COVID 19 ENKAWL ANG U LE!

Kan duh vang pawh ni hauh lovin Covid hripui chuan min rawn luhchilh tan a ni ta ber mai. Khawvel ram tin a fangchhuak a tih theih tawh awm e. Engtin nge kan lo inven zel ang tih leh a hrik kai leh veite laka kan fimkhur zel dan tur leh a ṭul huna enkawl dan tur kawng hrang hrang tar lan tun ṭumah hian kan tum dawn a ni. A enkawl danah phei chuan an la âr khawthim dai tlang deuhin khawvel mithiamte pawhin a tihdamna tak an la hmu lova, an la inzir thar zel tih hriat a pawimawh hle bawk ang.Vawiina dik nia hriat hi a hnuah a lo dik vek lo thei bawk.

CORONA VIRUS KAN TAKSA A LUH DAN:

Kan sawi fo angin heng natna hrikte hi kan kâ, hnâr leh mit aṭanga lut thei chauh an ni tih kan hria a. Mihring taksa chhung ril timur (cell) chhunga lut zel tur hian luh theihna bik an nei a. Chu an luh theihna bik chu Angiotensin Converting Enzyme 2 (ACE2) a ni. Heng hi natna hrik virus lo luhna kawngkhar (receptors)an tih chu an ni.

NATNA BENVAWN VEI LEH ACE 2 RECEPTORS : 

Mithiamten kum 2000 vela ACE2 hi an hmuhchhuah a ni a. Mihring timûr (cell) tuamtu kâwrah hian an awm ve a. An hnathawh chu taksa hliam tur vên leh siamṭhat (repair) te, BP tisâng thei tur enzyme dang hnathawh a tawk chauha lo ven (RAAS PATHWAYS) etc te an ni. Heng mihring cell vêngtute hi hnâr kawchhûng, ka chhûng, mit (conjunctiva) leh a bîkin chuap chhûng timûr (alveoli) ah hian an tam êm êm a. Heng bakah lungphu, kal, rîl, thisen zâm leh thluakah te an awm bawk. Heng mihring cell vawng himtu turte hi Covid hrik hian luh nân an rawn hmang ta hlauh a ni. Kawngkhar a lo tam poh leh an lut tamin, an tichhe nasa dawn a ni. Coronavirus hian a kâwr zum fir fer (spike proteins) hi heng receptor ah hian a rawn vit bur chat a. Chumi hnuah a rîl ang tak RNA chauh hi a luhtir a, a kâwr zawng hi chu pawnah a hnutchhiah ṭhin. Tichuan mihring cell chhunga eitur leh thil dang lo awmsa kha ringin a insiam pung ta vak a. An awmna kha tâwn kehin cell dang an vaihma chho ta ṭhin a ni. Mihring taksa dang vunah te hi chuan ACE2 receptors an awm ve loh avangin an lut thei lo. Kan kutah lo kai 

ṭeuh pawh ni se, kan kâ, hnâr vela kan han dah kher loh chuan anmahniin an kal sawn thei lo. Chuvangin sahbawn/sanitizer a tlen fai duak duak fo tur a ni.

Mihringah hian ACE2 receptors hi a tam dan a inang vek lo a. Hetiang nei tamho an sawi chu natna benvawn nei, entirnan:

Chuap natna nei, (Asthma, COPD etc), Lungphu natna (Cardiac Diseases), thisen sang, kal natna, Zunthlum nasa (Diabetes) thluak lam ṭha lo (Strokes), thin lam natna, Cancer vei, HIV hrik pai etc. Taksa repair hnathawk an nih avangin taksa repair ngaih tamna hmun apiangah hian an tam bik ni pawhin an hria.

Heng bakah hian meizu nasa (Heavy smokers) ho hian 30-55% velin ACE2 receptors hi an nei tam ṭhin. Chuvangin meizu nasaho zingah Covid natna hi a na bîk hle ṭhin. (Joan C Smith et al. Devlop. Cell 2020).

Vaihlo aṭanga siam tho sahdah, tuibur hmuam nasaho hi zirchiang ve ta se, meizu nasaho nen an inang ve mai thei ang em? Fimkhur a ngai e.

KUM UPA HOTE:

Kum upa lamah chuan kan sawi tak ACE2 receptors khi an tlem zawk mah nain Covid-19 hi an tuar na hle tho mai. A chhan pakhat chu kum upaho hi natna hrang hrang nei an lo nih fo ṭhin vang a ni. Chutihrualin kum upa tak pawh mahni invawng ṭha leh hrisel takho chu mi dang ang bawkin Covid hripui hi an tuar chhuak ve tho mai. Heng bakah hian kum upaah chuan taksa sipai 'antibody' siamtu ber 'Lymphoid tissue' hi a lo tlem tawh a. Heng vang hian an taksa danga râldo theitu (immune system) zawng zawng an rawn insawrkhawm ta vak a. Chu immune thlipui chu 'Cytokine Storm' an tih, tam takin an thihpui tak si hi a ni. Mahni in chhunga sazu ûmchhuah nan in tichhe vek thei Laipuia kah ang vel hi a ni mai awm e. Kan la hriatthiam vek loh tam tak chu a la awm a ni.

