Ṭul loah kan thâmral tam ta!

A chhan leh vang chhuichhuah loha ram ro tling thâmral a tam ta hle a. A nihna tak kan chian si loh; rin dan erawh kan neih, rin thiam harsa bawk si, cheng tam tak sênga sorkar hmalakna hluihlawn hmuh tur a tam ta!

Han chhui ve bawk mah ila, a tawpna chu a ho leh ngawt ang, han tih tur hi kan hre tam tawh a. Chumi awmzia chu hun kal tawhin min hrilhfiah ṭhin vang a ni. Hmuhchhuah tur dik tak hmuchhuak thei lo tur zawng hian kan inchhui ngar ngar emaw tih turte hi kan ang lek lek a.

Tun hma lam deuha Hydel Project lar tak pahnih – Kau Tlabung leh Tuipang Lui chungchang te, Culvert thlâwk thei an tih te, Police Mawza Manto tih chungchang te, damloten ṭangkai taka an hman tur Mobile Medical Unit (MMU) a hlui leh a thar thu-ah te, OPD chhawng khat bo tih te, Sunshine Overseas Corporation-ah MLA pakhat chuan dan loin chanvo (share) a nei nia sawi te, MLA ni chung veka High Protein Biscuit Supply chungchang thute a tam mai.

Sikul naupang uniform leina tur (Uniform Grant) Rs. 743.16 lakhs lapse chungchang te pawh 50-50 kan ti liam mai mai a. Rope way chungchang te, tunhnaiah tak phei chuan party pakhata an hotute’n mi hausa pakhat hnen aṭangin cheng nuai 25 dawn thu-ah, a taka thil thleng ngei mipuiin kan chian zawh si loh te thlengin sawi tur a awm.

Mizote hian thil thleng eng pawh mai hi kâr khat bâk kan sawi zui ṭha peih meuh lo a ni ber a. Kum a vei phei chuan kan Kristianna nena inmil lo nia ngaiin ‘sual’ tihmualpho hi kan hreh hle niin a lang. Hei hian sual a tingampa ang nge, kan simsan zawk ang tih hi ngaihtuah tham tak a ni.

Hetih lai hian nun kawng dik lo zawhin mi tam tak kan ral bawk a. Zu leh ruihhlo kaihhnawiha inhnamhnawih leh a fel lo na na nate chu mahni’n kan tuar a, a ni têlin thlanmual kan hnaih a, a tawpah Pastor leh Kohhran Upa te’n Vanramah min thawn ‘risk’ leh nge nge ṭhin.

Hetiang deuh bawk hian fel tak hian a ral ve theih bawk. Nula tlangval tam tak chu khawtlangah leh kohhranah a kûl-a-taiin kan inhmang a, kan fel hle mai a. Mahni hna ber lehkhazir emaw eizawnna dap emaw hlamchhiah ṭhakin ei tling lova thâmral ta pawh kan tam. Officer chhuanawm tak tak ni thei tur; thil dang buaipuia ṭul em em, ei hmuhna ni mang chuang si lo buaipui nula tlangval tam tak chu ‘fel takin’ kan tawp tam hle!.

Phai lama lehkha zuk zir, nimahsela welfare leh Kohhran lam thila tui ta lutuk, awmkhawmna apianga a neitu ni thei zel mai, phaia rei fê kan awm hnuah pawh ‘result’ nei mumal ta lo, buai fê fe kan ngah tawh mai. An sual lo chauh pawh a ni lo, an fel a, an fel leh lutuk a, an zuk fel ral der mai a ni! Chuvangin, fel chhiatpui zawk ta hlauh pawh sawi tur an awm nual.

Engkim hian hun bik a nei a, bo hlen kher lo mah ila, a hun lai kan bawh pelh miau chuan harh chhuahin awmzia a nei tak tak tawh ṭhin lo. Chu chu mimal, a bikin nula leh tlangval zirlaiteah ni ta se la. Sorkar hna ṭha hmua eizawnna puitling tak siam turin fel dan kawng dik zawh kan mamawh.

Sorkar hnuaia thil fel lo, a hun laia tihtakzetna nena sual phawrh mualphova, inman chhuak tur pawh hian a ram leh sorkar angin kan tlai hman ṭhin niin a lang. Chhuichhuah lohva riral ta mai mai kan ngah tawh hle a. Sum tam tak senna, project hluihlawn tam tawhzia te, In 500 khua tih hmasawn nana îtawm tham fe fe, kan vawm ral hnem ta! Kum khat lek chhung pawha khaw tam tak tih changtlun theihna tur leh kawngpui siamna tura rualawhna tham zet zet kan chingral a, ṭul lo puiah kan thâmral hnem ta mah mah!

- Zobiakvela (Masena)