AR leh Mizote tih kha

July 24, 2023 Vanglaini Editorial kha thual nawn ngei ngei ngai a niin ka hria. Assam Rifles Inspector General (East) thusawi AR-in Mizo ṭhalaite tan medical leh engineering entrance hmachhawn tura inzirna, coaching centre an din dawn tih kha, AR insawn chhuah mai an tum lohna lam a ni thei lo maw?

A khai-khawmna, "Assam Rifles hian Mizote hi ṭhiana min siam an tum, chumi kawngah chuan kan mamawh angte min tihsak a, amahni bêltu NGO-te pawh an lo pui tawh ṭhin bawk.

Tun hnaia Mizo ṭhalaite tana zir zelna tur remchang an siam hi thil lawmawm tak a a ni a, chutihlaiin an hmunpui aṭanga an insuan chhuah hun turah erawh an reh rei leh ta deuh a; mipui nena inlaichinna ṭha an siam hi an chhuak tur an muan phahna atan hmang lem lo se a ṭha ang," tih kha kan ngaihtuah chìk a ngai a ni.

Zokhawsang lamah chhuak vat vat se kan tih em em laiin, Mizo zirlaite tan thil ṭha an rawn ti leh dawn a, thil ṭha tih timing fuh lutuk hi sawi chian a ngai a ni. AR hi an hnawk kan ti lova AR awmna hi an hnawk chu a ni. AR hian kan state khawpui hmun an luaha an chhuahna tur pawh siam a ni tawh a, Chief Minister Pu Zoramthanga chuan an chhuah tur thu Lammualah ngei mai 2019 khan a puang tawh a, CM thupuan hi an ngai pawimawh lo khawp mai.

AR hi Mizote ṭhian an nihna a bo lova, mahse Zokhawsanga awm chung hian kan ṭhian ni ta zawk se a ṭha khawp ang, an chhuah a hun tawh. Amit Shah pawhin an awmna hmun tur a rawn hawng tawh a, tunah chuan kan khawpui pawnah hian kan ṭhian ni se a ṭha.

- Lalthanmawia, Kulikawn