Written by
- Vanlalrema
AMC chu candidate nei ṭha ṭha
Kum 2010 AMC inthlana thil mak deuh chu rorel lai Congress leh ZNP kha an thawk dun a, MNF leh MPC kha an thawk dun bawk a, a candidate nei ṭha apiang kha bial hrang hrangah khan an tling a, party angin mipuiin vote an thlak loh avangin party chakna leh chak lohna pawh a awm hrang thei lo.
MNF kha panga an tling a, an thawhpui MPC kha pali an tling. Congress kha panga an tling a, an thawhpui ZNP kha panga bawk tlingin Congress leh ZNP khan sorkarna an han siam ve tak nain AMC hmasa ber kha chu Councillor te kha an sorkar kim deuh vek a ni awm e - sorkarna kha a inthlak kual a inthlak kual avang khan.
Kum 2015 AMC inthlan khan thil thui tak a rawn tihlan leh bawk chu candidate neih ṭhat pawimawhna bawk a rawn tilang leh ta a ni. MNF mi 11 ngawt mai an han tling nalh mai a, state sorkara rorel lai Congress chu MPC nen an thawk dun chung pawhin mi pariat chiah an tling ta a. ZNP lamin Councillor an nei ve ta lo a ni tih kan la hre ṭheuh awm e.
Chutichuan he inthlana lo lang leh ta chu, Aizawl khawpui hian political party âwn lam a nei miah lo tih hi a ni.
Aizawlah hi chuan party hmanga eizawng ve lo hi mi tam zawk an ni a, chuvangin an nin apiang hi an vote duh lova, candidate nei ṭha apiang zel hi an vote mai tih a hriat theih a ni ti ila thil kan sawi sual tam pui lovang.
Kan thusawi tih dikna tur chu kum 2008 ah mai khan Congress kha hneh takin Mizoramah an sorkar a, kum hnih hnuah AMC ah khan an mualpho angin a sawi theih tho ang chu. AMC-a an chak loh avang khan 2013 state inthlanah khan an chak lo leh chuang miah si lova, Congress bawk Mizoramah an sorkar leh ta a ni.
Kum 2013 inthlana Congress sorkar hneh dan en kha chuan 2015 AMC ah pawh an chak leh ngei a rinawm laiin rin loh takin candidate nei ṭha MNF in AMC ah ro an rawn rel ta a ni tih kan la hre thei awm e.AMC vawi hnih kan thlan tawhah thil kan zir chhuah chu candidate nei ṭha zel an chak a, state sorkara rorel leh rorel loh a ni lova, party lian leh te pawh a ni lo, Aizawl mipui hian party party an sawi ve lo.
Chuvangin, AMC inthlan lo awm tur pawh hi party tan can-didate thlan fimkhur a ṭul dawn a ni.