Eng vangin nge sakhaw pu te an au chhuah?
Bible kan en chuan thuneitute leh ramin a bawhchhiat apianga rawn lang ve ziah ṭhin an awm a, chu chu Zawlneite an ni. Anmahni duh thua rawn lang an ni lo va, tute emawin 'ti rawh' an tih avanga rawn lang an ni hek lo. Pathianin a tirh vanga lo lang ve ziah ṭhin an ni zawk. Mihring an nih ve avangin an hrehin, hlauhna leh zamna pawh an nei. Mahse, a tirtu, chunglam avangin loh theih lohvin, pehhel awm miah lovin, tlang takin thu an sawi ta ṭhin a ni. A tawrh pawh an tuar ṭhin reng a. Pathian Zawlneiten ram siam ṭhatna tura an au lai hian, zawlnei ni ve tho ṭhenkhat chuan an thusawi letling chiahin, thu thlum zawngin thu an lo sawi ve thung ṭhin. Chung mite chu zawlnei derte an ni. An hlawkna tur leh tlaktlum an tum avangin roreltute tih lawm nan chutiang chuan thu an sawi a, thu dik an ṭan ngam lo. Zawlnei Jeremia Bu kan en chuan, "Ka mite hliamte chu, ngaihsam takin, "A ṭha a lawm, a ṭha a lawm," tiin an thawi a, a ṭha hauh si lo va," (6:14), tih thu kan hmu a. Thil ṭha lo, bawhchhiatna pawh sawi mawi lui tlat an awm thu kan hmu.
Pathian thu laipui chu Lal Isua hi a ni. A hmangaihna te, a thihna leh thawhlehna thute hi Pathian thu laipui chu a ni. Chu aia chanchin ṭha kaihhnawih dang tuipui zawk, uar zawk an nih a rem lo a ni. Zawlnei suakte anga mahni hlawkna ngaihtuah a, roreltute nena sam inphiar zawm hi awm ve theih a ni. Chutiang lak ata chu sakhaw rawngbawltute, a bik takin puithiamte phei chu an fihlim tur a ni. Pathian Zawlnei hna (Prophetic role) hi an thawk ngam tur a ni zawk.
Politician te, kamding te, sumdawng te, contractor te leh hna hrang hrang thawktute hi sakhua/Kohhran mite kan ni. Chuti chunga kan ram hi eng vanga damlo leh rorelna thua duh khawp lo reng nge kan nih? Kohhran/ Sakhaw zirtirna chuan a mipuite a hmin zo lo tihna a ni em? Nge a mite a zirtir lo? Chuti a nih chuan Sakhua/Kohhran rawngbawltute thiam loh a nih nachen a awm ang a, an inenfiah a ṭul hle ang. Tin, mipuite hian kan hlawkna tur, kan lalna tur, sum hmuhna tur leh duhzawng thil te chu nep phal lovin, Kohhran/rawngbawltute thusawi chu kan bengkhawn duh lo tlat zawk em ni? Kan duh china rek bung a, Kohhran hi lanmawi nan chauh kan hmang zawk a nih chuan Kohhran leh sakhaw pute hi kan dem thei lo ang.
Tunlai kan ramah pawh ram rorelna thuah te, vantlang nun dan thuah te Pulpit tin leh platform hrang hrang aṭanga thuhriltuten ram an vei a, an au chhuak chuah chuah a nih chuan Chunglam hian ṭul tiin a autir a ni mai em? Roreltu ṭhaten ro an rel a, mipuiten Lalpa lam an hawi laiin Thuthlung Hlui zawlneite kha au chhuak turin an rawn lang ngai lo. Bawhchhiatna a nasat chinah an rawn lang nghal vat a; na takin, uar takin ram dam nan an rawn au chhuak ṭhin.
Rawngbawltute an au chuah chuah laia roreltute hi, inenfiaha an sim loh chuan hnawlin an awm zui fo ṭhin. Chu chuan Zawlneite/ Puithiam te au aw chu Pathian aṭanga chhuak a ni ang tih a tirinawm.
-Johny zosangliana