Phum leh hawn hun rûnpui a thleng leh ta

MLA inthlan a hnai leh ta a ni ang, kan Minister leh MLA ten building sak thar hawn thu leh lung phum thute'n chanchin thar leh chanchinbu a luah leh ta zut mai.Minister ṭhenkhatte phei chu an hmanhmawh deuh ni tur a ni, building la sak zawh mumal loh thlengin hawn tur an dap ruai mai niin sawi a awm. Pawisa awm loh avanga la sak zawh loh leh la hawn theih loh thlenga hawn tura lo hmu tai tawk pawh an awm a ni awm e! Nikum lam ai chuan kuminah building sak hawn leh lung phum tháwm a tam fe tawh an ti a, inthlan kum leh building hawn kum a innang a ni ang e!

A ṭang na zual deuh phei chuan an party mi leh sate hnenah an bial chhunga hna thawh tur an zawntir ruai mai niin an sawi bawk. Damlo kanna, zirlai pass lawmpuina leh inneih lawmpuinate pawh a hma zawng aiin sum léng a hrawl tawh hle tih thlengin sawi rik a awm ta! Hei hi kan politician-te hri vei, ram hlui zia leh tun thlenga an la sim theih loh, an campaign-na hmanrua a la ni reng mai a, Gpay pawh sawi a awm leh ṭan ta! Mipuite hian ngaihtuah chiang ila, lém ang min rawn der leh ṭan tawh a ni tih hriain rilru fim tak put hun a ni a, bungrua leh KS ang leka lei theih kan ni tur a ni lo ang.

Kan chhia leh ṭha hriatna hmang hian tute nge ram hruaitu tura mi ṭha leh rinawm ni ang tiin vote i thlak tawh ang u. Tute hnam an sawi ang maia bum fin theih loh nih reng hi a zahthlak a, kan sakhuana nen pawh a inmil lo bawk.

Kan hruaitute hian thil hawn tur an duh luatah a thawktute nawr lutuk vangin hnathawhin a chhiat phah thei ang tih erawh hi chu ngaihtuah tel se a ṭha hle. 'Inthlan dawn kum hi chuan, inkawibah competition pawh an hawng duh ang', an tih fiamthu ṭhin hun kha a lo thleng leh ta.

Chutih laiin, India ram state zawng zawng zinga kan thawhchhuah (GSDP) mila leiba ngah ber lawr lak state (53% leiba nei) kan ni thung a, Delhi chu leiba nei tlem ber niin 2% chiah leiba an nei thung. Hei bakah hian hmarchhak State zinga Smart City Project hna thawk chhe ber pali zingah kan tel bawk a, Project sawmthum zinga pathum chiah thawh zawh a nih thu tarlan a ni bawk (NDTV Live). Leiba ngah ber leh hna thawk chhe ber zinga kan tel hian kan building hawn sup supte leh kan hnathawh dangteah hian nghawng a nei ang tih a va hlauhawm ve le, ngaihtuah a ti thui hle. State pachhe ber zinga mi leh leiba ngah ber, hnathawk chhe berte zinga mi ni chung hian kan sawrkar hian inrenchemna lama hma a lak hmuh tur a la awm chuang lo va, quality control lamah kan hmasawnna hriat tur a la tam lo hle thung si a, kan leibat belh tur thu lah chu an sawi thawi leh ta.

Kan record chhuanawm loh tak aṭang khian insiam ṭhat thuai kan ngai hle a ni. Finance Minister, Financial management thiam tak kan neih thute, harsatna hrang hrang kan tawk chung pawha Treasury kan la khar lote chu kan uanpui lek lek lai a, leiba nei tam ber State nih si hi thil inhmeh lo leh zahthlak a ni. Central leh State aṭanga kan pawisa hmuhte hi mipui tan a nih ang hian mipui min huapzo em, ruling party mite chauh a huap em, ram rotling tur siamnan kan hmang em tihte hi mipuite pawh hian kan fiah fo a pawimawh a ni. Mipui pawisa tur lo pawt penga hausakpui hi kan ram hruaitute zingah an awm chuan kan haw tur a ni a, kan do ngam tur a ni ang.

SEDP an sem mekte hian mipui a huap zo em? Ruling party member zawn nan an hmang, tih ri te hi a dik a nih ngat chuan a pawi ngawt ang a, a malsawm lo palh ang tih a hlauhawm. Hleih nei taka rorelna hi Pathian huat zawng tak a ni si a, kan fimkhur a ngai e. Kum tawpa kan inthlanna tura kan Campaign dan pawh Kristianna mil ni zel se, mi dang sawi chhiat, lemchan leh dawt sawi hi i sim tawh ang u.

- Benpuia Pu