Hnathawh ka thian ṭha ber

Eden bawhchhiatna avangin rim taka hna thawk tura Lalpa'n min phutna chu mi taimate kutah vawn nunin a la awm reng a. Rim taka hnathawktu thinlungah chuan Lalpa chu a awm a, a lawmpuiin mal a lo sawmsak ṭhin. Hriselna leh nun hlimna a lo pe ṭhin. Mi thatchhe tan khawvel hi awmna tlak a ni lo va, khawvela chanvo ropui ber chu mi taimate thawhrimna hi a ni.

Hnathawh ka ṭhian ṭha ber chu ka hahchawlh hunah ka nun tihlimtu a ni a, rei tak ka chawlhsan chuan ka ngaih a ṭha thei lo va. Duhamna leh nun hlimna ka zawnna avanga ka nun lo hrehawm ta pawh chu hna ka thawhna chuan a tibo leh ṭhin. Khawvela mi hlim thei berte chu mi taima, an hnathawhna bula awm reng ṭhinte chu an ni. Ṭhenkhatte chu hnathawh peih lovin an ṭhiante nen nilengin kawtthlerah an va thangbo va, chu'ngte chuan nun sual an va entawn a, in lamah chuan chhungte tana phurrit an lo ni ṭhin. Tunlaiin ṭhalaite zinga ṭhiante va kawm aia hnathawh thlang ṭhin chuan ama tan leh a chhungte tan hmasawnna thlen leh, hlimna ni tin a insiam ṭhin a. Chumi avang chuan mite ngaihah a nun timawitu leh tizahawmtu a ni.

Mi taima chuan a thil awh zawngte chu a hnathawh rah aṭangin neih ngei a tum tlat avangin a lo intodelh thuai ṭhin. Zoramah hian chhungkaw tam zawk hi mahni thawhchhuah aṭang ngeia kan lo intodelh hunah awhna te, hlemhletnate a bo dawn a ni. Mi taima chuan amah chauha hna a thawh pawhin a hnathawh chu a thlirlet a, chu chuan ngaihṭhatna leh nun hlimna a rawn pe ṭhin a, ṭhian dang a bula awm turin thlakhlelhna a nei tawh ṭhin lo.

Hnathawh peih lova zelthelna nun chuan mi taimate hnathawh rah a hmu lian thuai ṭhin a, chu chuan dik lo taka sum leh thil dang lakluhna a rawn hring chhuak ṭhin. “Thian ṭha” tia ka lo kawm ngeihte chuan ka rin loh deuhin hnathawh ai chuan anmahni thlakhlelh zawng tiin min thangbo zawhsan ta a. Kei erawh chuan ka awmna ngaiah hian ṭhahnem ngai takin hna ka thawk zawk ang a, chu chu ka kawm ngeih ber tur leh ka nun tihlimtu, ka ṭhian ṭha ber tur chu a lo ni ang.

Nang pawh i hnathawhna bulah awm reng la, awm bosan phal suh ang che. Chu ngei chu nang leh kei atana Zoram thara kan awmna tur, kan ṭhian ṭha ber lo ni rawh se.

- H. Neihchungnunga, Durtlang North