Bial vil

Kumin hi MLA inthlan kum a lo ni leh ta a, kum nga lo awm tura kan ram hruaitu nih tumin political party hrang hrangte an inbuatsaih leh ta mup mup a, inthlan kum dang ang bawkin kan ṭang tlang leh ta hlawm hle.

ZPM party chuan inthlan kum danga tih ngai loh takin hma takah bial viltu tur an ruat kim titih dèr a, MNF party pawhin tam vak lo chu an ruat ve tawh bawk a, party dang erawh chuan an la ruat rih lo thung a ni awm e.

Tin, heng bial vil tura ruatte hi an party lam chuan tun hnai khan kumin MLA inthlan tura party official candidate tur an ni tih an puang chiang leh ta bawk.

Engtin nge bial an vil dan chu ka hriatpui hauh lo na'ngin, bial viltute hian an bial chhunga damlo kan, mitthi ral, chhungkaw hrang hrang tlawhchhuah, street campaign, khawtlang mamawh tihsak (sponshorship, free clinic, kawng laih, chhawmdawlna etc.) te in bial an vil ṭha hle nia sawi a ni a, mipuite tan a ṭhain a chhenfakawm hle ang.

A-leh-lam zawnga thlir erawh chuan heng bial viltute hian sum leh pai, tha leh zung, hun tam tak an seng nasa hle ang tih a rin theih a ni.

Mizoram pum pui hi bialtu MLA nei lai vek kan ni a, hetia bialtu MLA nei chunga political party te'n bial viltu an ruat ve ringawt hi a fuh em? Ngaihtuah chian ngai tak a ni zawk lo'ng maw?

Hetianga bial viltu lo ruat lawk hi kan kalphung thar a nih vaih zel chuan a sum nei nei, thu sawi thiam thiam, a zak thei lo lote kutah kan ram hi kan dah dawn tihna a ni thei a, kan hmabak hi a ngaihtuahawm viau thei a ni.

Legislator ṭha ni tura thiamna leh theihna nei; mahse sum leh pai, mi biangbiak leh thusawi lama talent nei ve lo tan ram hruaitu nihna chance kan siam ve lo tihna a ni ang a, a thuhrimah thusawi leh mi biangbiak lama tha leh sum ngahte'n kan ram hi min lo hruai tawh ṭhin a, kan thlen chin chu heti hi a ni.

Tunhnaia chanchinbu rintlak tak pakhat tehna aṭang pawhin India ram pum puia leiba ngah ber state kan la ni mek a nih hi maw!

Heti ang zawnga sorkarna siam tuma hmalakna hi ram hluizia, kan bansan tur niin i hre ve em le?

Bial lo vil lawk hi ṭha i ti em?

- Lalngaihawma Pachuau