2020 Y.M.A KUMPUAN: ZIRNA UAR KUM HI

Y.M.A hi awm ta lo se, kan Zoram khawtlang nun hi chu a hrehawm hle awm e. He lam hi chu thil chiang sa, sawi ngai rih loah dah ila. Kum 1996 kha Y.M.A-in Mizoram puma ‘Zirna uar’ tih kumpuana a neih tawh kha a ni a. Khang hunlai khan zirna kawngah Y.M.A chuan a thawh hlawk hle a nih kha. 

Kum 2020 Y.M.A kum­puan ‘Zirna uar kum’ hi chu khawvel hripui avangin ṭan han lak ngaihna vak a awm lo a, a pawi takzet a ni. Nakumah chuan he hri hi a lo ziaawm tawh turah dah ta ila. Kumin hi ‘Zirna uar kum’ ni mai se, nakum chu a zir kumah kan puang ve ngawt teh ang. 

India ram Prime Minister chuan kumin 2020 aṭang hian National Education Policy 2020 chu a rawn tlangaupui ve leh ta luah mai bawk a. Y.M.A kum puan chu India Edu. Policy-in  a rawn rual ta tlat mai hi ‘Y.M.A changrel a sual ngai lo’ tih chu kan hmuh theih loh aṭangin a rawn dik leh ta a ni. 

Chu mai a ni lo, kan Mizo­ram Education Minister chuan, School ṭan hun dar 8 am kha dar 9 am-ah a rawn sawn chho ta bawk a. Tin, Elementary School aṭanga Class-X chin hnuai lamah Exam System introduce a tum thu pawh sawi a ni bawk. Kei chuan, hei hi za-ah za ka thlawp tlat a ni.

Kan Zoram kumpuan, ‘Zirna uar kum 2020’ denchhen hian thil pakhat tih ngei ngei tur rawt duh ka nei a. Chu chu, Middle School-ah emaw High School-ah hian ‘Pawisa vawn dan - Account mantenance’ hi Bung 1 (Chapter pakhat)-ah zir tel ngei turin Mathematics buah dah ni rawh se, tih hi na (uar) takin ka rawt a ni. Education chuan- “All round Development of Human” kha a tum a ni. 

Kam ramah hian Y.M.A, M.U.P, M.H.I.P, Kohhran, V.C, G.S.A leh a dangte hi pawl neia mahnia inkhung hrang vek kan ni. Mimal sumdawnna, mimal in sak, Contract hna thawhnaah pawh Account book ziak dan dika ziak thlap zel chuan mimal leh pawlah kan sum hman, neih leh thawh dan awlsam takin a hriat zung zung theih a. A ṭangkaiin, thil felhlel leh dik lo a awm mawh bik hle bawk. 

Pawla inngeih lohna tam ber chu sum chungchanga neuh neuh awm ṭhin hi a ni. Society-a inngeih lohna tam ber pawh sum bawk a ni. Thingtlangah pawh, khawpuiah pawh, Association tam zawkte’n Account bu an ziah dan a dik lo tam zawk ang. Sumah rinawm a har tehlul nen, a dika ziak dan thiam loh lehnghal phei chuan a va han dik har dawn em! Date 15/09/2020 zana L.P.S aṭanga V.C-te khaw hrang hranga an sum vawn a dik loh thu leh sum lam sawi selna a tam thu kan lo hria a. Kan vantlang inṭawm sum hi fimkhur a, a kawl dan chen kan zir hi kan tir tur ni awm a ni. 

Entirnan: Ar 3-in Rs. 3600/- man se Ar 7 man chu eng zat nge? tih hi Rule of three zir lo tan chuan han hisap ngial a ngai ang. A dan lo zir tawh chuan 3600/3 x 7 aṭanga han chhut chuan minute 1 chhung lek pawhin a chhut zo em em ang. 

Chuti ang bawkin Account bua a lut lam ziak a, a chhuak lam ziak a, a closed ve mai dan kha a har lo. Tin, Voucher/ Cash memo no. indawt chu file tag-a indawta dah mai khan, simple tak si hian General Account hi vawn tur a ni. 

A pahnihnaah chuan Ledger Account siam dan hi zir tel ni thei bawk se. Kan sum neih dan emaw hman dan aṭanga sum vawn dan hi hman ṭel dan leh duh dan a awm theih avangin hriat zau a ṭha hrim hrim. Mi tam tak hi sum vawn dan thiam si loin, thiam awma awm ve mai mai, sawrkar hna lian thawk pawh tam tak an awm ang. 1982 kuma Presbyterian Kohhranin -‘Corruption do Kum’ a puan  khan kan Zoram pum corrupt-na pakhat pawl sum vawn thiam loh vanga kan corrupt-na a ni tih hre rengin kan Kohhranah chuan Accuntancy kan training vak mai a, chu chu vawiin ni thleng hian mi tam takin kan la hmang ṭangkai ta reng a ni. 

Tunlai V.C leh L.C velah phei chuan Account vawn thiam, vawn dik, ziak thiam chu a ṭul leh zual ta a ni. Ṭhenkhat chuan pawlah hian Leader/ Chairman/President/ Secretary-te an pawimawh berah an ngai a. Finance lama Secretary leh Treasurer hi an pawimawh zawk loh pawhin anmahni zawnah chuan an pawimawh ṭheuh a ni - chu vanga post pawh awm a ni. Pawla hotu ṭhenkhat hian Finance lamte namnulin an sum kawl turte an kawl sak mai mai hi thil dik a ni lo. 

Tin, Pawl sum hi kum 1-ah vawi 2 emaw vawi 1 chu ngei ngeia audit tur a ni. Auditor-ah chuan pawl pawisa hman dan hria O.B zinga mi leh pawl member nise, pawn lam mi ni thei se a ṭha. Tin, Committee-ah pawl sum kawl leh hman report ngei ngei ṭhin bawk ni se. Pawl nung tak ni tur chuan kan sum neih ang ang member-te’n an hriat ve zel hian neuh neuh leh se se hi pawlah a awm thei lo. Chairman emaw pawla mimal sum inpuk tir hi pawl kehna a ni duh, a rulh theih loh phei chuan sawi a nuam tawh ṭhin lo a, pawl chak lohna a ni. 

Kan Zoram hi Kristian ram, Mizote Mizona ramah hian Vairam anga tual thattu khai hlum ve lohna, mi panga thattu an man pawh, convict ta tia kan hriat lar lohna, eiru lian pui puite pawh in chhawng leh an hlawh phu loa khawsa sangte hrem lohna ramah hian pawlah tal hi chuan i fimkhurin i rinawm hram hram ang u. 

Y.M.A Kum puan, ‘Zirna uar kum 2020’ hian Middle School emaw High School level-a an chhiarkawp buah Account bu vawn dan hi Bung khat (Chapter 1) tal telh hi hring chhuak ve teh se.