Indian kan ni lo, Indian kan ni!

1966-a India ram aṭanga zalenna suala Indian kan nih loh thu aupuitute khan India Parliament-ah Indian kan nih loh hlauin an au chhuak a, Indian kan nihzia au chhuahpuitute chu Pasalṭha huaisen tiin kan lo hmuak ta a. Rajya Sabha lama kan MP K Vanlalvena chet dan ropui tak kha a lehlam aṭanga thlir chuan a lungchhiatthlak hle tih hi hnam thinlung aṭang chuan sawi loh theih a ni lo.

Indian kan ni lo tiin India kan kap a, zalenna kan la sual thu min hrilh lawm lawm a. He India rama kira Silai leh ralthuam nen kan inpek hnu pawh hian zalenna kan la siam reng tih hi kan Hnam Pasalṭhate min hrilh leh thu min chah a ni. Indian nih hi kan inpawm ngai lo. India ramah min rin lut mah se India nih hi kan duh loh thil a ni. Hello China tih pawh kan Zirlaiten an tar ṭhin tih kan la hria ang chu maw?

Home Minister Amit Shah khan Myanmar aṭanga lo kal kan nih a sawi khan remchangah lo la se, "Aw, i sawi dik, Indian kan ni lo va, India aṭang hian zalenna pawh kan sual a ni," tih ni thei zawk se, inngaihtuah fimna hun nei se chu kan MP hi Hnam Pasalṭha dik tak a ni tur. A inngaihtuah fîm hman lo a nih hmel a, aw rawl tawpin "Indian kan ni, Indian kan ni" tiin a au a. Tun hmaa ka Hnam Pasalṭhate kha chua,n "Indian kan ni lo" tih kha an thihchilh rap rap a, kan au hla a lo dang zo ta.

Tu mah indem thei kan lo ni lo ve. Kan MP pawh a zahawm, a huaisenna hi a fakawm. A au hla tak hi chu tun hmaa "Indian kan ni lo" ti ṭhin MNF Martar te kha lo dam leh ta se eng tin tak ngai ang maw? tiin ngaihtuahna a vak vêl a, intodelh lo ram hi chu Vai hmaah dawl zawrin kan zawr tlang a ni. Au hla a danglam ta, "Indian kan ni, Indian kan ni" kan ti ta.

- Maremmawia