UCC a do chuan MNF hian BJP hi chhuahsan rawh se
India rama roreltu NDA hi BJP din a ni a, NDA-ah hian MNF an awm chhung chu Mizoramah hian 'BJP ka do' ti sawm sarih mahse kan awih thei tawh chuang lo. Uniform Civil Code (UCC) Mizo leh Kristian tana hlauhawm em em min barh luih tumtu BJP hi MNF hian a la thawhpui zel a nih chuan UCC an do dan hi lemchanna a ni. BJP nena inkawp chungin UCC a do theih loh, chhuahsan ngam law law rawh se.
2019 Lok Sabha inthlan dawna Citizenship Ammendment Bill inchuh lai khan NDA ni chungin CAB an do thu tlangaupui vangin mipuiin CAB do ve tho tur na na na chu an MNF Candidate Pu Lalrosanga kha an thlang a. Vote tlem tein MNF kha an tling a, Mizo mipui min phatsanin CAB/CAA an thlawp thu an sawi leh duh aṭang khan MNF hian NDA an chhuahsan a nih loh chuan BJP note tho an ni. MNF hian NDA kal tlang hian BJP hi an zawm a, an thawk dun a, BJP hi an do thei ngai lo ang, hei vang zawk hian an chhuahsan a ṭul.
Tun hnaiah Congress zawm thar Pu Vanneihthanga chuan ZPM Leader Pu Lalduhoma Guwahati zin chu BJP hruaitute a bia nia puh theihin a sawi. Congress lam hian ruling bei loin ZPM hi an bei an bei mai. BJP nena inzawm chu MNF zawk an nia, a ruk pawh ni loin a langin an inzawm a, NDA hnuaiah MNF hi an awm. BJP nena a ruka inbia nia an hriat pawh an neih duh chuan, BJP nena inzawm MNF zawk hi bei se, MNF bei loa mahni opposition-pui kan beih chut chut tawh hi chuan Sorkar tumna aiin pathum a fal tak nih loh tumna an nei lian zawk tawh a nih hmel hle a ni.
Hmar chhakah hian BJP chuan North East Democratic Alliance (NEDA) a din a, BJP kaihhruaina hnuaia kal mek Hmar Chhak sorkar te inzawmkhawmna chu NEDA hi a ni a, MNF hi hetah hian an tel. Pu Zoramthanga pawh Pu Amit Shah hoa an inhmuhkhawmna thlalak pawh kan hmu a, Biren Singh te nen an awm. A Congress teh reng pawh hi BJP nena inzawmsâ MNF awm renga bei si loa mi Guwahati kal mai mai finfiahna pawh nei loa beih hi, vote hmuh belhna aiin vote chân belhna a ni tih hre rual an nih vei nen. BJP zawmtu chu MNF zawk an ni. MNF hian hnam issue-ah a taka thil an tih theihna turin BJP bawm siam NDA hi chhuahsan vat rawh se.
MNF hian Manipur issue-ah Mizoram chhungah fak an hlawh a, MNF ni loin Congress leh ZPM sorkar lai pawh ni se kan unaute thlavang hi tu pawhin na takin an hauh ang. Pu Zoramthanga pawh a che ṭha a, fak a hlawhin Kamrula contract zozai avanga demtute pawhin Manipur issue-ah chuan kan fak a ni. Kan fak tluan theihna turin NEDA lama a hmuh ṭhin BJP CM Biren Singh hi a takin bia se, Mizoram aṭanga dem lo hian pen chhuak se a ṭha ang. Pu Zorama hi a upa deuh tawh a, zin a harsat pawhin Manipur CM betu tur hi Mizoram aṭangin tir rawh se, Pu Zoramthanga tan Manipur CM hi mi hrang a ni lo a, NDA leh NEDA lama a ṭhianpa a ni. A duh tak tak chuan a be thei.
Kan ram suk thlek en hian MNF hian hnam party inti ngam zel tur chuan NDA/BJP an chhuahsan ngam a hun tawh. BJP thuhnuaia awm chungin UCC a do theih loh tih CAB-ah khan kan hre tawh, MNF hian UCC hi a duh lo tak tak a nih chuan UCC min barh luih tumtu BJP hi a chhuahsan phawt a ngai a, UCC duh si lo BJP duh si hi chu lemchanna mai a ni. CAB aṭangin kan inzir tawh.
- H. Lalrinawma (Marina Hrangchal)