SCHOLARSHIP I DIL ANG U

Scholarship dil hun a lo thleng leh ta reng mai a, kan buaipui leh sup sup tawh ngei ang. A dil tawhten kan hmuh nia kan lawmzia te kha aw! Mi ṭhenkhat phei chuan Pathian ram zauh nan tiin kohhranah sawma pakhat kan pe bawk ṭhin. A dil theite chu:- sawrkar hna nghet lo thawk te, lo nei mi te, sumdawngte, mi mal leh company-a hna thawkte te, kohhrana hna thawk leh hna dang thawkte an ni a, scho form-ah khan eizawnna (Occupation) leh chhungkaw kum khat pawisa lak luh (Family Annual Income) zat ziahna tur a awm kha. A dil thei chin erawh sawrkarin a ruahman a, kan dil hmain hriat hmasak ngaite i han sawi chiang dawn teh ang.

1. MINORITY SCHOLARSHIP CHI HRANG HRANGTE:

(1) PRE MATRIC SCHOLARSHIP: India rama sakhaw tê zual betu zinga chhungkaw rethei tak tak puala ruahman a ni a, a dil thei chin pawh kum khat chhunga chhungkaw member zawng zawng pawisa thawh chhuah belhkhawmin ` 1,00,000/- (Nuaikhat), a pel tur a ni lo. Chawhrualin thla khatah ` 8,333/-, ni khatah ` 277/- vel la lutte dil tur a ni e. State hrang hrangin dil thei zat tur (quota) nei hrang vekin Mizoram chhunga cheng sakhaw hrang hrang zinga mi Kristian tan zirlai 12,269, Muslim 190, Sikh 4, Buddhist 1198 leh Persi 5 a ni. Quota kan neih zat chiah pek theih kan nih avangin dik taka dil thei chin chauhten i dil ang u. Minority leh Tribal Scholarship-te hi online hmanga dil theih a ni e.

(2) POST MATRIC SCHOLARSHIP: Hei chu class 10 chung lam zawng tana dil theih a ni. Chhungkaw kum khata pawisa lak luhin ` 2,00,000/- (Nuaihnih) a pel tur a ni lo thung a, thla khatah ` 16,666/-, ni khatah ` 555/- vel la lutte dil tur tihna a ni. Hetah hian Mizorama zirlaite’n  quota kan neih chu :- Kristian tan 2,045, Buddhist 200, Muslim 32, Sikh 1 leh Persi 1 a ni.

(3) MERIT CUM MEANS SCHOLARSHIP: Chhungkaw kum khat pawisa lak luhin ` 2,50,000/-(Nuaihnih singnga) a pel tur a ni lo a, thla khatah ` 20,833/-, ni khatah ` 694/- vel la lut chinin an dil thei ang. Zirlaiin a final exam pass hnuhnung berah 50% mark a hmuh phak a ngai.  Hetah pawh hian Mizoram zirlai aṭangin Kristian 245, Muslim 4, Sikh 0, Buddhist 24, Persi 0 tana ruahman a ni. Minority Scholarship-te hi chhungkaw khat aṭangin mi pahnih aia tamin an dawng thei lo thung. 

2. TRIBAL SCHOLARSHIP CHI HNIH:

(1) PRE MATRIC SCHOLARSHIP: India rama hnam tenau zinga zirlai harsa bik, class 9 leh 10 tana ruahman a ni a, sawrkar hna kher ni lo, eng hna pawh thawkin chhungkaw kum khat pawisa lak luh belh khawm chu ` 2,00,000/-(Nuaihnih) a pel tur a ni lo a, chawh ruala thla khatah ` 16,666/-, ni khatah ` 555/- vel la lutte dil tur a ni.  State quota a awm hran lo a, Minority Scholarship ai khan hmuh a awlsam deuh a nia.

(2) POST MATRIC SCHOLARSHIP: Matric pass chin chung lam, zirlai rethei puala India sawrkarin a ruahman a ni a, chhungkuain kum khataa pawisa a lak luh belh khawmin ` 2,50,000/-(Nuai hnih singnga) a pel tur a ni lo thung a, thla khatah ` 20,833/-, ni khatah ` 694/- vel la lutte chin dil tur a ni e. State quota siam a ni lo.

3. POST MATRIC MERIT SCHOLARSHIP hi chu Mizoram sawrkarin a khua leh tui zinga matric pass chin chung lam, lehkha thiam bik puala a ruahman ve liau liau a ni thung a, matric chin chung lam board exam (MBSE, University etc) pass tawh 60% mark hmu tlingte tan dil theih a ni a, income tuk zat a awm ve lo a; amaherawhchu, board tin aṭangin mi 20 vel theuh pek thin a nih avangin a dil zawng zawngin an hmu vek lo a ni.  Online hmanga dil tur a ni lo a, Mizoram Scholarship Board office, Aizawl-ah a dilna form hi lei mai tur a ni e. Tin, India hmarchhak zirlaite harsa bik tan North Eastern Council (NEC) chuan professional cource zirlaite tan Merit Scholarship a siam chu a ngaihven duhten Mizoram Scholarship Board website-ah en mai theihin a awm bawk.

Scholarship dil thei chin kan sawi takte aṭang hian sawrkar hna thawk emaw, thawk lo emaw pawh min huam vek a, chhungkaw pawisa lak luhah hian nu emaw, pa emaw thawhchhuah kher a kawk lo a, chhungkaw member zawng zawng thawhchhuah hrim hrim a huam tawp tih hriat a ṭha. Zirlai pakhatin scholarship chi khat bak a dil theih lo a ni. Scholarship hi kan dil ve dawn chuan kan chhungkaw kum khat pawisa lak luh (Family Annual Income) leh eizawnna (Occupation) chu sawrkar leh Pathian mithmuhah dik takin i ziak ang u. Chhungkaw tam takin dik taka dilin zirna atan ṭangkai em ema kan hman laiin, chhungkaw ṭhenkhat erawh chuan dik lo taka dilin pocket money atan leh zirna ni lo lama hman tura dil ve duh kan awm bawk ṭhin hi chu pawi tak a ni!

Kan ziah dik loh ang chiah hi kan chhungkaw dinhmun ni dawn ta se la chuan hrehawm ti em em tur hi kan tam viau lo’ng maw? Dik lo taka dilte chu scholarship eiruk hmang kan ni tihna a ni mai a, eiruk hmang dangte nen kan inang reng ang. Kohhran huangah leh sikulah pawh inzirtir hi a va hun tawh em! Tin, sawrkar dan bawh chhia leh hrem theih kan ni bawk.

Awlsam taka kan hriat thiam theih nan chuan sawrkar hna nghet thawk hniam bera kan ngaih IV grade (peon, chowkidar, sweeper, etc) hlawh aṭanga chhut paw’n dik taka dil tum tan chuan a dil theih loh a ni. Tin, Minority Scholarship phei hi chu Mizoramin quota kan neih tlat avangin a dawngtu tur dik tak zing aṭanga dawng ve thei ta lo leh a dawng thei tur ni miah lo dawng ve ta si hi kan awm tam hle a ni. A dawng awm ngawih ngawihte'n an dawn loh fo ai chuan malsawmna tam tak dawngtute hian tun aṭang chuan dil tawh lo ngam ila chuan a lawmawm ngawt ang. Bible chuan, ‘Sum ngainat hi sual tinreng bul a ni,’ a ti a, sum tlem te chunga mi rinawm chu sum tam tak chungah pawh a la rinawm ngei ang. Scholarship i dil ang u; mahse, dik takin aw.