KAN SPORTS CIRCLE ZAUH A HUN TAWH E

National Games 2022 leh NE Olympic Games 2022 result enin kan sports Circle zauh a hun tawh hle. Phullem phah, khelmual chhawng leh Sports items pahnih khat ringawt buaipui lova awmze mumal tak neia sports kan kalpui a hun tawh.

NE Olympic Games 2022 result enin Mizoram chu 6-na niin kan hnuaia awm turah ngaih Arunachal Pradesh chu pathumna an ni phak! Manipur leh Assam te chu kan thlau em em bawk. National Games 2022 ah Mizoram in Gold 1, Silver 1 leh Bronze 2 lain a tawp lam aṭanga chhiarin 5-na kan ni. Boxing kan uar kan tuipui hle. India rama Boxing championship ngaihhlut ber leh Olympic kalkawng pawimawh tak, Elite Men’s National Boxing Championship 2022-ah light Wt. ah Zorammuana’n silver lain kan nil ṭep a ni ber. ‘Profesional fight’ kan ti hming ropui tak tak kan vuah kur ngei nguai a, Website rintlak leh India ram chanchinbu lian a luah phak si lo. Hetiang hi kan dinhmun a nih avangin India ram leh khawvel hriatah kan ṭhalaite chher chhuak turin sports items hrang hrang awmze neia kan kalpui a va hun tawh em!

Tun dinhmunah Mizoten tih tak zet a kan khelh, sawrkar pawhin tih tak zeta a buaipui chu Football leh Boxing a ni. Result duhawm tak tak kan neih tawh, kan nei belh zel turah ngai ila. Football leh Boxing chauh ni lo sport items dangte hi chak zawk leh sum tam zawk nen hma lak ve a hun tawh lo maw? Kan ram sum leh pai dinhmun kan hria, kan neih ang chhun chhunte hi sem zai thiam a hun tawh lo maw?

Eng game hi nge Mizote khelh chi ni ang?

Thal kah (Archery)

Mizote zingah thal kap thiam, kum 10 chhung vel India No. 1 ni thei, Olympic ṭum hnih tel thei leh, Tata Academy zirchhuak leh Coach ni thei hial C. Lalremsanga kan nei. Hetiang khawpa mi hrat khawkheng nei si hian ti nge Mizote zingah a hnung zuitu tun thlengin kan la neih loh? Chu mai a ni lo, Archery khelhna hmunhma ṭha tak ngial pawh tun thlenga kan la neih lo hi a mak a ni. Chak zawk leh nasa zawk a hmalak theih ni se a va duhawm em!

Rit chawi (Weight Lifting) :

Kan hriat angin weight category- a ni. Kan Asian puiten medal an lak fona hi hmunhma ṭha zawk leh Coach tawnhriat nei ṭha zawk nen hma la ila, Jeremy Lalrinnunga hnung zui tur kan nei thuaiin a rinawm. Sum tam tak sengin Open Air Gym pawh kan puitlin thei a, sports department lamah sum tam tak kan pawt peng thei a. Heng kan infiammiten a bika an hman tur Infrusructure ṭha kan pe thei ve thei dawn lo'm ni?

Hockey:

Hockey ground-ah phul lem kan phah chiam lo, Mi nawlpui kan tui lem lo. Mahse nula Pahnih Olympian kan nei hlawl thei. Heng kan nula pahnih Olympic hruai thlengtu leh kawng kawh hmuh thei Hockey hruaitu ṭha kan nei tih erawh a chiang. Players ṭha leh tam zawk an chher chhuah theih nan hmunhma ṭha leh enkawlna ṭha zawk pek theih ni ve se a va ṭha dawn em.

Heng bakah hian pumraw lian leh tharum ngai em em lo, kan Asian puiten medal an lak fona ṭhin game - Gymnastic, Shooting leh Weight Category mila khelh Wrestling lamah te pawh tan lak lehzual a chakawm. Tin, Table Tennis ah pawh kan Asian puiten ro an rel mek. Rawlthar duhawm Table Tennis thiam tak tak nei mek bawk. Kan Indoor stadium kan neih chhun ang angah Badminton kan uar hle. Naupang lam aiin puitling/Officers leh mi lian khel kan tam. Ṭhangtharte hma lam hun atan mumal leh changtlung zawk Academy ṭha neih a chakawm hle bawk.

Tlipna:

“Khelmual ṭha, khelmual ṭha” tia Zoram khawvel hriata lammuala kan au rual kha kum 20 dawn a ni ta. Kan ram dinhmun enin khelmual pangngai tak kan neiah ngai ila. Kan ṭhalaite talent haichhuaka khawvel hriatah pholang tura kan mamawh chu - Sports Complex changtlung tak leh khawvel huapa tawn hriat nei ‘Coach ṭha’ kan mamawh. Tunhnaia sports lama kan sum sen ngaihtuahin kan sports Circle hi a zim mah mah lo maw?

- Caleba Zarzoliana