Bhawan Politics intihsiak kha

Hman ni Vanglaini thu ziak pakhatah khan, "Congress hoin Grassroots lamah an chhe tawh tih hriain boruak siama inkaih thawh tumin Bhawan Politics an khèl a," tih kha thil hre chiang lo thuziak mai a ni tih ka rawn sawi ve duh.

Congress hi engtik lai mahin Grassroots Politics ah kher hi chuan an la hniam ngai lo, Mizorama Political Party zinga Grassroots nei ṭha ber an ni. Tun hnaiah Lunglei Municipal Council lamah Congress an hniam chhan kha chu mipuiin MNF an ning tawh lutuk a, thlak theitu an zawng a, ZPM nia an hriat avangin ZPM an vote a, ZPM voter tam tak kha Congress an ni tih hi hriat a ṭha.

Zemabawk Local Council inthlanah Congress hmuh tur an awm tawh lo, Congress chu mipuiin an hnawl tawh tih pawh hi a dik lo. Congress an tla chhe lam aiin Pu Zoramthanga paih duhna a liana Zemabawk mipuiin Chief Minister hi thlak an duh a, a thlak theitu tura an rin ZPM lam an vote ta sup sup a, Congress hi an tla chhe ta tihna a ni lo tih hi Politics hrethiam chin chuan an hriat a ngai.

Mizoramah Party Member hi chhiar ila Congress an tam ber ka la ring. Pu Vana leh Pu Chuaungoa te boruak hmanga inkaih thawh thar tum mai mai anga sawi pawh hi a dik lo, mi pahnih khat boruak siamah Congress hi an innghat lo. Party lian an ni a, lut thar vanga phur an ni lo. Pu Zodintluanga boruak vangin a hniam phah hek lo. Pu Zodintluanga hi awm lo pawh ni se Congress chu an len ngaiin an lian tho ang. Kum 2023 inthlanah hian pathumna an lo nih pawhin a Grassroots hrim hrim chu a la lian ber, a boruak kal lai a ni lo zawk a ni, an rawn la lian leh dâwn tih hi mi pangngai Politics hre chin chuan kan man thiam zawk a ni.

- Lalnunmawia