TUTE NGE KÂI AWL BIK?

Tam tak chuan kum upate leh natna benvawn nei (comorbidity) ho hi kâi awl bik turin an ngai a ni mai thei. Mahse hengho hian an kâi awl bik chuang lo. Naupang lam leh ṭhalai pawhin an kai awl zawk mah thei a. Fimkhur lo apiang hi hri kâi awl chu an ni mai. 

ENKAWLNA LAM :

Kan hriat ṭheuh angin Covid-19 positive (kai) 80% aia tam hi chuan eng enkawlna mah an ngai hran lo. Anmahniin an dam leh mai. A kai zinga 15% vel hian damdawi in awm an ngai thei a. Chung zinga 5% vel na zual bikin ICU leh ventilator-te pawh an mamawh thei. Kan sawi tawh ang khan a damna tur tak hriat la ni lo mah se, Doctor-ten an damdawi hman lar deuh hming chauh han tarlang ila:

1. AZITHROMYCIN leh HYDROXYCHLOROQUINE :

Heng hi a tir lam khan an han hmang viau nain tunah chuan an hmang zui ta lo. Malaria damdawia hman ṭhin Hydroxychloroquine hi chuan virus tihlum thei lo mah se, an luhna kawngka ACE 2 receptors kha a lo block theih avangin tun thleng hian invenna atan la hman a ni.

2. REMDESIVIR:

Hei hi chuan cell chhunga virus inthlahpung (RNA polymerization) tur kha a veng a. Damlo serious oxygen ngai nasahoah enchhinna ang deuhin an hmang mek a. A tira an fak ang êm ni lo mah se, an dam hma phah niin an hria.

3. TOCILIZUMAB:

Hei pawh hi damlo na zual, thih mai hlauhawm, 'cytokine storm' neite tan an hmang. 

4. Convalescent Plasma: 

Covid vei dam leh te thisen (plasma) bik kha Covid vei serious-ho an pe ṭhin. Hei hi hmun 

ṭhenkhatah chuan ṭha viauin an hria.

5. STEROID: (dexamethasone etc)

He hi natna a lantirha pek chuan tam tak thihpui 'Cytokine storm' pawh a pumpelh thei a. Midang pawhin an ṭhatpui viauin an hria.

Hydroxychloroquine ei thei loho hi Doxycycline leh Ivermectin te an pe ṭhin a. Mahse hmun tam takah chuan an pe tawh lo.

Khing ho khi a serious zualho an pek 

ṭhin te chu a ni. Heng bâka a serious zual ICU awm ngaite leh Ventilators vuah ngaiho chu Doctor thiam ICU-a thawk ṭhin 'Intensivist' ten damlo dang serious enkawl ang thoin an enkawl leh mai ṭhin a ni. Hetiang Doctor thiam bik eng emaw zat Mizo Doctor zingah hian an awm a.A thlamuanthlak hle a ni. Covid positive symptom nei lo chu Vitamin C, D leh Zinc tablet te an pe bawk.

Khing kan sawi tak aṭang khian hri kâi, symptom nei lo leh an sample test aṭanga hrikpai tam lote, anmahni inah mi dang kaidarh lova enkawl dam theih an ni. Hei hi hmun tam taka an tihmek leh kan ṭhenawm Manipur leh Tripura pawhin an tih ṭan tawh a ni. Kan tih ve theih chuan a ṭhat hle a rinawm.

TUTE NGE IN LAMA ENKAWL THEIHTE CHU ?

Heng enkawl dan Guidelines chu India sawrkar Health Ministry hian a siam vek a. State tam takin an state milin an nei bawk a. Hriat belh duh chuan Health-a thawktute an zawh theih ang. Kan hriatna tizautu atan, a tlangpui chauh lo ti lang ila. Doctor-ten an enfiah hnuah kalpui tura ngaih a ni.

1.    Covid positive ni si, symptom nei lem lo (Asymptomatic cases)

2.    Mahni ina indahhranna nei. Duhthusam chuan room hrang ni se.

3.    A enkawltu bik (Care taker) chhungkaw zinga mi ngei awm thei se.

4.    Mahnia inenkawl (self monitor) thei.Manipur-ah chuan Pulse Oximeter an pe nghal a. Hei hi thisena oxygen awm zat hriatna a ni a. Kutzungṭanga chehbeh mai a ni. Thil man to a ni lo. Mi pangngaiah chuan Spo2 hi 95-100% a ni. 

ENG HUNAH NGE DOCTOR

AN HRILH ANG?

