Kawngpui tlo ṭha, a hun taka siam ṭhat kan mamawh ta e

Kan ram leilung awm dan, sik leh sa inthlakdan tlangpui chu kan hre vek awm e. Hmasawnna hnathawh kawngah pawh kan mithiam zawk leh sawrkar lama mawhphurhna neite pawhin eng emaw chen chu, inhmakhua lawk dan turah ngaihtuahna an seng turah ngai ta ila. Hetiang a nih mek lai hian kan inkalpawhna kawngpui kan neihte hi, kum khat chhung daiha ṭha hi kan nei thei mang lo hi chu a manganthlak lam deuh a ni.

Tun hnaiah kan hria a, kan ei leh bar chak lakluhna kawng pawimawh tak, Vairengte to Sairang inkar kawng chu tunah hian a chhe leh ta em em mai a, he thilah hian a mawhphurhtu lam hian mawhpuh tur zawn mai hi a awl a. Amaherawhchu, hetiang ringawt maia kan kal hi chu a fel tawh lo a, kum heti zat State sawrkar inrelbawlna pawh nei ve tawhin kan kawngpui pawimawh tak pawh kum khat daih loa siam a ni ringawt mai hi chu thil nih dan tur pawh hi a ni tawh lo a ni.

A chhiat hun leh fur ruahtui tam laia hnathawh emaw siam ṭhat hian awmzia a nei teh chiamin a rinawm loh. A chhiat tak tak hmaa siam mai kha eng nge maw a harsatna em em ni dawn ni? PWD thawktu Engineer-ten kan kawngpui an enkawlnaah hian thawk ṭha tawk an inti nge, dawhkan lama chinfela mahni pocket lama sum lut lai kha kan duhtawk mai em ni? A hmuna vil uluk emaw, a thawktute thawh laia uluk taka enfiah lam hi kan ti ṭha tawk lo nge ni, kan kawngpuite tlo ṭha taka siam awm thei reng reng lo mai hi a pawi takzet a ni.

Khurel chhiatna avangin kan inkalpawhnate a ping ṭhin a, chutiang a thlen thulha kalkawng dang helna siam kawngah pawh ngaihtuahna thar siam a hun takzet bawk. Tunah pawh kan Highway kawngpui Vaivakawna mi chu a chhak lam min avangin lirthei tlan thei loin a khat tawkin a ping fo mai a. Chumi hèlna tura kawng Sakawrtuichhun leh PTC inkar chu tun dinhmunah hian a chhe em em mai si a, siam ṭhat mek a ni nain hei pawh kan sik leh sa thlen hun kan hre reng a. Tun ang fur khawchhiat laia hna thawh an ni leh tlat te, tin a chhiat fe hnua siam ṭhat tlatte khu eng emaw a awmzia ni dawn le? Hetiang lo deuh hian a enkawltu Deptt. leh mawphurtute hian kan kawngpui hi kan enkawl thei tawh lo maw, kawngpui tlo ṭha, a hun taka siam ṭhat hi he ram hian a mamawh tawh takzet a ni.

Mipui lamin harsatna kan tawh hrep hnua sawrkar lam demnate a chhuak a, kawngpui siam ṭhaa tute pawlte emaw hnatlanga an thawhchhuah hunah kawngpui chhiat chhan chhuanlam ho té te siam a, an hnatlanna tur thingpui inna deptt. lamin tumsak ang chite hi thil zahthlak mualphona tàwp a ni tihte hi hre thar ila a ṭha mang e. A chhiat fe hnua siam ṭhat ai chuan, vil uluka kan sik leh sa inthlak hun kan hriatsa angin, chumi hmaa buaina awm theite mutmawh hnarmawha nei a, kan mawhphurhna a ni tih hriaa a hun taka siam ṭhat emaw thawm ṭhat mai khan harsatna lian zawk thleng tur min pumpelhtir ngei ang.

- Lalnunzira Chawngthu