Aizawl kan lài chim em ni?

Tunlai chu Aizawla Vaivakawn veng Zohnuai chu lei min avangin an buai hle tih kan hre ṭheuh awm e, he lei min ni lo hian Aizawl leh a chhehvela lei min ṭhenkhat hi i han bih chiang dâwn chhin teh ang. Kan laih avanga min a nih rin tur a awm tam hle.

Congress sorkar hun lai tawh khan Rangvamualah lei min kumhlun a awm a, a state buaiin kan buai ṭhin. A hre chiangte chuan Rangvamual lei min ṭhin kha a bul ṭanna chu lei an laih vang an ti. Khu hmun laihna atan kan insen nasatzia kan la hria em? tih hi ka zawhna hmasa ber. Ka zawhna pahnih lehna chu tuin nge leivung paihna senso tum? Sorkar pawisa a ni leh si em le?

Bawngkawnah lei a min vak khan mimal lei laih vang tho niin ka hria a, lei laih permit dil a ṭul hma a nih leh nih loh ka hre lo. Lei an lai min a ni ber mai kha kha chu. AMC lam chan a nih leh nih loh phei chu ka hre lo. Lei an laih avanga chim a nih chuan a lei lai chimtu hian a lei vung paihna man kha a chawi em? tih hi ka ngaihtuah ta daih a ni. Bawngkawn kawngpui pawimawh ber kha a chim rup a, a chim chhan kha kan hriat avangin lei vung paih man kha sorkarin a tum chuan a dik thei lo.

Vaivakawn lama lei min hi a bul ṭan dan kan hre lo na'ngin nakin zela kan fimkhur tlanna atan chuan chhui zui ve hrim hrim pawh a ṭha ang, thil a fel fai tih a lanna turin. Mizoramah hian a bikin khawpui Aizawlah hian lei hi kan lai min kan lai min a nih chuan kan ramah hian kan la inchhuahchhàl palh ang tih a hlauhawm hle a ni. Aizawl hi kan khawpui a ni a, a enkawltu tur AMC kan nei bawk a, lei laih pawh hi uluk deuh se a ṭha ang. AMC pawh tun aia an ṭan zual a ngai a ni.

- Marama, Kulikawn