Aizawlah 'HAR GHAR TIRANGA RALLY'

Aizawl Bawrhsap hovin India Independence Day puala in tina hnam puanzar zărna, Har Ghar Tiranga pualin Rally (kawngzawh) an huaihawt a. Ram tana inpekna thutiam (pledge) an sawi rual bawk. Hetiang thutiam hi hmun hrang hrangah pawh an sawi rual a ni.

Hei hi India khua leh tuite tan chuan kan tih tur dik tak a ni a. Kan ram lakah kan rinawm tur a ni a. Kan rinawmna chu kan lantir ṭhin tur a ni.

Tunah hian India ram hi ‘economy’ chakna te, sipai chakna te leh hmasawnna hrang hrang tehfunga hmanin khawvela ram ropui panga(5) zingah a tel pha a. Hetiang ram mi nih hi a chhuanawm a ni.

India ram hi hnam hnufualte awmna atana duhawm berte zinga mi a ni bawk a. Hnam hnufualte dawmkanna kawng hrang hrangin Constitution-ah a awm a ni. Kan thiamnain a zir chuan nihna sang ber pawh kan chan theih nan kawng a inhawng a. Garo tlangval, Purno Sangma, Union Cabinet Minister băka Lok Sabha Speaker a ni thei khan chu chu hairual lohvin a lantir a ni.

India ram hi eng hnam hrang tă bῐk mah a ni lo va. U.P. mite tă bῐk a ni lo va, Bengali te tă bῐk a ni lo va, Tamil te tă bῐk a ni hek lo. Tu pawhin kan phŭ ang zela nihna leh hamṭhatna kan dawn theihna ram a ni.

Hetiang hi thil awmdan a nih laia ka politicianten, ‘Zohnahthlak zawng zawngte hi rorelna pakhat hnuaia kan la awm ngei kan beisei’ tih thu an chhak chhuak fo mai hi chu a mak a ni. Chu chuan India ram aṭanga inlakhran, Independence a kawh avangin a ṭha lo a ni.

India sawrkarin pawisa min pĕk zozai te hi a hmanna turah hmang ila, hmana hmanah India ram State zinga hmasawn leh changkang ber ni tawh tur kan ni a. A hman lohna tura a tam ber kan hman avanga “HE TI” hi kan ni a. Tu mah dem thei kan ni lo va, keimahni hi hetiang dinhmun zahthlak taka kan dinnaah hian dem tur kan ni.

Mahni thawh chhuah ngai lova heti zat ram hmasawn nana hman tur kan nei chunga he ti hi kan nih chuan mahni hian han awm hrang ta ila, engtia awm nge kan tum tih hi zawhna lian tak chu a ni. Ram dang chawmhlawma awm băk hi kan nih theih a rinawm lo va. India rama lungawi taka awm a, kan thiamna te chu nihna sang kan neih theih nana hmang ṭangkai turin theihtăwp kan chhuah zawk tur a ni ang.

India ram mi kan nih thu chhechham meuha nemnghet chung zel leh a thau săwk chung zel bawka inlakhran tumna aw la chhuah fo si hi chu Sapṭawnga ‘double standard’ an tiha politics bawlhhlawh khelhna a ni a, a zahawm lo va, sim tur a ni. I vawh leh vawt la, i lum leh lum rawh tih thu te hi hriat nawn fo a ṭha ang.

Tuna Manipur-a thil thleng hi chuan ngaihtuahna a tikal thui hle a. BJP-in sawrkar chakna hmanga hnam hnufual leh tĕ zawk nĕk chĕpa tihchimih tum ang hrima an chĕ hi chu a ṭha lovin a dik lo va. Hetianga an kal zel chuan India ram hmun dang pawha harsatna nasa tak thlen tur a ni tih a chiang a. India ram inpumkhatna tichhe thei khawpa hlauhawm a ni. Chu chu India ram mipui tam zawk hian an duh lo va; keini pawhin tuna an kal dan hi a tăwp theih nan kan theih ang angin ṭan kan la tur a ni ang. Tuna BJP sawrkar kal dan hi chu a hlauhawma a dik loh ĕm avangin hlawhtling thei tura ngaih a ni lova, an thlăn an laih ṭanna ni-a ngai tam tak an awm tawh a ni.

India ram a ropui zel a, keini pawhin chu a ropuina-ah chuan neitu chan kan chan zel theih nan i bei ang u.

- M Lalmanzuala