Covid-19 ka vei!

Mumang te hi a ang ka ti ṭhin. March 2020 aṭang tawha ka lo vei em em, Covid-19 do nan tiin Hand sanitiser siam leh PPE ṭhui tura ka thawhna Women’s Polytechnic, Aizawla ka lo in volunteer ve na chu hripui hlauhawm tak chu ka taksaah ngei ka lo kai ve chu a ni ta mai a. Ka hriat tirh (ni 27 August 2020) chuan min deng ve dawt mai. 

Mi reng rengin thi mai tur thlaha min thlahliam hnu chuan ZMC ka va lut ve ta rawih a. A hmunah chuan hlauhna a bo nghal daih mai, rilru damna ka chang nghal pang. Ka kaina nia chhuizawnte nen room khatah kan han inhmu chu, “In downline ka nih hi, min lo duat viau rawh u,” ka han ti nghal thawr a, kan hlim chho nghal hle mai. 

ZMC chu luh mai pawhin damna a lo ni nghal mai a nih chu. Doctor leh nurse-ten min en a. Min rawn khawih mai pawha kai ve theihna chance a tam dawn tehreng nen duat takin kan natna min enkawlsak hi a ropui ka ti em em a ni. PPE an ha vek a, an hmel hriat hran theih an ni lo erawh chu a buaithlak ka ti ve deuh. 

Vei atana kan duh loh ber mai hripui chu han vei takah chuan damlo riau nia inhriat tum pawn kan dam em em mai si a. Hritlang pangngai pawh a hreawm zawk hiala hriat te pawh a awl rum rum; engmah symptoms keimahniah a lanchhuah loh chuan. Pawn lam aṭanga kan hriat ang em em chuan a veite chuan kan manganpui ta miah lo mai. Kan kai dan lah hi sawi thiam a har em em a, reilote kan contact a kan kai mai kha, kan mutpui, kan chaw kilpui kan chhungte lah chuan an kai ve leh chuang der bawk si lo. “A tlak tlak vanduai” tih chu alo ni deuh a ni ang e. 

“Lalpa, he hri hi ka lo kai ve ta a nih si chuan, keimah vanga kai thei dinhmuna ding list thui taka tlarte hi tumah kai tir ve lo ang che,” tiin Pathian ka kar ve tlat a. (Contact list a lang tur kan dawr tlawhtu register a inziak zat hi iRin Infomedia, Zarkawtah - 100, iRin Minimart, Mission Veng - 124). Pathian chuan a ropuina hmu turin hri hi min lo pe phawt chu niin, khimi inziak tlar zingah khian tuman an kai ve ta lo a ni. Pathian han ropuizia chu maw, ṭawngṭaina thiltihtheihna chu a taka hmu turin Pathianin he natna hi min lo pe a lo ni si.

He hripui hi a tawp dawn lo, a damdawi pawh kan la nei thei lo. Kan taksa a luhna hi kan dang thei lo. Heng zawng zawng chungah hian Pathian kan nei tlat. Kan taksaa a luh chiah hian kan damdawi aia ṭha Pathian chuan hna a rawn thawk ta zawk ṭhin a ni. Mizote hian Pathian kan nei, ṭawngṭai i uar sauh sauh ang u. 

ZMC Covid kaite enkawlna tur bika kan damdawi in hi Mizo mipuiten ṭawngṭaina nasa taka an hlan tawh a nih hi. A chhungah damna a awm. Khum zawng zawng hi damna khum vek an nih hi.

Kan ram hruaitute leh kan mithiam doctor-ten kan ram dinhmun mil tur zela kan zawm tur dan an siam hi a ṭha tawk a, i zawm zel ang u.

He hri hi a reh rih mai dawn lo, kan fimkhur belh zel a ngai. Kut silfai leh social distancing hi a la pawimawh zel ang. He hri hi kan lo kai palh ta a nih pawhin vanduai bikah in ngai lo ila. Kan kai vanga miten min ṭawngṭaipuina hi kai lo ila kan dawng dawn lo. 

Hri veiten a chhunga kan induhsakna leh kan ṭawngṭai hona hman ṭhin ringawt pawh hi a hlu em asin. Ward chhungah te exercise kan han la suau suau mai bawk a, a hlimawm dangdai ve asin. Eiturte pawh a zo a vaiin kan han in share vek a. 

A kaite, a pu darhtute hi dem mai lo ila, tuman duh vangin an kai bik lo a nia. 

Covid-19 nena lenho thiam hi i zir ṭan ang u; chiai pui mai lovin.