh foreign thleng pawhin a zawng ang a, Mizoram sum chang thlai thar chhuahte chu Export Quality ni tur khawpa sawngbawl a lo ni tawh dawn a ni). Hetianga tluang taka a kal theih chuan a tir berah Thingtlang Kut Hnathawktuten a hlawkna an tel hmasa ber ang, a dawt lehah khawl neitu ZMFP Pvt.Ltd. ten khawl hman man aṭangin sum eng emaw zat an hmu ve ang. A tawpah chuan sorkarin a tira a insensote hmu let leh turin thil siam chhuah items chi hrang hrang a hralhnate aṭangin hlawk zawkin sum a hmu let leh ang a, hlawkna (Profits) rei lo teah a lo awm ang a, a tawpna tak takah chuan Mizoram tana sum hnar pawimawh tak (State Own Sources of Revenue) lo niin Mizoram Economy innghahna a lo ni vat thei dawn a ni.

ZMFP theihna hre turin thlai thar dehchhuah chu eng zat nge a mamawh? – ZMFP-a an khawl neihte hi tunlai khawl ṭha ber berte niin a chunga kan han tarlan tak ang khian an theihna pawh a sang hle a ni. Sawhthing, Purun leh Aieng etc., te hi darkar khat chhungin 20 – 30 Metric Tonne a siam/her chhuak thei a, nilenga a hnathawh theih tur zat tamzia tur chu kan chhût thiam mai ang chu maw (10000 Kg leh 1 Metric Tonne a intluk kan tih tawh kha).

Mizoram-a thingtlang kut hnathawktute hian hmanlai kan pi leh pute aṭang tawhin dehchhuah hi tam kan ti hma em em a, kum khat ei kan thar chhuah chuan duhtawkin tam kan ti em em a, mi dangte thawh chhuah kep leh a nei ve lote hnena sumdawnnana hman lam hi rilruah a awm meuh lote pawh a ni thei awm e. He kan rilru hi bansan a, kan sum chang thlai thar chhuahte a tam thei ang ber kan dehchhuah hi a ngai tawh dawn a ni. Entir nan – chhungkaw pakhatin Sawhthing, Aieng, Purun, Tomato etc., quintal 100 – 500 kan thar kha duh tawk mai lovin Tonne, Metric Tonne thleng pawha kan thar chhuah theih phawt chuan duhthusam hlei hlei a ni a. ZMFP hian a theihna ang taka nileng lenga hna thawhtir tur chuan Mizoram dehchhuah ringawt hi chuan kan chawm zo lo vang tih hlauhawm tak a ni.

Thlai thar chhuah supply a tam poh leh dehchhuah man a tlawm ang (Lower Open Market Price) – Kan thlai thar aṭanga dehchhuah man te (Market Price) hi India ram leh khawvel ram thleng pawha man tlawm zawka kan siam theih ngei ngei hi a ngai a (Competitive Price), hei hi mi dang market kan va vuak chhiat leh kan luahlan theihna kawng hmasa ber a ni (Product Quality pawh uluk hle tur a ni bawk). Hemi tur hian thlai thar chhuah a tam a ngai a, thar chhuah a tam chuan ZMFP lamten labour leh khawl an hmantirna rate a lo hniam ang a, nilenga khawl hmanna khawp thlai thar te supply a nih theih chuan khawl hmangtute senso a lo hniam ang a, thil siam chhuah man a lo tlawm ve thei tulh tulh thung dawn a ni. Hemi hre rana kut hnathawktu te pawhin ṭan lak kan ngai hle dawn a ni.

Tuten nge bul ṭan ang? – Kan sawi thuak tawh angin mimal anga hma la ngawt tur chuan buaithlakna lai tam tak a awm ve thei a, hei vang hian keini ang ram rethei tan chuan sorkar kuta dah hmasak mai hi kan tih theih kawng awmchhun a ni rih ber awm e. Hemi a nih avang hian Mizoram hmasawnna duhtu leh kan ram economy vei tak taktu tan chuan kum 2023 MLA inthlan lo awm turah hian ngun taka ngaihtuahna kan sen a ṭul takzet a ni. Mizoramah Political Party lian Pathum kan nei mek a, he lam hawi zawnga party pathumte sukthlek dan tawi tein i han bih thuak teh ang –

1. MNF Party – Kum 2018 – 2023 chhung atana rorel lai mek niin an hmalak tawh dan thlirin Mizoram tana hmasawnna tur ruhrel (assets) siam lam aiin mi tlem te te hausak belhna tur Project siam chawp hmanga hna thawh an uar viau a, heng thingtlang kut hnathawktute thlai thar dehchhuah tih lam hian an rilru a thleng pha lo hrim hrim a nih hmel. Heti chunga thingtlang lam miin kan la bawh duh zel a nih chuan retheih belh lehzel kan inhuam tihna pawh a ni thei ang.

2. ZPM Party – Tun dinhmunah US Dollar khat leh India Pawisa cheng 82.08 a intluk mek tawh laiin ZPM te hian Sawhthing 1 Kg ah cheng 50-a lak an tum mauh mai hian rilru a tina hle a ni. Tunlaiah Sawhthing hi India ram hmun hrang hrang bazar leh Mizoram ngeiah pawh cheng 100 chunglam vek a ni tawh a, hemi baka ZPM ten thlai thar chhuah hrang hrang lak an tumna rate-te hi zir chian chuan an research beih hi a hlawhchham (fail) ve chiang hle a ni. Tin, thlai thar dehchhuah tih pun lam ngaihtuahpui lam aiin a nuamsa china lo tlangaupui vel (Election Winning Strategy) hi an peih tawk a nih hmel viau. Thingtlang kut hnathawktuten kan ring ngam dawn em le?

3. Congress Party – Congress Party hian harh tharna an chang emaw ni tihturin an insiam chho mek tih a hmuh theih awm e. Zoram Mega Food Park (ZMFP) aṭanga Mizoram Economy siam ṭhat theih a nihzia tuipuitu leh atchilh awmchhun chu; Party Pathum leader te zingah Pu Lalsawta hi a ni awm e. Mizoram economy a letling zawnga kal mek thingtlang kut hnathawktute thlai thar chhuah hmanga her rem tum mektu Pu Lalsawta hi Zoram kut hnathawktute tan chuan ‘Pathian min pek’ tih hial mai chi a ni awm e. A ngaihna hria leh a tak taka tih tum Congress Party hian kum 2023 MLA election lo awm turah hian sorkarna han siam thei hloh se chuan, thingtlang kut hnathawktute tan kawl a eng ve ngei ang le.

Tlangkawmna – Mizoram mipui zaa 60 chuang (60%) ten dinhmun ṭha leh eizawnna hlawk zawk an neiha an intodelh tak tak hma loh chuan Mizoram hian hma a sawn dawn lo a, thingtlang kut hnathawktuten lei rem an rah loh chuan intluktlan lohna (Greater Wide Spread of Inequlities) a sang tulh tulh mai dawn a ni. Hemi hre ran chung hian mipuite pawh hian sorkar kan siam tum danah ngaihtuahna kan sèn uluk a ngai takzet tawh a, min hmangaih dertu hi hrethiam ila, hnàwl ngam bawk turin kan insawm nghal a ni e.

- Lalmuanpuia Zawngte