VAIVAKAWN ZOHNUAI LEIMIN

Dt.7.8.2023 (Thawhṭan) khan tûk tina ka tih dan pangngaiin morning walk turin ka chhuak leh a; ruah tla seng seng hnuaiah Nihliap khumin Vaivakawn Zohnuai leimin, Sairang kawng (National Highway) hnawh mektu ka thlir ve a. Ka thlir mek lai pawh hian a minna chung, leikhi huam chhunga building la ding mek hnuai zawn aṭangin lei tlem tlemin a la tla zeuh zeuh reng a ni. Chutih laia ka bula ding ve pa pakhat chuan a thlang lama lei an laih avanga he lai hi min ni awmin a sawi a. A min tirh khan hetianga media lama sawi hi ka hmu tawh reng bawk a. Aizawl khawpui chhunga In sak tur reng reng hi AMC-in phalna an pek vek a ngai tawh a; a hmun laih a ngaih chuan Geology and Mineral Resources Departmentin No-Objection an pek a ngai bawk niin ka hria a. Hetia a'n min tak vakah chuan mawhpuh tur rilruin a dap a dap a, anni hi ngaihtuah thlen an awl khawp mai. He leimin leh a min hmabaka lei khite ka thlir mek lai chuan thil tam tak mi ngaihtuahtirin, ka thinte hial hial a rim thleng ta deuh thut mai pek a. Chuvangin, kei, thu ziak mi lo tak pawh hian he article hi min ziahtirin, thu rum pui pui leh rawtna dangdai tak tak min phawrhtir ta a nih hi. Hetia kan ziah ve takah chuan thawk khat laia heti lama lo inrawlh ve hrep tawh thu leh hla hian kori chu tu se ka ti hle mai.

Aizawl D.C. Office-a ka thawh ve lai khan, Vaivakawn lam aṭanga tuna leiminna lai thlen hma, Pi Khawtinthangi building hnuai zawn, National Highway kawng chhak lam kha Petrol Pump hmun atan khawl hmanga laih niin a min vak tawh a. Pi Khawtinthangi (Pi Khawtini i ti mai ang) building pawh kha a minpui mai hlauhawm khawpin a lang ruak mai a. National Highway-a kalte reng rengin Pi Khawtini building lam an hawi chhoh khan, “A rawn chim thla mai ang a,” an ti hlawm vek mai a; tun thlenga chim lova a awm erawh chu lawmawm tak a ni. A hlauhawm em avang khan Aizawl District Disaster Management Authority pawh khan Pi Khawtini building pawh kha an hlawi ṭhen hial réng a nih kha.

Sairang Road (National Highway) kawng chhak lam, Vaivakawn Zohnuai kawng phei kawng thlang lama In sak ho reng rengte hi hmun awih taka sak an ni hlawm vek a. Sairang Road kawng chhak lama In hmun or thil dang hmun tur kháwl hmanga laih a nih chuan, a season-in zir viau pawh ni se, a nghawrin min a siam a hlauhawmsa hrim hrim a ni. Hman kuma Pi Khawtini building zàwn, National Highway kawng chhak lama Petrol Pump hmun tur laihin min nasa tak a siamte khan AMC lama thawktute leh, Geology and Mineral Resources Department-a thawktute kha a tifing chuang reng reng lo em ni aw ka ti vawng vawng mai. Nge ni, heng kan Department-a thawhtute hian chung lam thuneitu sang lam nawrna an do ngam lo zawk?

He lemin avang hian building hlu tak pakhat chu min chhe tawhin building dang, chhungkaw tam tak luah an rauhsan mek pawh min chhe leh mai turin lei khiin a hual vel a. Heng In neitute leh luahtute hi chenna tur nei lovin an vakvai mek a ni. Vaivakawn – Ropaia Bawk kawng pawh eng lirthei mah kal tlang theih lohin a awm a. Chhangur kawn lam panna kawng pawh Two Wheeler leh kea kalte tan bak lirthei dang tan kal theih a ni lo. Lei min avanga National Highway a pin tlat avangin khawthlang lam leh Airport lam inkalpawhna pawh lirthei té chi leh Two Wheeler lo chuan a tih theih loh a. Hei hian zin mite chauh ni lovin damlo enkawl ngaite tan pawh harsatna a siam nasa hle a ni.

National Highway kawngpui sirah Motor lian, bungraw phur chi leh Petrol phur chite, kal lam leh haw lam an ding ṭhiap ṭhuap a, an khawngaihthlak hlawm hle mai. Heng avang hian pawisa tam tak hloh an ni ngei ang. He leimin hi mihring siam chawp leh ruahmanna diklo avanga lo thleng nia a lan avangin a runthlak zual a ni.

Hetiang hi a nih avang hian kan Sorkar hian State Level Disaster Management Committee hmingin, huam zau taka ṭhutkhawm koin hetiang emaw, a aia fel zawkin a rel thei lawm ni tiin kei Pensioner ve mai tawh hian ka ngaihtuah ve mai mai a.

1) Heng lai hmun leh hmun hrang, mihring chenna hmun dang hlauhawm tak tak laite hi National Disaster Management Act 2005 emaw eng dan emaw tlawh chhanin lei laih reng reng khap bur ni se.

2) Hetiang hmun laia In hmun Pass te hi laih an dil theih miah lohna turin Cancel-sak hlawm ni se.

3) Hmasawnna ruhrel lian leh kawngpui zauh ngai ang chi, tih loh theih lohte chu chhiatna thleng miah lo tura thawh dan ngaih tuah ni se.

4 ) Sl. 1 & 2 te hi rem lo nia hriat an nih chuan lei laih phalna pek an nih hmain uluk taka endik thlap a; a endiktu emaw phalna petu emaw phalna pek tura thutlukna siamtute chu mawhphur theia siam ni se. Tin, phalna pek an nih pawha thawh a niha chhiatna a lo thlenin a tuartute tan Compensation, a chhe hlut zawng ang pek theih tura ruahmanna siam ni se.

- ROṬHUAMA, CHANMARI WEST.