Zofate mamawh khaikhawmtu

Myanmar-ah Zofaten buaina an tawk a, Myanmar sipai sorkarin mipuiin thuneihna an neih ve pawh a chhuhsak a. Chumi rah chhuah buaina a ni; Myanmar-ah mipui sipai leh sorkar lam an inkap a, mi tam tak Mizoramah an rawn raltlan a. Bangladesh lamah buaina a awm a, Mizoramah ṭhahnem tak Zo hnahthlak an rawn raltlan leh bawk a. Manipur-a buaina hi sawi zau ngai lovin kan hria a, raltlan pawh kan kawl hnem hle.

Manipur-ah hian eng ngati nge Naga te khawih lo va, Zofate zawk an beih tih hi zawhna lian tak a ni a. Chhânna pawh kan nei nghal ṭhûm ang. Naga-te hi chu Manipur mamawh châwk luhna kal kawng ber an nih bakah, an intêlkhawm ṭha a. Zofate erawh, chibila lo inbei fo tawh, in leh khuate lo inhâlsak dur dur tawh an ni a. An ṭanrual lohna avangin zuam an hlawh ta niin a lang.

Hetiang hi Zofaten harsatna kan tawh mek, kan la tawh zel theih thil a nih avang hian Zofate kim tak leh huapzo taka min khaikhawm theitu pawl emaw, inkhaikhawmna hi kan mamawh a ni. Buaina tawh avanga loh theih loha inpui tawn ni mai lovin, hnam tin aiawh awmna, kan harsatna leh mamawh leh, min nêktute ngaihtuahtu tur hi kan mamawh a ni.

Naga-ho chuan United Naga Council an nei a, an hnam anga khaikhawmtu a ni. YMA hi mi tak chuan a awm tho alawm kan ti mai thei a, YMA hi chu tlawmngai pawl ni tura din leh chutianga kal chu a ni a, chu bakah Mizoram chhunga Mizote leh, Mizo ṭawng hmangte awmna tur deuh bikah mi tam takin an ngai a. Hnam leh hnam inkara inhriatthiam lohna te, Zofate leh hnam dang buai chungchanga hma latu tur, rêl feltu tur hi kan neih a ngai a ni.

Zofa zawng zawng khaikhawm theitu tur hi a awm chuan tun ai hian kan inpumkhat zawk ang a, unau kan nihna pawh hi kan hrechiang zawk ang. Hnam bil anga thil kalpui nasa lutuk an awm pawha zilhhau theitu tur, insuihkhawmna pawl kan neih chuan Zofate hian tun aiin thil kan ti nasa thei zawk ang a, kan huhang pawh a lian zawk ang.

ZORO hian Zofate rorelna pakhat hnuaia kan awm theih nan te, kan ṭhat tlanna tur lamte an ngaihtuahin, hetiang lamah hian theihtawp an chhuah a. Amaherawhchu hnam hrang hrang khaikhawmtu angah hi chuan kan ngai meuh lo. Zofa hnam hrang hrang khaikhawm tur hi chuan hnam tin ten emaw, hnam tih tham chin deuh tal ten aiawh kan intirh theihna, aiawh kan neihna nih a ngai ang. Hetiang hi chu nei ila tun aiin kan inpumkhatna pawh a ṭha zawk hlein a rinawm.

- Ramropuia