Hall lian mamawh Aizawl khawpui
Aizawl khawpui a hall lar ber chu Vanapa Hall a ni a, mi 1000 pawh an leng lo. State capital ni ve si infrastructure nei chhe tak khawpui kan ni hi chu kan ram hruaitu ni tawhte vision lo tawizia a ti lang.
Vanapa Hall awmna hi a hmun a laili ṭha a, an sak hun lai chuan building lian ṭha leh changkang tak a nih laiin, tunah chuan building a zawnga sak ṭhat chakawm ber a ni. Vanapa Hall hi ṭhiat ila a hmunah hian building thar sa dawn ila, AMC dan avangin a size chu a té tawh hle ang a, mahse chuti chung chung chuan ṭhiah thuai thuai chi a ni.
Aizawlah hian R Dengthuama Hall a awm leh a, hei chu multipurpose hall niin sports thilah an hmang tam ber. Sakhaw thilah pawh an hmang tawh a, ka hriat sual loh chuan politics-ah pawh an hmang tawh BJP hoin, he hall hi chu khawpui daia awm a ni. Hall lian tak a ni chung hian mipuiin an hmanna tur ber chu sports lam a ni a, kan sawi tum ang a ni lo.
Hotel lian kan nei si lo, kan hotel lian deuhte banquet hall neih hi a la te tham si a, mi 500 kalkhawmna tur hall hi kan nei mang lo. Dawrpui Multipurpose Hall hi tun hnaia sak ni si an dawn tawi lua a, a ṭangkai tawk lo. Synod Conference Hall hi an tih len hnu hian a ziaawm ve deuh nain a chung a hniam tawh avangin a ṭha tawk lo a, Aijal Club building lah hi te reuh te tein an phel darha hman kum lawka an sak ni si, an ngaihtuahna a lo te lutuk kha uiawm tak a ni. Aijal Club hmunah hian building ṭha zawk banquet hall lian zâwk awm sak ni se ṭha tur. Mimal siam mi 100 leng lek hall pawh a rak hle tunlai Aizawlah hian.
Sorkar sum tam takin badminton khelh theihna Hall kan sa thluaha a hmang ṭangkaitu population hi chhût ila an tlema an tlem zia chu, kan sorkar sum hmanna leh badminton khel ṭhin hi a inbûk tawk lo lulai. Football artificial grass phah vak vak pawh hi a ṭul lem tawh lo, khawpui pakhat convention centre ṭha pawh nei lo kan ni.
Kohhran Hall hi phal zau se, hmun ṭha ber berah building ṭha ber ber hmangin kohhran hall din a ni a, Sunday ah bak hman mang lohin kan dah a, thil uiawm tak a ni. Aizawl hian hall lian leh changtlung, air conditioner awm thlap, sound treatment nena thuam, sound system ṭha, light system ṭha, ei leh in tih theihna ṭha nei bawk a mamawh tehreng nen tunah hian kan la nei lo, kum 2023 a ni tawh si a.
- Reuben Zodina Chhakchhuak