Social media hman thiam a ngai

Intlanpui kum a ni a, inthlan hmain hun a tam tàwk lo – a hun tur tak puan la ni chiah lo mah se politics-in a chiah chinte chu a zunah a uai hneh leh tawh hle a, party tin maiin ram lak tumin an hmanhlel – party thuneitu lamin chhun leh zan chawl loin hmalak dan tur an ngaihtuah a, an thil tih leh hmathlirte chu media hmanga tarlan leh puanzar a ni leh ṭhin.

Khawvel a inher zel a, tunlaiah chuan social media kan hmang nasa, nghawng pawh a nei na tih kan hre ṭheuh awm e. A nghawng a nat avang hian party hrang hrangin hman ṭangkai an tum nasa a, mawi leh mawi lo pawh ngaihtuah phak tawh loin kan bawh ruih ruih mai tih a chiang hle.

Party tinin social media khawihtu leh fawng chelhtu an nei a, mahni ṭhahnem ngaihna hmanga lo bei ve lawp lawp an awm bawk. Heng mite hi tam leh daihzai, hawl kual hnem leh thil pu darh chak an ni hialin a hriat a, an thu leh hla erawhin mi rin a hlawh lem lo thung a, a tawi zawnga sawi chuan 'Mahni Inbawl' mai an ni.

Ni tin maia social media kaltlang party dangte bei ngar ngar, hna bera neite pawh an awm, heng mite hian social media lama an hnathawh kha an hna leh eizawnna ber a nih chuan an demawm hran lo, hna thawh leh thiam thil a inang miau lo a, tunlai milin ei an zawng ve a ni mai.

Mahse, party hruaitute hian an ngaihtuah chian a ngai, thu mawlmang leh dawt muhlum lutuk sawi fo maite hian mi dang rilru an hneh miah lo a, hun rei lote hnua an dàwt sawi rawn lang chhuak leh mai ṭhinte hian an party boruak a vaw hniamin, mi rin hlawh lohna mai a ni tih an hriatthiam a ngai a, mahni sawi duh loh sawi nan an hmang a nih ngat phei chuan a vuak let pawh an dawn ve ngam a ngai dawn – mi dangin an dêk hunah an zia an thup thei ṭhin lo.

"Chumite party chu an hniam deuh, chumite chu an káng hret, chumi khami chu a tlin hmel ka hle mai," tih vela kan la insawi lungawi kual vel a nih chuan kan ball chhaih hi a hniam lutuk, mipui ngaihdan lak kawngah pawh mahni leh mahni kan inbum duh a, kan party mi leh sa puite kan bum bakah hotute kan bum tel, vote a keng tel si lo – kar khat lek pawh a liam hmaa zahna thlentu mai a ni leh ṭhin.

Party hrang hrangin inthlan auhla tur an buaipui a, an hmalak tum dan tur an ruahman mek. Mipuite pawhin social media kaltlang hian kan ramin a mamawh leh siam ṭhat ngai laite sawi ila, ngaidan leh ruahmanna ṭha tak kan nei a nih ngat phei chuan, party thuneitu lam pawhin thurawn lak nan an hmang hreh hauh lo ang tih a chiang.

Mi dang kan sawisel duh a nih pawhin 'Dawt' tel lo se, an ṭhat tawk lohna lai sawia khalh ngil chu thil ṭha leh zahawm a ni. Mahse, a tuk lawka lang leh mai tur 'Dawt' hmanga kan inawmtlei a nih chuan, rampum hmuha mahni mawng hlimna mai a ni.

Politician-te hi mihring ve tho an ni a, a ṭhenkhat phei chu mipui lamin kan duh leh beisei vanga lut, kum naupang leh ṭhalai kan duh avangin sawm luhte an ni hlawm. Patling inhmuam up leh puithu un - uchuak anga nung tura beiseite hi a mawlthlak. Mi un leh up te hian rei lutuk min kaihruai tawh, min thlenpui chin chu kan hria a, an hnung zuia inhmuan up kher kha an ba lo. Chutihrualin, ram roreltu ni tur erawh chuan zahawm taka an nun erawh a ngai ve bawk.

An hnathawh leh eizawn ṭhinna hmasa hmanga beihte hi a fuh ber lem lo. Tun hma deuh khan minister pakhat chuan, party pakhat zawmtu chu 'ball pet mai mai se' ti zawngin a sawi tawh. A sawitu ngei pawh zirtirtu ni chung sia naupang zirtir ngai lo a ni tho a, a awmna party lah chu independent sual chung chunga state-a lungawi, hnam party ni chunga hnam dang vulh liantu an ni bawk si. Chuvangin, kan ram hruaitute pawh an thusawi turah an fimkhur zual a ngai hle.

- Lala, Khobung