MIZORAM POLITICS HMELHMANG

Mihringte hian duhthusam ram (ideal state) kan nei vek a. Hmanlai greek mi fingho (philospher) paw'n an suangtuahnaa an lo din ṭhin ram hi an lo nei deuh vek a. Chutiang an duhthusam ram chu thlentir tum ngei ngei lam pawh a kawk chuang lo. Chutiang bawkin kan ram politics hmelhmang han en hian duhkhawp lohna tam tak kan nei vekin a rinawm. Khawvelah hian duhthusam ang tak hi chu eng kawngah pawh hian a awm theih loh; tih erawh hi chu kan hriat thar a pawimawh.

Politics kan tih hian a sawi tum leh a kawh ber chu mimal leh vantlang ṭhatna tura sawrkar hmanga inrelbawlna hi a ni. Politics-a inhmangte chu ram leh mipuite rawngbawltute an ni. Ram leh mipui rawngbawlna hi Pathian rawngbawlna nena inang, rawngbawlna thianghlim leh zahawm a ni. Pathian rawngbawl turte chu a rawngbawl tura Pathian kohte an ni ṭhin. Chutianga Pathian kohna hmu lem lote’n Pathian rawngbawl hna an thawh chuan rah ṭha a thlen thei ngai lo ṭhin. Tin, politics luhchilh a, ram leh mipui rawngbawl hna thawk turte pawh an rawngbawl hna ṭha tak leh a nih tur ang taka an thawh theih nan, mahni hmasial lo leh mi rinawm an nih a ṭul hmasa phawt a. Hetiang mi an nih loh chuan thiamna sang tak nei, hausa leh fing tak pawh ni se, ram rawngbawl hna a nih tur ang takin an thawk thei ngai lo vang. Politics hi a nihna dik taka kalpuia mahni hmasial lova ram leh mipui rawngbawl nana hmang thei hi khawvel ram pum huapa thlir pawhin sawi tur an tam lo hle.

Tuna kan ram inrelbawl dan hi ‘parliamentary system of democracy’ a ni a, hetiang ram inkaihhruainaah hi chuan political party neih hi a ṭul a. Political party-te chuan party Headquarters-ah te, District-ah te, Block-ah te leh khaw tinah hruaitu thlan tlinte an nei ṭhin. Kum 1947-ah India hian British aṭangin zalenna a hmu a; Mizo-te pawh hian politics kan lo hmelhriat ṭan vein political party-te pawh kan din ve ṭan a ni a. Lal rorelna banin khaw tinah village council-te kan lo neiin ram pum huapin District Council te kan lo nei ta a ni. District Council kan neih kum 1952 aṭanga kan tun hun politics hi han thlir ila, duhthusam chu a ni lo chiang mai a. Kan politics khelh dan leh kalpui dan hi thlak hlawk hlawk ngai (reformation) hi a tam a ni. Kan politician ṭhenkhat phei chu vote hmuhna tur a nih dawn phawt chuan an hmelhriat lem loh thi te pawh puan leh pangpar kengin an vui a; an ral zui zel bawk a. Damlo hlek pawh an zawng ṭhin emaw tih mai turin an hre thei em em a, eng emaw humin an kal zel ṭhin. An kalphung chu Pathian thu nen inpersan daih a ni chungin; a zavaia Kristiante ngaiha mawiah biak ina inknawm an peih hle a, thusawi hun chang turte pawhin ṭan an la nasa hle ṭhin. Kohhran upa nih phei chu ‘passport’ ṭha tak nia ngaiin kherh chikimin an kherh ṭhin (R. Lalmanzuala, 2003). MLA nih a, Minister chanvo chan chu ram leh mipui rawngbawlna tak tak chauh ni dawn ta se, hetiang ti tur hian an in aṭanga pawh chhuah zawh pawh an ni hlawm lo maithei a ni.

