MODI-A'N RSS HO HNENAH PM-A AN VAWRH CHUAN HINDUTVA A TIAM

Narendra Modi chuan RSS ho hnenah PM candidate atan vawrh tura a intiam ṭum khan, hengho hi a intiam a, a intiamnaah hian a ding nghet a, a tihlawhtling chho mek a nih hi. He a intiamna hi amah Narendra Modi hi mi nawlpuiin kan hriat hma September, 2013 khan TV-a chanchinthar puangtu lar tak pakhat Headlines Today, tuna India Today ni ta hian an lo sawi daih tawh a ni. Chung RSS hnena a thutiamte chu a hnuaia mi te hi an ni:

1. Article 370 Ṭhiah

2. Ram Mandir sak

3. Uniform Civil Code

4. Bawng talh khap

Hindu-ho hian Budhist, Sikh, Jain leh Parsi te hi Hindu peng pakhat (sect) angin an pawm a. Family Law hengho te nen hian an inṭawm vek. Muslim hoten dan hrang (Shariat law) an nei a, Kristian te leh Tribal ten dan hrang kan nei ve bawk a. Uniform Civil Code hman a nih chuan rinna hrang leh hnam hrang hrang ten dan hrang kan neihte hman a theih dawn tawh lo va, dan inang vek hman a ṭul dawn a ni. Uniform Civil Code hi Kristian leh Tribal te tan a hlauhawm khawp ang. All India Muslim Personal Law Board leh Christian Council te pawhin an do nasa khawp mai.

Uniform Civil Code hi Times Now ah an rawn puan khan tun kum maiah BJP ten Parliament ah pharh a, a taka hman ṭan an tum thu nikum khan an lo chhuah tawh bakah, nikum November thla khan Union Home Minister Amit Shah chuan TV programme pakhat 'Republic Summit' ah an kawm ṭumin Uniform Civil Code chungchanga BJP ten an intiamnaah an la ding nghet a, BJP chu an manifesto tihlawhtling ṭhintu an nih angin a hun takah an rawn la hlen chhuak dawn tiin a sawi a ni. Tuna BJP sawrkarin Hindutva an dinna tur atana hmanrua anga ngaih, hnam leh sakhaw tlem zawk ten kan do leh hlauh em em; Citizenship Amendment Act hi chu a hnawksak leh hlauhawm dan tur chungchangah Uniform Civil Code lakah chuan aitechhinna ang chauh ani.

A chunga thu tarlan Narendra Modi intiamna chungchang khi September, 2013 daih tawh khan India Today chuan an lo chhuah tawh a, khi a thu tiamna ang khian India ram hi Hindu ram siamna tura Narendra Modi-a'n RSS ho hnena a lo intiamna chu a thleng dik ta zat zat a ni.

Ram Mandir chungchangah hian Hindu hovin an pathian an biakna hmun mai pawh ni lovin, an pathian Rama pianna hmun nia an ngaih Muslim lalten ro an rel laia an tihchhiatsak, chutah Muslim ho sakhaw hmun an sak hnan tih kha kan hriat dan a ni a, chu chu a dik a nih ngai chuan Hindu ho hian an tihtur tak an ti maiah a ngaih theih tiin mi tam tak chuan ngaihdan an siam mai awm e. Amaherawhchu, hetiang zawnga rilru an pek chuan a dik ti pawh an awm ngei ang. India ramah sakhaw lama minority zingah Muslim pawh an tih ngam tawh chuan keini hmanlaia khawvel ram hrang hranga hnam dang awp ṭhintu, Kristian sawrkarte hmalakna leh thil tih tam tak bakah mi ram an awp hunlaia kan missionary te hmalakna, RSS ten an huat takzet tam tak a awm a. Chuvangin hmanlai thil thleng avanga an duh dan anga phuba lakna ni awma ngaih theih turin leh, tun hi chu Hindu lal ber hun a ni tih rilru puin kha'ng hunlai thil thleng siam ṭhat an tum zel chuan keini India rama minority, a bik takin keini Kristiante tan chuan a hrehawm khawp ang.

