HMAIKAWR PHENA HMEL

Hmaituamna tel lo chuan nun a kim lo tlat tawh a, a ṭulna avangin kan thuam chi khat atan kan hmang chu a nih ber tawh hi maw. Taksa hliahkhuh nana thuamhnaw inbel hi chu kan pianken a ni a, kum 2020 inher chhuakin a rawn ken, mitin tan hrileng avanga hmui leh ka tuam ṭhat a ṭulzia kan hre hne hlei hlui a. Tu amah hian kan vuah reng thei lo a, mahse invenna atana a pawimawh em avangin kan vuah lui mai zawk. 

Tunah erawh khawi lo chhuah dawnin ken ngei ngei a ngai a, theih­nghilh thiang lo a ni tawp. Hmaikawr phena thil awm, lang lova lang reng si, mihring nun lam hawi ang aw...

Zirtawpni tlai a ni a, zawlkhawpui thlang lam aṭangin zawlkhawpui chhuah lam panin, vantlang lirtheiah ka chuang a. Lirthei veivak inhnawh tam lutuk avangin kan tlan chak thei lo a, lirthei tukverhah dakin, kawtthlera mipui veivak ka thlir a. Mitin chu nidanga ka hmuh ngai loh ang vekin, an hmai an lo tuam vek a. Ka thlir zel a, mi chi hrang hrang hmaikawr phena an nun chu ka suangtuah a, ka hmuh hnuhnun apiang ka rilru in a um zui a. 

Tichuan, vantlang lirtheia ka chuan chhung chuan hmaikawr phena mihring hmel chu tihian ka suangtuah ta a - Mihring ze dik tak pholanna hi kan thiltihah te, kan nun danah te, midang kan en danah te, mi hrang hrang bula kan rilru put dan aṭang te hian a lang chiang awm mang e. Hmaikawr kan vuah vek avangin hliahkhuhin kan awm a,  thil reng reng mi hmuha lang lo tura kan tih duh chhung chuan, milem kan ni. 

A phena thil hliahkhuh leh a ruka thiltih hian nun chhungril a teh pha lo. Pawn lamah mawiin langsar ringawt mah ila, chhungril nun laktlak lo, a dera nung mai kan ni awm si a. Mihring lang tlang tak, a dera nung ve lo nun chu awhawm tak a ni. 

Lansarh tum luat a, khawsak ze mil lova nun te hian mihring nun a ti bahlah fo. A derin kan nung hova, pawnlam landan avangin kan in pawm zam vel mai mai sia maw. Mitin mai chu hmaikawr vuah chungin kan leng a, kan nun chawhpawlh tak chu hliahkhuhin a awm a, a phenah pawnlang mawina in kan nung a. Lungawi hmel pu siin chhungrilah lungngaihna a in zem a, hlim hmel pu lui chungin chhungrilah kan na a, lem kan chang fo mai. 

Misual rukru ten an hmel hliah nan hmai an tuam ṭhin. Lang lo tura thuhruk hrim hrim hian sual lam a kawk a ni. Tunah chuan hrileng avanga invenna hmaituamna vuah lo pawh man theih an ni ta. Pawn lam landan ringawt chuan chu mihring chu a teh kim lo. Chu hmaituamna phenah chuan mihring nun chu a lemin a nung ṭhin. Hmaikawr phenah chuan itsikna, awhna, sualna a in phum ru ṭeuh a, pholan lohin kan pai ṭheuh si. Hliahkhuhna hnuaiah chuan nun lem kan thukru a, nun tak kan phochhuak ngam lo. Lang tlang nun nei chuan a eng zawngin khawvel an hmachhawn a, an nihnaah an lungawi a, a dera nung tam apiang an nun a nguai ṭhin. 

Hmaikawr phenah a derin kan hlim a, a derin kan ṭap a,  nun tak tak nei turin a suala sual chhuah a, in siamṭhat tumna nun kan tlachham ṭhin. He hmaikawr phena kan nun ṭheuh hi, pho chhuah theihin awm ta se, tumah hian kan duh ka ring lo. Kan nun lem tak, midang itsikna, midang ngaih theih lohna, in thleibikna te hian kan nun a ti chau fo ṭhin.

Kan hmaikawr ṭheuh hi phelha siam ṭha turin keimahni ṭheuh kan pawimawh. Tlawm a ngaih huna tlawm thiam a, a dera kan nun dan ṭheuh hi pawm thiam a, insiam that ṭheuh i tum ang u.