Tin, kan politician-te mai bakah a mipuite pawh hi kan inenfiah ve hi a ngai a. A nihna takah chuan tuna kan kalphungah hian mipuite zawk hi kan rinawm lo ve tho emaw ni le a tih theih. Kan hmelhriat zinga mi hruaitu atana thlan tlin theih tur awma kan ngaihte chu kan belbul a. Thlan tlin an nih hnua keimahni mimal thila kan ṭangkaipui theih dan tur thlirlawk ranin an lam ṭangah kan insiam a. An rinawm lohna te, an thiam tawk lohnate leh an tlin tawk lohnate chu hresa reng chungin kan haider lui ta ṭhin . Hetiang kalphung aṭang hian ram leh hnam mipuite tana thil ṭha tihna kawng a kaw thei lo va, chhiat zual zelna kawng zawhna a ni zawk. Tichuan, insiamṭhatna kawng tura hna thawk thei tur ngei, mi rinawm, mi thiam leh tling kan thlan thiam a ngai takzet a. Chutiang ti tur chuan keimahni hmasialna leh hamṭhatna tur kan dah bo phawt hi a pawimawh a, ram leh mipui ṭhatna chu mimal ṭhatna a ni tih hre reng chungin, mimal hmasialna leh ṭanghma um hmasa lova ram leh mipui ṭhatna atana kan inpek hmasak a ngai a ni.

Hun kaltaa kan hruaitu hmasate leh ni mekte plan leh policy tam tak, zuih ral tate kha han ngaihtuah chian chuan a uiawm duh hle. Kan ram hruaitu hmasa leh hruaitu la ni mekte hian hna an thawk lo a, thil ṭha an ti lo chu kan ti thei lo ang. Ram tan thil ṭha tih pawh an nei ve na meuh mai; amaherawhchu thil tam takah duhkhawp lohna hi mipuite lakah hian a tam em em mai a. Kha'ng ‘plan’ leh ‘policy’ ṭha tak tak an lo neihte kha tihhlawhtlin vek ni thei se chu kan ram hi mahni kut leh kein kan ding thei daih tawhin a rinawm. Kan harhchhuah a hun tawh hle a ni. Tin, kristian kan nih ang hian kan politician-te pawh hian mipuite laka an thutiamte hi hlen ṭhin se; hlen theih loh tur erawh tiam tawh lo bawk se. An tih theih loh tur (an tih hlawhtlin tum tak tak loh) tur hi mipuite hi sawi hmuh fo lo se tih hi mipuite duh dan pawh a ni ang.

Tin, Mizo-te hian kan Kristianna hi kawrah kan hmang tih hi mi tam tak pawm dan a ni ngei ang. Kohhran leh Politics hi kan ṭhenhrang phawk niin a lang. Kohhran pawnah chuan engti ang pawhin han awm mah ila, pawi tihna leh Pathian hlauhna tak tak hi kan tlachham ṭhin hle a. A pawimawh berah chuan kan kristianna hian Kohhran huang chhung hi pel ngam ve tawh se la; kohhran huang chhunga Pathian leh mipuite kan zah ang hian pawn lama kan nun pawh hian chutiang nun chu a chhawm tel zel hi a ṭulin a pawimawh takzet tawh a ni. Kristian rama thil thleng atan chuan thil zahthlak leh kristianna nen a thil inrem lo tak a ni bawk a ni. Tin, Pathian kan ṭih tak tak loh avangin dam chhung khawsak lungkhamnaah buaiin, dam chhung daih lo rothil awhna sualah kan lut a, kan tih loh tawp tur thil dik lo kan tih phah fo ṭhin a ni. Pathian hi ṭih ila, a thupekte zawm ila, Pathian lal berna hi pawm ila, fel taka rem min ruatsakna hnuaia kan intukluh chuan sual tam tak lakah kan himsa ngei ang (F. Vanlalrochana, 2022).

Tin, mi rethei leh hausa inkar zau lutuk te, thuneihna hman dik lohna leh thlei bik neihna (nepotism) te hi ram hmelhma leh ram hmasawnna tiṭhuanawptu a ni. Ram hmasawn nan hian Kohhran mai bakah politics kaltlanga ram siam ṭhat hi a pawimawh takzet a. Politics tel lo chuan ram hian hma a sawn thei lo a; ram siam ṭha theitu pawh hi politics bawk hi a ni. Politics hi ram hmasawnnana a ruhrel (structure) pawimawh ber a ni a tih theih ang. Chutiang khawpa pawimawh leh dinhmun pawimawh luah si hian a pawimawhzia hi hriat a ni lo fo. Kan politician-te pawh hian politics pawimawhzia hi an hriat nawn fo hi a pawimawh awm e. Ṭhalaite zingah pawh politics hi eizawnnan (career) chauh ni lo, ram hmangaih tak tak avanga politics an luhchilh ngam hi a ngai tawh a ni. Neih belh duh vang leh nawmsak duh vang ni loa chan huam leh retheih tak tak huama politics luhchilhtu an tam hunah, ram hian hma a sawn ngei ang. Tin, politician ram hmangaih tak taktu leh hna thawk ṭhaho hi hriat reng an ni fo ṭhin a. Mihring hi rei lo te atana vaivut aṭanga siam kan ni a, he kan hun neih tawi teah hian mite hriat reng tlak nih hi kan duhin kan chak berte zinga mi a ni ti ila a sual awm lo e. Chuvang chuan khawvelah hian hriat reng tlak (thil ṭha lam) tur eng emaw ni hnutchhiah hi kan duh vekin a rinawm; chutiang chu mi ṭhenkhatin an tum ber pawh a ni.

