‘Hektu’ tih tur an ni dawn em ni?

Tunlai Mizoram social media hrang hrangah Pu Lal­duhoma MLA aṭanga ban tura Speaker hnena thu thlentute chu 'Hektu' an ni tiin a darh nasa mai a. 

Mi ṭhenkhat chuan an bialtu MLA te chu midang heltu mai an ni ta tiin an ngaihdan a nih loh thu te an tlang au pui tak luai luai a, ṭhenkhatin Kohhran Upa awm vete pawh "Kohhran Upa ve si mi a hek," tiin an sawisel zui bawk a. Heti em em lo deuh hian i sawi ang u hmiang. 

Heng MLA 12-te hi MLA vawi khat nihna (first timer MLA) vek an han ni phawt mai a, anmahnia thuneihna nei sang vak lo ti pawhin sawi ila kan sawi sual tam pui awm love. 

Tichuan heng mite hian anmahni thu angin Pu Lalduhoma hi Speaker hnenah khan, "Dan a bawh­chhiat avangin MLA nihna hi paih rawh se," tiin an va thlen lovang tih hi chu 'ka kutphah' tih tlukin ka chiang a ni. 

Pu Duhoma chu anni MLA an nih hma daiha MLA lo ni tawh, MP pawh lo ni tawh a nih bakah 2018 MLA inthlan ah phei chuan bial pahniha tling kawp thei ngat a ni; MLA thar zawk tana MLA aṭanga paih tura va hek hi thil ngamawm a ni lovang. 

Thil mak ve leh mai mai chu a hektu hi MLA vawi khatna an ni tih kan sawi tawh a, MLA vawi khatna ve tho hi Transport Minister, Sports Minister leh Deputy Chief Whip an awm a; School Education Minister hi MNF sorkar laia bye election ah lo kha chuan a vawi khat tlinna a ni ve leh bawk - heng mite hi chu Speaker hnena Pu Duhoma ban tura thu thlentu zingah khan an lang ve miah lo. Mi 12 te hi sorkar lama an nihna a pawimawh vak loh (MLA pawimawh lo chu an awm thei lo nachungin) vangin Speaker hnena lehkha thehluttu-ah hian an ṭantir niin a lang a ni. 

Hetia ngaihtuah mai chuan patling an ni ve a, an duh a nih chuan anmahni thuin Speaker-ah hian lehkha va theh lut mai se, 12 nih kher hi a ṭul lova, thehluttu bik nih hi an mualpho hlauh vangin 12 in Pu Duhoma ban tura lehkha an thehlut hi a ho angreng khawp mai. 

MNF Legislature Party-a Leader emaw Secretary-in emaw thehlut ta se a mawi zawk dawn tehlul nen first timer zinga a ṭhi beh lo thlan chhuah 12 te hmingin Pu Duhoma ban tura tihna lehkha a lut ta a ni. 

Heng mi 12 te hi hektu ni lovin lehkha kengtu leh party aiawha hming ziaktu ang lek an ni zawk lo maw? 'Hektu' tia tih mualpho kher hi ka lainat tlat a ni.