Pu Bêla Lehkhabu thlirna

September ni 5-a tlangzarh tur lehkhabu, a tlangzarhnaah eng emaw tal sawi ve se min tih vanga ka tel vena tur chuan, ni 4 zingah ka hnen a lo thleng a. Lo chhiar ngian ngian phawt mai teh tih chu thupek ka dawn a ni. A lehkhabu chu ka han en a, Ka Hmaah Dawhkan I Buatsaih ṭhin tih a ni a, a ziaktu chu Rev.Vanlalbela a ni.

Taksa lam harsatna vangin a tlangzarhnaah chuan ka tel thei ta lo thung a. Thu leh hla sadai ṭhiatin a ziaktu hi 'Pu Bela' ti hlirin ka han sawi ang e. Kohhran lamah te, thuhril lamah te hian, mahni vengah mai lo chuan tu mah hmelhriat ka nei lem lo, Pu Bela erawh hi chu lei berampu ka ngaih san tak zingah a tel a. A lehkhabu chu ka chhiar chak zek zek mai a ni. Ka han chhiar a, ka rin ang chiah a lo ni ta. Ka rin loh lam lam thlengin maw le! A va ngaihnawm teh lul.

Kan han chhiar chho va, ka pa pawl zat chauh, pawl 3 ve bawk a lo ni. Mahse kan Lalpa zirna inah chuan a pawl zat chu sawi ngam har khawpa sang a ni si, tih hi rilruah a lo lang hmasa ber a. Hei hian Pu Bela chu tu nge tih a sawi fiah thei ang.

Mahni chanchin ziahna lehkhabu a ni a. Mahni chanchin ziah hi thu a lai duh lo viau mai a. Mahni ṭhat lohna lai leh dik hlelhna lai sawi ngam hi har tak mai a ni. He lehkhabu hi erawh chu a tak ngun mai a, tak ngun e ti lovin chhiar a zangkhai lawi si. A ziaktu hian lem a chang reng reng lo va, a ṭhatna lai leh a ṭhat lohna lai te, a chet fuhna lai leh a chet chhiatna lai te bakah, a hmel ṭhat vak loh thu leh ngo veh vawh a nih lem loh dan te pawh dim baksak lovin a ram ṭha sawi miah miah mai hi a ngaihnawm a ni.

Ram leh hnam tan tia ramhnuaia a chhuah ve lai te, ramhnuaia an khawsak dan leh Lalpan a rawng bawl tura a koh dan te hi a danglam mai a ni lo, a dangdai a, a ngaihnawm a ni.

Pawl thum chauh zir siin Bible college-a lut tura a sual chhuah dan te hi, mi naran tan chuan vawi za tam beidawnsanna hman tur a nih laiin a sual chhuak tho tho nia maw le. Chu mai a ni lo, ṭawng dang kawi khat pawh hre lo khan Hindi hmanna bible college-a a ti ṭha ber a nih chhoh tak dan te, Mizo ngei, vai 

ṭawnga thu hril thei hmasa a han ni ta mai te hi, Lalpan a hmaa dawhkan a buatsaih ropuizia lantirtu a ni.

Pu Bela nun kawng hi hling leh suarin a khat a ni ber a, a chang phei chuan a helna tura pen khat han penna tur takngial pawh a awm lo. Chuti chung chuan a hmaa dawhkan buatsaih ṭhintu a rinna leh a innghah ngamna lo lang ṭhin hi ringtu zawng zawng tan chuan zirlai pawimawh a ni reng ang. Ama chanchin hi ama ziah ni lo ta se hei ai hian nasa taka sawi uar theih a niin a rinawm a, nimahsela, aman uar si lo leh thup nei vak lova a ziah hi a tak a, a ngaihnawm dan a chiang a, a hlutna a thuk a ni.

Khawvelin ngaihnawm a tih leh a ngaih san chu, mi huaisen, harsatnain a ngam lohte hi an ni a. Pu Bela nuna chona lo lang, Lalpa rin chhana a hneh ṭhin hi a va inchherchhuan chhahin tawn tlang a va huphurhawm ṭhin tak em! Pathian kohna, retheihna, mawlna, zahna, hmuhsitna, rualawhna leh beidawnna a sut tlang zozai hi han chhiar ve teh. I nuna i seng lut thei lo a nih pawhin chona zawng a pe ngei ang che.

He lehkhabu hi i chhiar a, a ziaktu chanchin hi i chhiar chhoh zel chuan, a nun kawng leh a thil tawn zawng zawngah hian Pathian kut i hmu tel zel ang a, chu chuan thlamuanna a pe ve ang che.

Mizorama hnam dangte tana chanchinṭha rawngbawlna lo inṭan dan te hi a va ngaihnawmin a va bengvarthlak em!

Tlangval lu buk chhem chhawm, kekawr tlang arh ve tak maiin hnam dang kara degree a sual chhuah dan te, missionary ni ve tura a chunga thil lo thleng zawng zawng te, zak leh hrilhai taka hnartu dawhkan ngei, a thawktu nia a kil ve leh tak dan te hi hnuk ulh lo chuan chhiar chhuah theih a ni lo.

A rawngbawlna dal theitu natna chi hrang hrang, a hmaa dawhkan buatsaih 

ṭhintuin a tihdam dan te hi a va ropui em! Natna ṭihbaiawm bera kan ngaih cancer meuh pawhin amaha awm chu a lo ngam hauh lo tih i chhiar thlen chuan, a hmaa dawhkan buatsaih ṭhintu ropuizia chu chiang takin i hmu tawh ang.

Hetiang khawpa Lalpa rawng bawla a hun a hman zawh lai hian, kohhran bial vawngtu pastor hna erawh chu a pension dawn kumah chiah a thawk ve hman a. Lalpan a kawng a buatsaihsak hi a makin a ropui a ni. 

Keifang naupang, pawl thum pass khan USA-ah ṭum khat mai ni lo rawng a bawl a nih chu. A hmaa dawhkan buatsaih ṭhintu ropuina hi phat rual a ni lo. A kâwngah Lalpan a hling a, A duh lam lamah a hnuk kual a, a chhiahhlawh thu awih chu Lalpan a chawi sang a ni.

Sawi kim sen a ni lo va, a lehkhabu hi ` 250/- man, phek 350 vel a ni a. Synod Bookroom-ah lei tur a awm e. I chhiar ve atan ka duhsak em em che a ni.