HRUIPUI STATISTICS MIPUIIN KAN MAMAWH

Mi ramah, natna dang vei tel neite leh upaten hripui an tuar nasat bik thute kan thehdarh mek a. A bengvarthlak rualin kan state dinhmun hi kan hriat a ṭul zawk. Kan ramah hri kai leh vei heti zat kan lo awm ve ta a. Mi ram statistics ring tawh lo hian, kan state data lakkhawm aṭang hian, mipui kan lo inven thiam theihna turin, hri kai leh vei zat mai ni lovin, kan state dinhmun famkim zawk hi min puansak ṭhin se a lawmawm ngawt ang. 

Kan inṭawngṭaisak dawn a nih pawhin, hri kai leh vei zat ngawt ni lo hian, an dinhmun in hriatsak chunga ṭawngṭaisak te pawh hian awmzia a nei lehzualin a rinawm.

Entirna lo siam ta ila:

Kum zat: Entir nan: Kum 30-, Kum 31-50, Kum 51-60, Kum 61+ tih ang chi hian, hri kaite leh vei mekte leh dam leh tate thliarna data puan ni se.

Sex: Vei mek zingah mipa nge tam hmeichhia? Dinhmun inangah mipa nge dam hma hmeichhia tihte pawh.

Hnathawh: Mipuiin fimkhur dan kan thiam theih nan, Hri kai leh vei mek zingah eng hna thawk nge tam ber? Entir nan: 1. Hripui leng viltu leh enkawltu, 2. driver, 3. dawrkai, 4. election duty... tih ang deuh hian. 

Chin dawklak nei: Hri kai leh vei mek zingah kuhva, meizial (tuibur, sahdah tiamin), zu leh ruihhlo ching dawklak eng zat nge awm? An dam har bik tak tak em tih mipui hian hriat kan mamawh. 

Natna dang nei: Hri kai leh vei mek zingah chuap leh thâwk lam nena inkaihhnawih natna: TB, asthma, bronchitis leh pneumonia lam chi vei te, zunthlum natna veite an awm em? ICU-a lut leh ventilator mamawh chin hi eng zat nge kan neih tawh? Natna dang vei telte hian hripui hi Mizoramah an vei rei bik tak tak em? 

Ka puang a nih pawhin hri veite hming leh nihna (identity) chu thup ni tho se. Mipuiin ngaihdan kan lo siam theih nan a zat, a number-in hriat kan duh mai a ni. 

Heng thil lakkhawm, chhin­chhiah, thliar fel, vawn ṭhat leh puan darh hi i taima ang u. Kan research scholar ten an la mamawh tur Mizo­ram record pawimawh tak a ni.