MAN LEH MUAL INHLAN HI INNEIHNA A NI NGAI LO
Mizoram State Law Commission chuan ‘Mizo Inneih, inṭhen leh rokhawm dan 2024’ siam ṭhat dan tur an ngaihtuahnaah rawtna chi hrang hrang an dawng a. Chu'ng rawtna an pawm zingah Mizo dana man leh mual inhlan chu inneihna tlingah pawm ni se tih a tel a ni tih chanchinbuah kan lo hmu a. Hetianga rawttu rawtna rilru hre loa lo sawi zui hi a nuam chiah lo deuh a; an rawt chhan hriat a chakawm ngawt mai.
Mizo danah man leh mual inhlan hi inneihna a ni ngai lo a; sakhaw thil a ni. Mizote'n Kristian sakhua kan zui hma pawhin innei turte chu nu leh pate inbe remin man leh mual an inhlan a. Chumi hnuah inneihna buatsaihin hmeichhia chi mipa in lamah a lawi a, lawi chhiat zan leh lawi ṭhat zante a awm a. Puithiam Sadawtin an sam suihkaih hlihsakin arzangtuak talhin an innei a, khawn ṭhiangte pawh an khawn ṭhin a ni.
Mizote Kristian kan nih hnuah pawh kan inneihna chu sakhaw thil a la ni zel a. Inneih dan serh leh sang leh inneihtirtu erawh a danglam ta a. Mizo kan nih angin palai te, man leh mual te, man ei te, lawichal te, thuam chhawm te leh lawi ar te erawh chu a la awm ta zel a nih hi.
Chuvangin inneihna serh leh sang tel lo – man leh mual inhlan ringawt mai inneihna tlinga Mizo dan atana pawm tum hi a Mizo lo a ni. Tunlai khawvelah hnam dang thlirna aṭanga inneihna hi serh leh sang thil a ni lo tih ngaihdan a awm a nih pawhin, kan hnam nunphung vawnghim a, keini Mizote tan chuan a serh leh sang lai tak hi inneihna a ni ti tlat tur kan ni dawn lawm ni. Mizo hnam nun dan vawnhim duhtu tan chuan he dan thar atana rawtna hi a pawmzam a har hle a ni.
Sakhua la run tak mai Mizo zingah sakhaw nei mumal lote pawh tunlaiah chuan a awm theih ang. Mizo kan nih miau avangin chungte pawh chu man leh mual an inhlanna inneihna tlinga pawm mai lovin, rorelna court-a an inneih tal phut ila, Mizo hnam nun kan vawnhimna a ni thei ang.
He rawtna hi rokhawm kaihhnawih vanga rawt a ni mai thei a. Chutiang a lo ni a nih pawhin, Mizo hnam dana inneihna sakhaw serh leh sang a nihna hi chu vawnghim tlat ila. Innei fel hman lo, man inhlan tawh si, nupa anga an khawsak dun chhunga thihna a lo thleng a nih pawhin ro an khawm theih dan kawng siamsak ila, kan hnam nun atan a himin a ṭha tawk viau tho awm e.
- J.H. Lalhruaizela