AIRPORT KAWNG BAWK A PING LEH TA

LENGPUI AIRPORT : Kan panna kawng hi Vaivakawn Company peng Lei tla hniam aṭang hian leilung nghet lo a nih chu mi tin hriat a ni a. Chumi piah lama Luangmual ram hnuai Rangvamual leh Ropaia bawk hnuai zawng zawng leilung hi leilung nghet lo (Loose soil) a ni thla vek a. PT C peng vel aṭang khuan a dàm deuh ta chauh a ni. Kan ram tlang ram a nih bakah Lirnghing Epecentre Kum 2019 aṭangin a rawn insawn lut e’ an ti leh nghal.

Vaivakawn, Luangmual, Sakawrtuichhun, Sihhmui kawng hi rawtna chu a rikna a rei tawh hle a. Inernet Google aṭanga thlir pawh hian tuna Rangvamual Highway kawngpui ai hi chuan a direct a, Airport hi a hnai em em bawk. Mahse kan politics leh society ah chuan an sawi ri lo khawp mai.

Tin, tun hma lam khan budget leh development-in Zokhaw lam a thlen phak ve loh avangin budget luang chhah lai tlan turin khawpui lam hi mipuiin an pankhawm ṭhin a. Aizawl khawpuiah mautam sazu angin kan inek-beng chiam a. Land Settlement & Regulation Act 1956 in a phal loh kham pang leh lungpui/pialtlep hmun leh khampang thlengin kan luah ta zel a ni. Heng hi Dan anga rorelna a kal ṭhin loh avangin mipui kan buai ta ṭhin a ni. Aizawl leh Bawngkawn inkar chiah hi Aizawl khawpui emaw ti ni awm tak hian chei kan tum a, kan rim a. Thil lo awm tawhsa historical monument te tih chhiat kan pawisa lo a, kan tiboral zel hi a pawi hle. Vanduaithlak takin DC office Lushai Hills Superintendent office kang te, Treasury strong room Government confidential, leh Exam paper kan dah ṭhinnate a kàng ta. A uiawmzia chu kan hre dawn chauh a ni. Hnam fingten thil hlui an ti chhe ngai lo va. Development chu hmun thar/dangah ropui zawk turin an duang mai ṭhin.

EXTENSION PLAN: Khawpui zauh belh lam pang hi kan mipui titi, Political Platform, Policy Assembly debate leh zawhnaah reng reng hian a ri lo ang reng ka tia. Chanchinbuah pawh kan hmu lo. Aizawl Greater plan tih vel kha chu a awm ngei a, mahse chunzawm a awm thei lo ni maw!

Aizawl chhuah lam panga World Bank (project) Road kan lo nei hman hlauh hian min chhàwk a. Aizawl South lam chuan damlo Durtlang Hospital leh hmar lam pan turin World bank road aṭangin an tlan ṭhin. Chutiang bawkin Hmar lamin ZMC leh Trinity Hospital pan turin hmanhmawh thilah an tlan ṭhin bawk a. A ṭangkai hle a ni.

RING ROAD RAWTNA: Kulikawn leh Bawngkawn kawng ziding aṭanga tlan chhuahna awm chuan min chhàwk tih kan sawi tawh a. Hetiang hian kawngpui hi tihpuitlin ni ta se :

Sihhmui (Sairang) aṭangin - Sakartuichhun ramah kalin, Central Jail thlangah Telecom Office kawnah lo chhuakin, Ramri kawnah pheiin University Road-ah.Mizoram University thlen hmain Maubawk ramah kai pheiin, Tlangnuam ram Pharbawk chungah Hlimen ramah - chuta ṭangin - Samtlang ram ah, Hualngohmun ramah, National Highway a man ang a. Medidical College chu a thleng a ni mai. He Medical College hi ṭhang chakin puitling thuai se kan tih chuan mithiam Visiting Professor-in an tlawh zut a ngai a. Heng Survey duansa zinga Sihhmui – Sakawrtuichhun phei hi chu laih zawh tawh a ni a, leilawn dawh ngai a awm nual awm e.

A HLAWKNA TUR : 1)Mizoram Chhimlam leh Aizawl aṭanga Lengpui Airport-a Flight tur reng rengin Lengpui Airport pan nan an hmang ang a. Reporting time tlai hlau loin thlamuang takin an tlan thei ang a, hun a duh rei lo bawk ang. Rangvamual Truck lian pui pui Full load tawk zawnga tlan hi a him lo.

2) World Class Education kan sawi ṭhin a. Mizoram University hi Airport-in a pawh ngei ngei tur a ni. President kha Chancellor a nih avangin Convocation neih changa kal nan Hali pad (Copter ṭumna) a awm ṭhin. University chuan Seminar, International seminar, Committee, Convocation, Symposium, Workshop a nei chamchi a. Heng atan hian Resource Person Foreign University aṭangten Visiting Professor an lo kal a, Darkar 2/3/5 te lecture pein Airport ah drop-in, University dang an pan leh mai ṭhin a ni. Chu awlsamna chu University-in a neih chuan a standard a sang thei tawh dawn a ni.

3) University Student ten hun thawl tak neiin tlan nan an hmang ang a. He kawngpui hi Aizawl khawpui leh Municipal Area aṭang leh, a remchang apiangten tlan chhuah nan an hmang thei ang. Exam lai pawn Traffic jam hlau lovin lehkha an zir thei ang a. Aizawl Ring road a lo ni nghal bawk ang.

4) Hetianga Kawngpui nuam fahran mai a lo awm chuan, mipuiin kawngpui an bawh lo thei loh avangin a laih hmain kawngpui hnuai lam pang zawng ram neite chu sawkarin Land Acquisition Act hmangin la vek se la. City Reserve forest-ah puang nghal se la. Chu chuan Tlawng Aizawl tui lakna chu a venghim dawn a ni. Tin, Reserve a nih loh chuan Tlawng hi a lo bawlhhlawh viau thung dawn. Reserve a lo nih chuan Aizawl khawpui boruak a vawng dai bawk ang. Khawpui (City) chungah Oxigen a awm loh chuan ruah pawh a sur thei loin leilung pawh a tháwp vek ang a, chu chuan thil hlauhawm tak a thlen thei ang. Tlawng thlen hmaa lui, a fintute khuaha check-dam siamin Tlawng lui a thianghlim ang.

NOTE : A ram neituten Ram an pek phal chuan Central sum pek (Funding) chu India Sawrkar hian harsatna a nei lo va. Mahse, an compensation thlenga pek erawh a duh lo.

- C. Vanlal Ruaia.  Ph : 9862569310