NH 54 ZAUH TUR LEH THLARAU MITE HI

Tun lai chu NH 54 zauh tur hian titi a ti tam hle. Compensation pek tur ang pawh an tifel thawkhat ta a, contractor lam pawhin hna an ṭan ta. Hna an thawh ṭan tawhna hmun lamah chuan zin kal vel pawh a ti khaihlak a, kawng laih avanga darkar chanve dawn din chang te a awm ta fo mai. 

Hetiang a nih mek lai hian kan thlarau mite zingah he kawngpui zauh tur hi indona kawngpui tur nia sawi tawk lah bo lo. China ral lo lian mai tur nia lo sawi tawk lah bo lo. Kawngpui zaute chu ram hmasawnna atana thil pawimawh hmasa ber a ni sia. 

Jet Fighter ṭum theihna tura ruahman anga sawi a, khawilai kawngpuiah pawh ṭum mai thei tura sorkar laipui hmalakna anga sawi tawk lah kan tam.Khawchhak lungpui lo lumin zalenna min pek mai ring tawk lah kan tam bawk. Tihlaiin khawvel tawpna hnai ta viau anga lo sawi duh tawk lah bo lo. Kan thlarau mitte hi a ralṭi zawng leh a ralkhel zawnga kal tawk kan tam viau mai. 

Pathian ṭan chhana sawi an nih miau avang hian kan ring emaw ring lo emaw, a mi tam ber hi chuan hnial enah kan en lo a. Awmngaihna hriat pawh a har fut mai! India sorkar hian kan ram hmasawnna tur a ngaihtuahin, kawng ṭha kan neih vena turin hma a la a ni a. Japan company-te ṭanpuinain kawng min sialsak dawn ni berin a lang a, lawm tur kan nih hmel zawk. 

Khawi ram pawhin hmasawnna kawng a zawh dawn chuan a tul hmasa ber chu kalkawng ṭha hi a ni a. Tunah pawh kalkawng ṭha kan neih loh avangin harsatna chhete pawh a lo thlen chuan a ram pumin kan buai ṭhin a nih hi! 

A lan danah chuan he kawngpui laih turin a sut chhiat turte chu compensation duh­awm tak pek vek an ni. A lungawi vak lote pawh hi kan ram leh kan in phu tawk lam ngaihtuah lova, ṭhenawm khawvengte lak zat kan phak loh avanga lungawi lo kan tam ber awm e. 

Pawisa fai a makta­duaih tel la hmu ngai lovin kan hmu fur ang a, vaibelchhe tel la hmu ngai lovin kan hmu fur bawk ang. Chuvangin, han lungawi lohna vak tur a awm love. He kawng laih hi kan ram hmasawnna tur a ni e. 

China-in min tizalen mai tur niawm taka an sawi thawi fo te hi chu a rinawm vak lo. A reng reng thuah China hi enga tinge kan la awn deuh tlat reng le? Kristian ram kan inti a, thlarau mi intite pawhin Pathian pawlna aṭanga hmuh niawm tak takin an sawi a, China hian min awp ngat se tun ang hian kan zalen ngut ang emaw chu le? China awpna hnuaiah chuan zalen takin kan sakhaw thil kan ti thei ngut ang emaw chu le? 

Kan thlarau mite pawh hian uluk deuh zawkin ngaihtuahna hmang ta ula, thlarau kan dawnah pawh Pathian rawn chungin, a malsawm tlak deuh zawngin leh kan thaw­ven deuhna tur lam hawiin zawlthupuan i tum teh ang u!