KAN ṬAWNGṬAINA A LA THLAWN LO

Hripui leng velah ringtu kan nihna lang chhuak turin chung Pathian kan au. Kan auh dan key erawh chu, mahni hmasialna lam hawi a nih chuan, "In dil a, in dil dik loh avangin in hmu lo, in nawmsak nana hman in tum si a" (Jakoba 4:3) tih ang khan, dil dik loh kan nei maithei. 

Hripuiin min luhchilh ta: Khatia kan ram pawna awm te, hri leng avanga hna tawp ta te leh, an zirlai chhunzawm thei lo te, mahni in lum ngeia rawn tlanchhiate khan, an tlanchhiatna kawngah zawk khan, hri an rawn kai chho ta si a. Quarantine Centre 

aṭangin +ve an awm ta nawlh nawlh mai. 

Sipai rual an lo lut a, ram pum +ve chanve deuhthaw an rawn pu lut bawk, kan buai ta nuai nuai. Front line a duty ten an kai ve ta zel a. Kan kawng chhiat vanga tangkhang driver-ten hri an rawn pu lut ve leh bawk a. Mi ram ang maiin, kaina chin hriat lohten an kai ta nawlh nawlh mai bawk. Mi pakhat +ve awm avanga kan chiai lai ai mah khan, mi 1000 chuang +ve awm tawh hnu hian, kan chiai ta lem chuang lo. 

Mak angreng tak chu: Khatia +ve an awm tak khan, a enkawltu doctor leh nurse-te khan, an enkawl chhung chu indah hrang tur ni awm tak khan, social media lamah an suitcase te nena room an lut lai, an theh darh chuai chuai a, hnam pasal ṭha tiin kan fak sup sup a nih kha. A ni chiah reng a, anniho kha kan tana hnam pasal ṭha an ni. 

Chutichuan, keini mipui chuan +ve enkawlna hna thawktu apiang indah hrang zel tura kan ngaih laiin, an chhungte pawh an lo tlawh zauh zauh a, mipui zingah an lo teihawi ve tho tih, +ve an kai thu kan hriat aṭangin, kan lo hre ve chauh a. Chutia mi 2/3 an +ve hnu chuan, sorkar lam chuan anmahni dah hranna tur an buatsaih thu kan lo hre leh a, hmana dah hrang zela kan ngaih kha, a lo ni lo tih kan hre thar leh ta chauh a, kan harh chhuak tlai deuh ṭhin chu a ni. 

Kan kawngpui neih ropui ber lah chu, chhiat namen lohvin a chhe bawk si a. A chhiat em avangin, a siamtuten hna an thawh theih nan, kawng block ngai hial khawpin kan vil hman si lo va. Chutia kawng block a nih takah chuan, driver leh handyman tam tak, kalkawngah an riak nghuk mai a. Kolasib DC ngaih ṭha lo khan, check runpui a buatsaih ta a, a hlauhtawn ang ngei khan, +ve an lo awm ṭeuh mai. 

Hetiang a nih chuan tiin, Vairengte lamah hri check-na khawl kan chhawp ta chauh a, kan chhawp aṭang chuan a khat tawkin +ve an hmu ta nawk nawk mai le! Kan che muang deuh zel chu a ni ber mai. 

Mahse maw, kan van­neihna em em chu, khatia Varengte lama check-na ṭha kan inchhawp hma khan, phai aṭanga motor lo lut a tam hman tehreng nen, khami zinga driver/ handyman eng emaw zat khan, hri an kai ang, mahse an rawn theh darh thu hriat tur a awm lo kha, mak deuh asin. 

Thil mak dang leh chu, hripui hi kan hlauh tlan tehreng nen, rinhlelh test mek te, result la chhuak lote pawh an result chhuah hma hmain, mipui zingah an lo vak kual chiam hman ṭhin hi a ni. An result a rawn chhuak a, +ve an ni tih kan hre ta mai ṭhin a, mipui kan buai leh nuai nuai a. Kan fimkhurna a nep ṭhin mah mah chu a ni. 

Kan hri kai dan tam ber hi, kan fimkhur loh vang deuh vek a ni, hri kai lo tawp turin ṭawngṭai chiam mah ila, kan fimkhur tawk loh miau chuan, fihlim ngaihna a awm chuang lo. Tunah phei chuan, chhui let ngaihna awm lo khawvelah kan tlu lut ta, mi ram nen danglamna kan nei tawh chuang lo. 

Kan ṭawngṭaina avang zel a la ni: Chutichuan, kan hun tawn chhoh dan chu kan hre tlang vek a, mahse mak tak maiin, kan mi rinhlelhte test -ve result a lo chhuak leh tlat mai ṭhin, +ve nena khawsa ho ngei pawh, an -ve a, rin vak loh zawk an lo +ve ṭhinte hi mak tak a ni. 

Driver tam tak test loha lo chhoten, an rawn theh darh chuai chuai lote kha, vanneihna mak tak chu kan chang chiang a ni. 

Hei chang a ni lo, kan fimkhur tawk loh avanga kai ṭhin ni mah ila, kan fimkhur loh luat aia nepin hri hi kan kai ni zawk hialin a lang. Hetah hian chung Pathian a che a ni kan ti lo thei lo. 

Hei aia thil ropui kan chunga lo thleng chu, hripui avanga thi kan la awm ve lo hi a ni. Kan dam lote pawh ICU lama han awm rap rap awm ve ṭhin mah se, chanchin lawmawmin a rawn zui leh mai ṭhinte hi, chung Pathianin min veng a ni kan ti lo thei lo. Thihna hi kan tawng ve lo vang tih kan sawi thei lo, mahse he hnam hian Pathian a au eih ṭhin tih kan sawi tawh kha, kan tuar theih aia nasaah chuan min hruai lut lo tawp ang. 

He hri leng lakah pawh hian, mihring lamah indemna tur tam tak awm mah se, kan Pathian hian min khawngaih em a, kan tuar tur aia nep hi kan chungah a lo thleng leh mai ṭhin. Ṭawngṭaina hi i thlahthlam lo phawt mai ang u.