1.    Thawhah an neih veleh.

2.    Spo2 hi 95% aia a lo hniamin. Natna dang nen Spo2 hi khaikhin loh tur.

3.    Anmahniah danglamna ṭawngfiah lo emaw âwmchhung na etc an neihin.

4.    Rilru buai/kaih an lo neihin.

CHENPUITE FIMKHUR DAN TUR:

1.    Damlo hman tur engkim a hrang hlak tur a ni. Chaw leh eitur a hranga pek tur.

2.    Covid +ve khan eng lai pawhin mask vuah rengin, darkar 8 hnuah thlak zel se a ṭha. Heng a thil hman hnu hi disinfect zel tur. Inthiar tura a kal dawn leh a hnuah a kut sahbawnin a silfai zel tur a ni. A buaipuitu hian glove paih mai theih a hmang bawk ang. Feet ruk vela hlaah an awm tur a ni. Damlo leh enkawltu hian Hand Sanitizer/ sahbawn in 40 seconds tal kut an sil tur a ni. A thawmhnaw bal disinfect a, suksak zel tur.

3.    A chenpui dangte pawh fimkhur hle tur.Damlo hnaiah awm loh tur. Naupang leh kum upa fimkhur zual a ṭha. Kut hi sahbawn in second 40 tal sil ṭhin tur. 

4.    A chenpui zawng zawngte'n inven nan, Hydroxychloroquine, Doctor ruahmanna angin an ei vek tur a ni.

ENG CHEN KHUNG HRAN TUR NGE?

Natna (Symptom) a lanchhuah aṭanga ni 10 chhung. Ni thum tal khawsik a nei lo tur a ni. Ni 10 hnu hi chuan mahni inveng pahin ni sarih (7) dang pawn chhuak lovin inah a awmzuiin a inngaichang ang. Hemi chhunga engmah inawiselna a neih loh chuan, sample pawh test a ngai tawh lo. A dam tawha ngaih tur a ni. Hei hi sawrkar laipuiin kaihhruaina a siam state tam takin an zawm chu a ni a. Mahni state duh dânin a siam danglam theih leh theih loh chu ka hre lo a. 

Khitianga enkawl theih hi Covid kai zinga a tam ber an ni ṭhin. Ṭhenkhat chuan hetianga chhuah zalen mai hi an hlauthawng mai thei.Mahse, azirmi (Virologist) te leh mithiam epidiomologist-hote'n an chhût dan chuan, a tirte aṭang khan kan sample test (sample test based) in kan kal a. A test na hi 100% accuracy a awm rih lova.A test positive kan buaipui tam ber hi enkawl ngai lo an ni si a. Chuvangin a natna lanchhuah dan (symptom based)-a kalpui mai hi him tawkin an hria a ni. Ram dang USA, UK angah pawh a tam thei ang ber an test a. Tumah khung hrang lovin Helpline number pein an hawtir vek a. Harsatna neiho khan an rawn hriattir a, chungho chu an buaipui mai ṭhin a ni. Keini pawh mi dang tihdanin sample testing hi a tam thei ang Mizorama chengte sawrkarin test zel se la, a kai leh kai lo hriat nan.

Kan hriat angin natna an kai aṭanga ni 4/5 velah a natna (symptom) a lo lang a. Hemi aṭanga chhiar a ni 10 thleng bak hi natna an thehdarh tawh lo. A hnua test leh hi a ṭul lo an rawn ti a ni mai. Hemi hre chung hian kan sawrkar laipui mithiam rualte'n kalphung an rawn thlak a ni ngei ang. Testing ringawta innghah ai chuan FIMKHURNA hi pawimawh zawk an rawn tihnaa ngaih tur a ni ang. Tute emaw test a negative a, inthlah dul mai hi thil awm theih tak a ni reng a. Khawvela hrikai tamna ber chu USA niin, a thi zât chhutna Mortality rate chu 3.3 % chauh a ni. August ni 3, 2020 khan India-a ni khat hrikai tam record 83,883 a thleng a. Hrikai zawng zawng 38,53,406 an tling tawh. Mitthi 67,376 an awm tawh bawk. Heti chung hian kan Mortality rate chu 2% vel a ni chauh awm e.

Fimkhur zual sauh a ngaih rualin kan pawng hlauh lutuk loh a ṭha. Keimahni pawh han inen ila, a thaw a tawp mai dawn ni awm taka ambulance siren ri nen kan tlan pheipui hi, khua pawh va sik chhin loa hun va hmang zo, rawn chhuak leh ta hi an ni mai thei a. A ṭul lem lova râlkhelh hi thil awm thei tak a ni.

Tichuan kan ramah pawh Covid hrikpai damlohna (symptom) nei nasaho chauh kha khung hran leh Damdawi in lama enkawl ngai an lo ni ang. Hengho hi chu a hri kai zinga 15% emaw chauh an lo ni tawh ang. Kan sum leh pai (resources) neih ang ang chu hengho enkawl nan hian a ṭha thei ang berin kan inruahman chho thei tawh dawn a ni. Vawiin ni thleng hian Mizoram chu mak tak maia min siamtu Pathian vennain nunna chân kan la awm lo hi a lawmawm hle a ni.

Fimkhurin, thuawihin ṭang tlang zel ila. He hripui hi Mizoram chuan Pathian zarah kan la hneh ngei ang.