Tin, Article 370 chungchangah hian Hindu firfiakten an sakhaw huat em em leh anmahni kum 100 chuang lo awp ṭhintu; Muslim-ho hi anmahni Hindu hovin an khawih theih lohna turin anmahni humhimtu dan awm tlat hi an huat em em leh, tihbo an duh ngawih ngawih a ni. He dan hian Muslim ho hi Hindu hovin an hun a thleng ta tia an inlulin theihna tur daltu leh, humhimtu nia an hriat avangin Hindu lalna ramah chuan he dan hi a lo din ve reng a rem tawh lo an tih avangin thai bo an duh tawh ngawih ngawih a ni. Hetia khawvel pawhin an ngaihtuah Kashmir ram chungchang ‘international issue’ tlingah pawh an chèt ngam chuan keini Mizoram puala kan neih ve Article 371G hi chu ‘bel chhunga hminsa’ ang tlukin an duh duh hunah min khawihsak ngam dawn a ni tih hi a hriat reng tawh mai a.

India emaw khawi ram pawh ram hruaitu tan chuan hmanlai kan inhliam tawnnate inngaidam tawn a, theihnghilha tun dinhmun aṭangin ramin eng nge hmasawnna tur a mamawh ber leh, ram inpumkhatna tur atana pawimawh ber kha ngaihtuah hun a ni zawk lo maw? Hetianga inṭhendarh zawnga chet hi ram tan a ṭha ber ang em?

BJP hian sakhaw hmangin India a tikehdarh dawn a ang riau asin. Keini tan chuan a ṭha zawk daih tiin mi tam tak rilruah a awm thei, mahse heng BJP leh RSS chhulchhuakho hi chuan India ram hi kum za tam tak pawnlam mi sakhaw dang i.e., Muslim leh Kristian-ho awpna avangin Hindu sakhua vuantute hi darhsarh taka awmin sakhaw dangte an vawn phah a, hengho pawnlam miten min awp hma hmanlaia India ram awm dan anga lungrual taka sakhaw khat, Hindu sakhua vuana chumi sakhaw dan anga inawp leh hi an tum ber leh ngaihdan a ni a. Sawi tawh angin keiniho pawh hi Hindu sakhaw vuan reng ṭhin, sakhaw dang a chhan kan sawi tawhte avanga vuan chawp angah lek min ngai.

Anni ngaihdanah chuan heng pawnlam sakhua laka min then thian thianghlim hi an tum dan a ni. Chuvangin kan duh duha kan ṭhensan mai hi chu an phal loh hulhual hmel. Chuti chhapah heng mite hian kan ramah hian mahni chauha kan awm hi an rem ti awzawng lovin a lang a, CAA leh hmanraw dang dang pawh an hmang ang. Chu'ng hmanruaa hmangin hnam dang leh sakhaw dang nen inchîm pawlha kan chen hi; tunlai thil thlengte aṭang hian an tum ber niin a lang ta. Kan ramah ngei hetiang a nih chuan independent chu sawi loh, minority kan la ni mai ang.

Aw le, kan sawi tawh ang khian, Hindu lalna ram din tumtuten India rama sakhaw lian ber dawttu Muslim chunga an thiltih an tumah dang theitu nei lo ang maiin chak takin tunlai hian hma an la mek a, chuvangin keini Kristiante pawh hi kan bang bik chuang lo va, India ram hmun hrang hrangah harsatna leh tihduhdahna, thihna thleng hial pawh kan tawrhna hi BJP-in sawrkarna a chan tak hnu hian nasa takin a hluar chho mek a, kan ramah thlengin kan regional party pahnih zinga pakhat MNF chuan a thawhpui a, ZPM pawhin an thawhpui dawn nge dawn lo tih thutlukna siam thei lo hial khawpa awm turin a vial chial mek a, Pathian rawn chungin huaisen takin, Ama hnenah heng mite thiltih leh hmalaknate do let turin a hmanruaah inhlanin, a ram leh hnam angin kan ram, kan hnam leh kan sakhaw himna turin kan inlungrual a ngai a ni.

Source- RSS: A View to the inside, Republic TV, India Today, Times Now.

-Lalhruaitluanga Bawitlung