Congress ho zei riauna pakhat

Congress party hian tun hma aṭangin thil ni chiah si lo, ni âwm taka lang hmanga mipui rilru han tibuai vel hi an thiam riau a, tunah pawh a la ni zel ni pawhin a lang. Tunlaia Mizorama Congress party-te thu vawrh tam leh sawi tam pawl tak chu, Mizo mipuite BJP huattir leh BJP chu ZPM-in an bêlbul anga lantir a ni. ZPM ho hian BJP hi an bêlbul reng em, an hotute an be thin em, tih lam chu ka hre hauh lo.

July ni 18, 2023-a MPYCC press release thupui chu, "ZPM Leader Pu Lalduhoma leh Christian sakhaw nekcheptu BJP Minority Morcha National Secretary Delson te inbe ṭhin" tih a ni a. A chhung thuah erawh chuan inbia anga chiang taka ziak lovin, "June ni 27.2023-a ZPM Leader Guwahati-a kal, a tuk leh mai June ni 28, 2023-a rawn haw leh chungchangah hian thil rinhlelh awm tak a awm niin kan hria," an ti thung. A hmain Congress party-a mi langsarte'n BJP leh ZPM sawi zawm an tumna media-ah kan hre tawh a, Pu Duhoma leh Delson chu motor-ah an chuang dun ngei a ni, ti ngam si lovin, 'chuang dun anga sawi' a nih thu an tithang chiam a ni.

Pu Lalduhoma chuan July ni 17, 2023 khan ZPM office-a thu a sawiah, 27.6.2023-a Guwahati-a a zin chu chhungkaw thil a nih thu leh Delson nen an inhmuh loh thu a sawi a. Pu Duhoma'n a sawifiah zauhna chu MPYCC chuan "... BJP chakna leh sum rin tumin an dawr ngei tih ZPM leader Pu Lalduhoma thusawi hian a nemnghet," an ti zui a.

Chumi hnu, 19.7.2023-ah Pu Lalduhoma leh Pu K Sapdanga ten press conference an neihah Pu Duhoma chuan ZPM candidate chu an ṭhat thu leh Congress-in cheng nuai 100 pawha an luh chhuah theih lohte an nih thu a sawi niin a lang a. Congress-in July ni 20 khan PR hmangin an chhang ve leh nghal a, "Pu Lalduhoma'n Aizawl Press Club-ah ZPM Candidate tur Congress-in cheng nuai 100-in an thlem nia a sawi hi Guwahati-a zin chungchanga a dâwt sawi Mizoram mipuite rilru lak pên leh phat mar tuma tal buaiin dâwt dang a sawi lehna mai a ni a," an ti.

Congress hotute hian Pu Lalduhoma hi BJP hruaitu Delson nen an inhmu, an inbia, an ti dawt lo a, 'Motor-ah an chuang dun ngei a ni' an ti ngam lo bawk a. 'Thu dik lo hmangin min puh' tia thubuai hlabuaia lak harsa tak si lohin, mipui rilru tibuai tawk tur siin thu an sawiin an thehdarh vel ta ni berin a lang.

Cheng nuai 100-a thlêm luh theih loh chungchangah pawh, Congress ho chuan, 'Kan thlêm lo' tih emaw, thu dik lovin Congress min puh, an ti lo a. Guwahati-a zin chungchanga a dâwt sawi (?) vanga phat mar tumna angin an sawi hlauh a ni.

'A ni e' tia sawina chiang tak awm si lo, mahse thil ni âwm taka lang hmanga mipui han hruai kawi tum velah hian party dangin Congress ho an tluk lo viauin a lang a, an zei bik riauna pakhat a ni. Hetiang hi 'politics khel thiam zia' a ni mai thei a, 'politics ze ṭha' erawh a ni lo.

- Zoramchhana