A hun takah Sari a rai ta!

"Nang hi ramrite i tlawh vak vak a, hri lakah i hlauhawm lo maw?" "In vak nasa si a, i hlauhawm ang a," "In test-tir ve teh, in hlauhawm ang," tih thute hi kan dawng âwl lo a. Tripura nena kan inrina Langkaih lui dunga duty te, tlaivar dáwna kan tlawh ṭum te, Burma nena kan inrinna ṭiau lui kama duty te leh Assam nena kan inrinaa duty te tlawha kan vah lai phei kha chuan, mipuia hlauhna boruak len zual lai kha a ni a. In lam kan thlen rualin covid test tura duhsakna thu hi kan dawng zing em em mai a. Fiamthu thiam si loin  fiamthua heng thute min hrilh ve chângte hian, a der tak taka nuihluihsak an ṭul a, pheikhawk tawt bun ang maiin a rukin kan ner kan ner a ni ber mai. Kan hriat ve reng thu tho hmanga min duhsakna thu dawn tâk foah chuan, 'Kan lo possitive ve reng ang a,' tia rilru kapa awm châng pawh a awm ve ṭhin a nia, he mihring rilru hi a!

Heng thu avang te, mahni lama fimkhur hrim hrim vangte leh ninawm khawpa min duhsaktute chhan letna atan tiin ZMC lama thawktute zinga hmelhriat ṭhate hnenah Covid test nei turin ka lo ngen fiam daih tawh a. Mahse, a boruak vung vanglai a nih vang te, dam sen ṭul bawk si kha in-test tur chuan remchan lohna a awm a ni tih kha kan hre zui a ni ber a. Hetiang hi kan nih tâk avangin, 'E, a ni tak e,' tiin kan tana hun ruat lo thlen hun tur chu lungawi taka nghah mai kha a finthlaka ka hriat avangin lawm takin, 'Ni e,' kan ti ta a nih kha. Kei leh midangte chuan covid laka ka him leh him loh kha test duh mah ila, a rem rih ngang lo a ni tih chu pawm mai a ṭul ta a ni.

Mahse, nimin mai khan kan beisei loh takin MJA lama kan hruaitute hmalaknain RT-PCR test kan nei ve ta thut a. Rinhlelh vanga test ni lo, fimkhur vanga endik kan nih avangin hlauhthawnna nei lo mah ila, result nghak nih tâkah chuan thil dang tih kawngah rilru a kap ve ta hlek a ni ber a. Mahse, thawktute zarah kan result pawh kan hre ta! 'NEGATIVE' tih thu inziak chu ennawm ropui a tling a, lawmna chhetê a lo thleng zui a, 'a vuakna vualtea tihdamin kan awm ta' tih hluai mai châkawm tak a ni.

Pathianin Abrahama hnenah, "Hun hi a lo thlen leh tikah chuan i hnenah ka lokal leh ngei ngei ang a; tin, ngai teh, i nupui Sari chuan fapa a nei ang," (Gen 18:10) tiin Pathianin fapa pek a tiam a. Mahse, a nupui Sari chuan chu thu a lo hriatin, 'Tar ka nih tawh hnu hian lâwmna ka nei ang maw, ka lalpa lah a upa tawh bawk si a," a ti hial a nih kha. Hei mai a la ni lo, "..Abrahama leh Sari chu upa tak, tar tawh tak an ni a; hmeichhe dân pângngai chu Sari chungah chuan a reh daih tawh a," tih a ni bawk.

Mahse, Sari'n hun ti lo mah se, Abrahama'n hun ti lo mah se, Lalpa'n an tana hun a ruatna hnuaiah ngei Abrahama kum za a nih hnuah Isaka a lo piang ta tlat si a nih kha. Lalpan kan tana a hun ruat hi a va pawimawh em!

Kei ngei pawh ramri hmun hla tak takahte kal a, hetia kan vah vak vak avanga min duhsaktute avang leh keimah ngei pawhin thuneitute hnena covid test kan duh thu kan thlen lai khan, chunglamin hun a lo la ti lo a ni tih chu ka pawm a ṭul si. Mahse, Lalpan hun a tih hun takah, keimahni lam hun ruat ni loah, a hmaa test kan beisei aṭanga ni tam tak liam hnuah, nimin maiah RT-PCR ngeiin endik kan lo ni ta zawk a. Thawkute zarah result ṭha tak a lo chhuak ta a nih hi.

Isaka a pian laia amah hringtu a nu Sari'n, "Pathianin mi tinui ta; mi tin a hria apiangin min nuihpui ang," a tih ang khan, kei ngei pawh ka beisei hun ni lo, Lalpan hun a tih zawk huna ka thil tawn avang hian min lawmpuitu in awm ngei ka ring tlat a ni. 

An duh hun ni lo, upa an intih hun tawha chunglamin fa a pe ang khan,  keinin hun kan tihah covid test chu neih duh mah ila, Lalpa hun ruatah zawk, kan hriat lâwk miah lohin kan tan kawng a lo inhawng ta a, Sari angin lawmna lam thu kan hre ta a nih hi.

Mihringte hun ruatah ni lo, Lalpa hun ruatah ngei kan awm zawk tih hi hriain, a hun ruat hi nghak thiam mai tur kan ni zawk e. Covid 19 lakah hnehna puangin result ṭha tak kan nei ta. A hun takah Sari a rai ta a nih hi. 

Covid 19 dona kawnga rim taka thawktu zawng zawng ten hriselna ṭha tak neiin malsawmna lo chang zel se la, damlote tidam a, lungngaite thlamuantu lo ni zel turin he lawmna hunah hian duhsakna ka hlan nghal bawk e.