Bial inchuh boruak

ZPM in Candidate an puan tirh khan bial inchuh tih kha kan hre nasa a, ZPM hruaitu langsar chin pawh an han chhuak ang phak phak a, bial inchuh hi a la reh hauh lo va, Congress leh MNF lamah hian bial inchuhna lian tak a lo la awm mêk chu niin. Zoram mipui hian an ngaihven ta lo hle a, kan hriat ang ang hi rinthu a ni chung hian i han titi pui dawn ang hmiang le.

Congress lakluh thar zingah hian Pu Lalnunmawia Chuaungo hi a langsar ber a, Aizawl North I lama ding ngei tura ngaih a ni a, chuh buaitu a neih hriat a ni lo. Pu Vana (LPS) hi an din tur dawn a nih chuan Aizawl West I an ti zet a, Aizawl West I lamah Dr Lallianchhunga leh Pu Albert-a an awm si avangin Aizawl West II lamah an ti leh a, hetah hian Congress an ṭhat loh avangin Ṭawi Bial emaw, anmahni veng awmna Aizawl West III lamah pawh dah a ni mai thei tih a ni. Pi Meriam L Hrangchal hi Lunglei lama ding tura an sawm chhuah a ni a, Pi Vanlalawmpuii khan Congress din channa tura ngaia Hnam dang pasal neih kha mahni nawmsakna uma lo tih hmanhmawh avangin, a pasal hi Mizo a nih chiah loh avangin sawi neuh neuh a kai a, ṭawng hmanhmawh loh hi a finthlak tih an inzir tawh ang.

ZPM aṭanga an lakluh Pu Remruatpuia chu Mamit bial pek an tum avangin Pu K Lalthanzama chuan seat a chang dawn ta lo va, kum eng emaw zat bial a vil thlawn ta niin a lang. Pu John Rotluangliana aiah ZPM lama seat chang lo Pu Lalhmingthanga dah tum hi a tak tak a nih chuan, Pu KS Thanga banna lehkhaa thu inziak kha dawt phuahchawp mai mai a ni lo ang. Pu Robiaka, Pu Mavala, Pu R Vanlalvena, Pu T Sangkunga te pawh ding lo tur zingah an tel.

MNF lam hi an la in puang fel thei lo va, Pu Tawnluia leh Pu Lalchamliana din leh din loh tur a la fel loh vangin bial dang pawh a la nghawng. Pu Tawna hi chawl tur tih leh Aizawl West I lama kal tur tih hi a ri nawn reng a, amah thlaktu tur an neih ṭhat loh avangin Khawzawl lam a chhuahsan hian MNF in seat an chán dawna hriatna a awm. Pu Lalrinliana Sailo hian Pu Tawna a chhuh chuan luh a duh laiin USA lama a thusawi avang khan MNF hian an iai tawh an ti. Pu Chama thlaktu tura langte hi a MNF ngei ngei pawhin an la iai si a, Candidate nawn leh turin an dawr mek tih a nih laiin Pu Zoramthanga bial hnihna tur hian khawi ber nge ni ang? tih chu MNF meuh pawhin an la inrinsiak ve laih laih a. Seat beisei ve àwm inti tawh; tuna ngawi ṭhuapte hi Candidate an set fuh loh chuan sorkar thei tura ngaih lamah an chhuah rinna a lian a, MNF zawm thar ṭhenkhatin hna an hmuh nghal laiin Hnam Run lamah hna la hmu ve mang lote pawh an la awm a, buai thei dinhmunah an la ding ve mek.

A ZPM ber lah chu an la inthlem kual a nih chuan Mizoram Politics hi a la ngaihnawm dawn chauh tih hi tuna kan sawi theih chin chu ni mai teh se.

- Lalthanmawia