Fimkhur lehzual a va ṭul em!

Tun hnaiah in hmun laih vanga chhiatna thleng a awm zauh zauh a, kum hmasa lamahte pawh a lo awm tawh ṭhin. Leimin leh leimin vanga in chim ta kan hriatte hi kei chu, ka awm ngam lohna tur deuh zel a ni.

Mi tam tak hi chu kan ngam huai mah mahin a lang. Mi ṭhenkhatin an in neih chhun, an sum neih ang angte hmanga an sak an han chân leh mai hi an khawngaihthlak a; mi dang fimkhur loh vanga in leh lo chântute ngat phei chu an khawngaihthlak tak zet. Thinrima ha chang ṭhial bap bap a awl ngawtin a rinawm.

Chhiatna thleng ṭhinah hian mawhphurtu inkâwk bik tur kan awm lo mai thei. Chutih rualin, mawhphurtu bik, kawh tur bik erawh an awm chuan a lang - chu chu sawrkar lama thuneitute a ni; a bikin Disaster Management & Rehabilitation department leh Aizawl Municipal Corporation.

DMR department leh AMC-te hian an inngaih danah chuan theihtawp an chhuah ngeiin a rinawm. Chuti chung chuan theihtawp an chhuaha an inngaihna hi a la tawk zo lo a ni thei. Sik leh sa, hunbi a awm tih kan hria a, khuarel chhiatna (a ṭhen chu mihringin a cho chhuah) chhiatna thlen duh hun lai pawh kan hria. Tuna chhiatna kan tawh zinga tam tak hi fimkhur lehzual ila chuan kan pumpelh ngei hian ka la ring fan.

Hmân lawkah AMC-in Aizawl Chanmari venga damdawi in pakhat chu building sak danah dan an zâwm lo tiin langsar tak leh mualphothlak takin an kalhsak rup rup a. Mahse, chu in sak, dan zâwm loa sak chu tihdanglam awm chuang loin a hnu lawkah an hawng leh a, tunah chuan an pangngai takin damdawi in an kalpui mek. Dan zâwm loa kalhsak ni si kha engtin nge dan an zawm lohna laiah tihdanglam awm si loa an kal leh mai theih? A mak asin. Mawhphurtu kan inkâwk dawn a nih chuan AMC bâk kawh tur an awm lo.

AMC vek hi in sakna tur hmun laih phalna petu a ni. Phalna a pek zinga ṭhenkhat hi chu pek chi loh a ni hial ang; mahse, phalna an pe tlat si. Chu chuan mi tan harsatna a siam ta fo a ni. AMC hian a tih tur a ti tâwk lo a, a fimkhur tâwk lo hian ka hre ve ṭhin. Han ṭang lehzual teh se.

Chutiang bawkin DMR department lam pawh hian in, kawng leh hmun him leh him lote chak lehzuala an enfiah a, mipui vantlang himna atan huaisen taka hma an lak a ngai.

Mipui pawh fimkhur lehzual a ngai. Indiriamna ni lo se, in sakna tur lei laituin a lei laih vanga leiminin ama tana harsatna a thlen hi chu a cho chhuah tiin sawi ta ila, a zia deuh! A pawi lehzual chu mi dang tana harsatna an thlen tel ṭhin hi a ni. Mi tu emaw lei laih vanga mi dang, an neih ang anga in sa vete dinhmun hlauhawm taka an ding ve ṭhin lai hi a pawi em em.

Kan fimkhur lehzual a va ṭul em! Mipui leh sawrkar lama hotute hi fimkhur lehzual ila, i ṭang lehzual teh ang u.

- Zoramchhana