AR NGAIHDAM DILNA HI

September 5, 2020 khan Assam Riffle te chuan Central YMA hnenah ngaihdam dilna thu an thlen a ni awm a, an lehkha erawh keini hmuh a rem rih lo te pawh a ni awm e. 

He ngaihdam dil­na hi kan hriat ṭheuh angin Aug. 31 thleng tur kha a ni nain AR lam hian 'min lo nghak rih lawk rawh u' an tih vanga Sept. 5 thleng nghah a niin a last date-ah heti hian ngaihdam dilna chu an rawn thlen ta a ni. Hei hi heti ngawta thlir liam mai chi erawh niin a lang lo. 

CYMA hian Sesih khuaa kan unaunu chhung leh khatte hi an han thlamuanin AR ho lakah hian an han humhim zo chiah em? AR te hian kan hriat tawh angin Sesih khua hi chhuahsan turin an insawi nain vawiin thlengin an la chhuah­san lo nia hriat a ni. Hetia CYMA hnen daiha ngaihdam an rawn dilna hian Sesih khuaa kan hmeichhiate bawrh­bang taka chhaihtu AR te lakah hian kan hmeichhiate hi an thla a muang zo ang em le? 

AR te ngei pawh hian pawi tiin Sesih khuaah hian inthlahrung takin an awm phah ang em? Kan nulate hian thlamuang takin daiah thing an phur leh ngam zel ang em? Zawhna chi hrang hrang a awm ṭeuh thei dawn tain a lang. Heng zawng zawngah hian CYMA hian Sesih khua hi a han thlamuan zo meuh ang maw? Social media-ah lang chuai chuai mahsela Sesih khawtlangah thlamuanna tak tak a thlen chuan si loh chuan dar ri mai mai a ni thei ang em le? Sexual harrasment hi heti ngawta tih rem a, tih daih theih em ni ang le? 

Force leh Civil inkar a thil thleng ang pawhin a sawi theih bawk ang a, kan khawtual hmei­chhiate hi sipai mite lakah hian thla­muang takin an awm theih phah ang maw? Nu leh pa chan chang an intih ro ro chuan CYMA hi Sesih khuaah hian kal ngei sela a theih ang anga sum leh pai te nena victim hi han thlamuan sela a dik zawk ang em? 

Heti ngawta Assam Riffle-te kan Mizo hmeichhiate chungah an chetna kan ngaihzam chuan phung velh an sawi ang maiin a zual phah zawk te hi kei ka hlau hlel lo e a.