RAVEL MORRISON-A LEH TALENT

Sir Alex Ferguson-a'n Manchester United a enkawl lai khan mipa naupang inkhel thiam em em mai a awm a. Ravel Morrison a ni. West Ham United te, Lazio te, Sheffield United leh clun dang tha tak takin a thiam wm avangin beseina sang tak nen an han chhawr kual dawn thin a. A nungchangin a zirlo a. A nih tur ang hi a ni thei thlawt lo.

Manchester United khan amahah beiseina sang tak an nei a. Siamthat tumin theih tawp an chhuah a. A tihmawh em avangin an chhuah tir ta ringawt a. Club hrang hrangin an tih fuh palh tak thutin tih thuah an han chhawr dawn thin a. A la harsa rih viau mai.

Football ziaktu lar Henry Winters-a phei chuan, Ravel Morrison football thiam zia leh England ngei pawhin an la tangkaipui tur zia pawh ngaihnawm em emin a ziak a. Ka la hre reng mai. 

Morrison-a chu,  Manchester United a a awm laiin thubuai a nei nual a. Thubuai pakhatah a chungthu an ngaihtuah a. Judge chuan a thutlukna puan pahin heti hian a ti a, " Mi dangte nuna hlimna thlen thei tur khawpin Talent i nei ropui a, a tha zawngin nung ang che" tiin a fuihin, a zilh a ni. 

Morrison hian tun thlengin a nih tur ang a la ni pha lo a, a nih tur ang a ni pha dawnlo tain a lang.

Engpawhnise, Mihring nunah hian talent chauh a ni lo a, nun ulukna leh thawhrimna hi a pawimawh a. 

Judge-in Morrison-a a zilhna ang deuh hian, mizo zingah talent nei tha tak tak, mi dangte nuna hlimna thlen thei khawp tur an awm ve thin chung mite chu an thawhrim loh avangte, an nun an uluk tawkloh avangtein society hian thil tam tak kan chan a ni! 

Pathian en tlata mi thawkrim te hi kan hnam hian kan mamawh a ni.

Bible-ah Lal Isuan Talent tehkhin thu a sawi kha kan hmu a. Khata Talent lai kha han umzui dawn ila.

Mi pakhat hnenah Talent nga an pe a. Pakhat hnenah Talent hnih. A dang leh hnenah Talent khat. Talent khat dawngtu khan a tipung ve lo a, hrem a tawk a nih kha. Talent tipung tam ber khan talent tipung ve lotu talent kawllai kha lawmman atan a dawng zui bawk tih kan hmu. 

Kha tehkhin thua Talent tih hi, hausakna lam sawina a ni a. Helai chang atang hian Tunlaia Talent kan hmanna, 'Thiamna leh theihna' tih ang chi a lo chhuak a ni.

Talent khat hlut zawng hi tunlaiah chuan Us dollar 457,600 vel niin an chhut a. Chu chu he thu ziah lai (9.09.2020) chuan India pawisa in Rs. 33,761,728 a ni. Talent hnih dawngtu chuan Rs. 67,523, 456 a dawng tihna a ni a. Talent nga dawngtu chuan Rs. 168,808,640/-a dawng tihna a ni a. A dawng tam pahnih hian an tihpun nasat dan chu lo chhut ve tawh mai ila. A tira an dawn zat leh a hnua an kuta an kawl zat inan loh dan leh a petu rilru tur kan chhut thiam mai awm e.

Khami tehkhin thuin a sawi ber chu, William Barclay-a tawngkam ngai ngai hi han dah ta ila, "There can be no religion without adventure, and God find no use for the shut mind" tih a ni. Pathianin ngaihtuahna hmang ngailo, rilru kharkhip tlat chu eng atan mah a ti lo, tihna ang a ni. 

 Pathianin Talent hrang hrang min pe a, min pek dan a in ang lo. A pawimawh ber chu eng angin nge kan hman tih a ni.

 He tehkhin thu a kan hmuh chu, Hna thawh that chu a aia tam hmuh belhna a ni. Chhiahhlawh pahnih talent tipung tha te kha, chawla hahdam tura hrilh an ni lo, mawhphurhna sang awk pek an ni.

Hrem tawka ber kha, a tiha tih ve tumlo a ni. Kha pa khan a talent a hloh ta a ni lo a, hman tangkai a tumlo hrim hrim a ni. Talent hman tangkai tumlo tu chu hrem a ni.

 Mihring nun phung diktak a tarlang bawk, a nei a piangin an pek belhchhah anga,  a neilo chuan a neih chhun a chan ang. Talent nei tha hmang tangkai chuan hma a sawn anga, a hmang tangkai lo chuan a hnung tawlh ang. Kan talent te h kan hman tangkai zawh poh leh kan theihna leh thiamna a pung zel dawn a ni.

Pathian thilpek dawn reng theihna chu Pathian tan leh mihring te tana kan thiamna leh theihna, kan neih ang an te hman tangkai hi a ni.

Kan talent te hi, mi dangte nuna hlimna thlen turin, Mi dangte tan leh Pathian tan i hmang ang u.