Kan politician-te pawh hian a ṭha lam zawng hriat reng nih an duh chuan tun aia ṭha lehzuala tan an lak a ngaiin ka hria. Famta amah Kaphleia khan a essay ‘Thlirtu’ tawp lamah heti hian a ziak a: “Khawvel hi eng lai pawhin siam ṭhat a ngai reng a, ṭhat lutuk tih reng a nei lo vang. Mi fingte thu leh mi ṭha leh taima thil tih hian a vawng ṭha hram hram a ni a. Kan dam rei leh rei loh te hi kum te, thla te hian a hril lo e, kan thu leh kan thil tihin a hril ber zawk a ni. Mi kum tam tak nung mah se, ṭhenawm khawveng tan, a ram tan leh khawvel tan thil ṭha a tih si loh a, thufing a sawi si loh chuan tu nge a dam hria ang? A thih veleh miten an theinghilh nghal ang. Mi fing leh mahni ram tana thil ṭha titute erawh chu khawvelah hian nung rei lo mah se, an thih hnu pawhin an nung reng ang; chu chu a ni dam rei chu,” tiin. Kan politician te pawh hian mahni sahmim puarna tur leh neih belhna tur ringawt ni lo a, ram tana an chan ngam a, an neih tlem belh ngam a nih phawt chuan an thih hnu pawhin an nung reng tawh ang.

A tawp berah chuan khawvel hi mi famkim lote famkim lohna ram a ni a, amaherawhchu a famkim lo lai leh siam ṭhat ngai laite siam ṭhat hna hi ringtute tihtur a ni tih hi kan hriat nawn leh a pawimawh hle. Kumin kum tawpa inthlanpui kan hmachhawn turah hian politician te mai pawh a ni lo, a mipuite pawh hi kan danglam ngam a hun ve tawh takzet a. Party mi leh saah ringawt buai tawh lovin, mi ṭha leh rintlak tur hi kan thlan ngam a ngai tawh a ni. Tin, Mizoram ṭhanmawh bawk berte zinga mi ‘party-based-politics’ hi kalsan ngam a hun tawh a; kan party mi leh sa ni lo mi ṭha leh rintlak an awm chuan kan vote ngam a hun tawh. Tin, Pathian nung zuitu kan nihna ang taka Pathian ṭih mi tak hnenah kan vote hlu tak hi hlan ṭheuh tum ila, chu chuan kan Zoram chhung mai ni lo, khawvel hriatah Zoram hmel hi a lo danglam chho ang a, kan politics leh kan ram hmel hi khawvel mithmuhah a mawi chho dawn em em a ni.

“Lenrual duhte u tho ru,
Raltiang I kai ve ang” - Rokunga

Works Cited
1. Chaltuahkhuma. (2001). Political History of Mizoram. Aizawl; David Memorial Press.
2. A. Thanglura. (1999). Zoram Politics lumlet dan; bel keh phuar khawm tui pai thei lo. Aizawl: MCL Publications.
3. P. Lalnithanga. (2008). Mizorama Politics inlumleh chhoh dan. Aizawl; Lengchhawn Press.
4. Lalthara. (2021). Kan ram leh hnam humhalh nan. Aizawl; Diktawn Press.
5. M. Lalmanzuala. (2003). Zoram Kalsiam–3. Aizawl; Lengchhawn Press.
6. Kaphleia memorial Trust. (2002). Kaphleia Kutchhuak Kimchang. Aizawl; Fraser Media and Publication.
7. F. Vanlalrochana. (2002). Zofate u, Finna zawng ula. Aizawl; Frasher Media and Publication.

- Imanuel Lalrinpuia 
V Semester, Department of Political Science
Govt. Aizawl West College