Mau thawm a reh; Au thawm a reh
Nikum, kum 2022 September thla thleng khan Mizoram sorkar hian mau leh rua atan cheng nuai hlir 2359 a seng tawh, tiin Assembly House-a zawhna Pu Zoramthanga chuan a chhang. Kum 2023 inthlan a lo hnai ta a, Mau thawm a reh a, Mau chungchang au thawm a reh hmiah tawh.
Kum 2019 leh 2022 zawhna zawh hun chhunga Mizoram sorkar sum hmanna hu a tam lulai hle a ni. Zawhna zawttute hi Congress Treasurer aṭanga bang ta Pu Zodintluanga bakah, ZPM member (ZPM party MLA an ni lo a, Pu Lalduhoma anga MNF MLA lamin an hek ve loh an ni thung) Pu VL Zaithanzama leh Pu Vanlalhlana te an ni. MLA pathum hian Mau atan pawisa sen a tam tih an hre si, Mau aṭanga sum lakluh a awm an hre si lo, Mizoram pawisa Mizote ta budget aṭangin an hmang hiau hiau tih an hre si, Assembly House lamah pawisa hman tawh zat an zawt a, nuai 2000 chuang a lo ni hem mai. A tam dan i hriat duh chuan mi 2000 kokhawm la Rs 1,00,000 pe pawp pawp la, mi 359 hnena Rs 1,00,000 pek tur i la nei tihna a nih chu. Hei hi mau mana pek ral a ni. A hlawkna hmuh a la awm lo.
He mau thawm hi a reh ta vawng vawng a, tu mahin an sawi duh tawh lo. Pu Robert Romawia Royte hi MNF Minister zinga media lama kan hmuh hnem ber a ni a, Mau hi a sawi pawh ka la hre lo. Pu Lalruatkima hi Information Department changtu a ni a, mau a sawi rik pawh ka la hre lo. Pu Tawnluia Deputy Chief Minister pawh hian a la sawi lo a nih hmel. Dr R Lalthangliana pawh hi ṭawngkam thiam a ni a, mau a la sawi ka hre lo. Pu Lalchhandama Ralte pawh hian mau a sawi rik ka la hre lo. Chief Minister Adviser te pawh hian an la sawi lo. Pu Lalduhoma hek duh khawpa MLA loh hlau - MNF MLA 12 zingah khan mau sawi mawi pawh ka la hre lo.
Mi dang ngawih bopui hmak Mau atana senso heti zat a nih chuan a va mak leh lawi si ve, Horticulture Department hian mau hi an buaipui tak tak a nih chuan thawm an va nei lo ve. Kum 2023 kum chawhnu a ni a, kan inthlang dawn hnai a, mau thawm a reh hmak, au thawm a reh hmak, Chief Minister hian mau a la sawi dawn em? tih hi ṭhalaite hian kan hre chak a ni.
- MS Dawngliana